GALATIA 1 - BUKI SUSI Wahasa ngu Taghul᷊andang l᷊ou-l᷊ou

^1-3 Manga ana u simbau apang jamaati su wilaya ngu Galatia. Ia, i Paulus l᷊au kaul᷊i u ana u simbau tau Sahani ko dingangku, muharapi mal᷊umbako Mawu Ruata I Yamang i kite l᷊au Mawu Yesus Kristus mangonggo al᷊amati dingang u kapapia si kumu. Ia nakoa rasuli wal᷊inge ual᷊ingu taumata arako ual᷊ingu nihengke u taumata, kateho ual᷊ing I Yesus Kristus dang Mawu Ruata I Yamang i kite ko seng nupuwiahi I Sie sau bou papate.

⁴ Nutumuhu kao u Mawu Ruata I Yamang i kite, I Kristus nanarakang watangeng-E nakoa korbang guna ngu apang dosa ngi kite, tadeau i kite ipakasal᷊amati bou tempo ko dal᷊ai i'i.

⁵ Dalo su Mawu Ruata sarang kal᷊iwuenge! Aming

Habari Mapia mang kitang simbau

⁶ Ia naherang hal᷊i u manga ana u simbau! I kumu nikuing u Mawu Ruata ual᷊ingu kakindaghi I Kristus, kateho su orasi i'i i kumu maehong kahingang nutumal᷊ikuri u Mawu Ruata dang nutumuhu “habari mapia” ko wal᷊inge bou Habari Mapia ko bou Mawu Ruata.

⁷ Hinonge ko takoae “Habari mapia ko wal᷊inge.” Kitang pia manga taumata ko nuhabari si kumu “Habari mapia” hal᷊i I Kristus ko nipukakal᷊iu ngi sire hakiu nakapugara si kumu.

⁸ Taumata ko muhabari “Habari mapia” ko wal᷊inge bou habari Mapia ko seng nihabari kami, walate i sie pakihukung su Mawu Ruata – maneng taumata e'e ko i kami sisane arako malaikati bou sorga!

⁹ I kami seng mbuae nuhabari ndahuwite, su orasi i'i ia sau l᷊ai muhabari: Taumata ko muhabari si kumu “habari mapia” ko wal᷊inge bou Habari Mapia ko seng nitarima i kumu bo i kami, taumata e'e pakihukung su Mawu Ruata!

¹⁰ Apa dingang u e'e tuhungang ia karlagu ngu muharapi pakiaku ngu taumata? Ta! Sarang singkodo-kodo. Ia kitang muharapi pangangaku ngu Mawu Ruata. Apa ia kaputawakal᷊inge mangal᷊a naung u taumata tadeau makal᷊uasi naung u taumata? Boko ia mborong mukoa kere'e, ia wal᷊inge l᷊ang I Kristus.

Kirapa i Paulus nakoa rasuli

¹¹ Manga ana u simbau mambeng katitong himoneu Habari Mapia ko daku nihabari e'e asal᷊i wal᷊inge bou taumata.

¹² Ia ta nanarima habari e'e bou taumata, dang takoae sarang singkatau ko nanintiro ngu e'e si sia. I Yesus Kristus sisane nul᷊ahe tataho u Habari Mapia e'e si sia.

¹³ Tantu i kumu seng nakaringihi hal᷊i u puwawiahiku ndahuwite kere singkatau tumatuhu agama ngu Yahudi. I kumu matitong kirapa kahasange ia mukoa jamaati u Mawu Ruata dang kirapa katoghasi ia mutawakal᷊i mupakawinasa ngi sire.

¹⁴ Su l᷊al᷊ung u hal᷊i mupal᷊al᷊eng u agama ngu Yahudi, ia nangilebe bou apang tau Yahudi ko sinduhungku. Ia kere'e katoghasi su l᷊al᷊ung u manga hal᷊i u tundu ngi i upung ghaghurang i kami.

¹⁵ Kateho ual᷊ingu kapapia naung u Mawu Ruata, I Sie namile si sia su horo u ia nipahinding dang nukui si sia guna ngu putangkiang si Sie.

¹⁶ Mawu Ruata seng nul᷊ahe u Ahus-E si sia tadeau Habari Mapia hal᷊i u Ahus-E botonge daku ihabari suapang taumata ko wal᷊inge tau Yahudi. Su tempo e'e ia ta nakoa sarang koa i sai-sai guna ngu mundo sasasa.

¹⁷ Ia l᷊ai ta nakoa sarang manga taumata su Yerusalem ko seng nahoro bou ia nakoa rasuli. Kateho ia nakoa sarang wanua ngu Arabi, bou e'e nusul᷊e sau sarang Damsyik.

¹⁸ Tilu taung bou e'e ia nakoa sarang Yerusalem guna ngu musombang i Petrus. Ia natana dingange kitang mapul᷊ol᷊ima su l᷊ounge l᷊iwuenge.

¹⁹ Ia ta nusombang u manga rasuli ko wal᷊inge su l᷊ikuri Yakobus, ana u simbau u Mawu.

²⁰ Apang ko daku niwohe i'i ko tingari, Mawu Ruata matitong himoneu ia ta nutul᷊ong!

²¹ Bou e'e ia nakoa sarang manga wanua ngu Siria dang Kilikia.

²² Sarang tempo e'e apang jamaati u Sahani su Yudea mborong wugha ngu ia mal᷊ahe.

²³ I sire kitang nakaringihi taumata nangul᷊i, “Taumata ko ndahuwite namahang si kami, su orasi i'i seng kapuhabari u pangangimang ko ndahuwite ipakailange.”

²⁴ Kuteu i sire nundalo Mawu Ruata ual᷊ingu ia.