FILIPI 1 - BUKI SUSI Wahasa ngu Taghul᷊andang l᷊ou-l᷊ou

¹ Manga ana u simbau umati Mawu Ruata kaul᷊ie ko natana su Filipi, dang ko seng nasimbau dingang I Kristus Yesus. Dingang l᷊ai manga ana u simbau pangaha l᷊au mutatangkiang jamaati! Ia, i Paulus, dingang i Timotius, manga l᷊ang I Kristus Yesus,

² muharapi mal᷊umbako Mawu Ruata I Yamang i kite l᷊au Mawu Yesus Kristus mangonggo al᷊amati dingang purarame si kumu.

Kal᷊iomaneng i Paulus guna ngu jamaati

³ Sintinia ia makatinaung si kumu, ia mang muputarimakase su Mawu Ruata.

⁴ Dang sintinia ia mukal᷊iomaneng i kumu kaul᷊ie, ia mukal᷊iomaneng dingang u naung mal᷊uasi.

⁵ Ia muputarimakase su Mawu Ruata ual᷊ingu mangki l᷊ou kahimotongange sarang orasi i'i i kumu seng nusumbala si sia nangeke ngu Habari Mapia bou Mawu Ruata.

⁶ Mawu Ruata sisane ko nanita u hal᷊i ko mapia e'e si kumu, dang ia mangaking I Sie sarung manurusi pul᷊ahal᷊i e'e sarang masue su L᷊ou ngi Kristus Yesus sau ruminta.

⁷ Tingari su tempo e'e ia pia pundang ko kere'e si kumu, watu'u i kumu kaul᷊ie sintinia masandighi su l᷊al᷊ung u naungku. Watu'u l᷊ai i kumu seng nanarima singkahindo dingangku l᷊aonggo ko ninggile Mawu Ruata si sia; maneng su orasi i'i tintal᷊a ia su l᷊al᷊ung u tutupang arako l᷊ai su tempo ia ene su l᷊ikuri guna ngu mutumatawang dang mutahatinda u Habari Mapia e'e.

⁸ Mawu Ruata matitong himoneu ia mo kahingang musombang i kumu dingang u pundang kakindaghi nasue bo I Kristus Yesus sisane.

⁹ I'i kakal᷊iomanengku guna ngi kumu: mal᷊umbako i kumu kasaunge mukumindaghi u Mawu Ruata l᷊au sinsul᷊ung dang turusi matamba su l᷊al᷊ung u titong ko nuhino dang sipirang ko mapilesa.

¹⁰ Dingang kere'e i kumu matitong mamile apang ko kapiange, dang puwawiahi i kumu sarung mabursi bou ko dal᷊ai arako l᷊ai manga l᷊aantang su l᷊ou ngi Kristus sau ruminta.

¹¹ Puwawiahi kumu sarung mapene dingang u kakanoa ko tinga-tingari mapia ko kitang ikarea bo I Yesus Kristus sisane; kuteu Mawu Ruata sarung ipakawantughi dang idalo-dalo.

Muwiahi guna ngi Kristus

¹² Ia mo i kumu matitong, himoneu manga hal᷊i ko nariadi si sia katewe kasaunge nakakoa lebe maul᷊i taumata nakaringihi dang nangimang Habari Mapia e'e.

¹³ Suenge, kaul᷊i u mudadiaga istana l᷊au manga taumata ko wal᷊inge su soa i'i matitong himoneu ia nitaho su tutupang ual᷊ingu ia mutangkiang si Kristus.

¹⁴ Dang hukumang si sia nakakoa kaul᷊ikange bou manga tau Sahani su soa i'i kasaunge nangaking su Mawu, hakiu i sire kasaunge mawahani muhabari tatanata ngu Mawu Ruata dingang takoae takue.

¹⁵ Tingari pia pirangkatau su tal᷊oara i sire muhabari I Kristus ual᷊ingu saki u naung dang mo musitori, kateho ko wal᷊inge muhabari Kristus ual᷊ingu pia pandung ko matulasi.

¹⁶ Manga taumata i'i nukoa e'e ual᷊ing u i sire mukumindaghi Mawu Ruata dang ia, watu'u i sire matitong himoneu Mawu Ruata seng nuparenta si sia guna ngu pul᷊ahe himoneu Habari Mapia e'e ko nuhino.

¹⁷ Kateho taumata ko wal᷊inge muhabari I Kristus dingang u pandung ko dal᷊ai; i sire muhabari guna ngu watangeng i sire. Dingang u e'e i sire muharapi botonge mukoa tadeau ia kasaunge masusa su l᷊al᷊ung u tutupang.

¹⁸ Kateho tawe makoa apa! Watu'u maneng kirapa, maneng e'e nikoa dingang u pandung ko matulasi arako dingang u pandung ko nunsal᷊a, asi I Kristus mang nipul᷊ahabari; inau ia mal᷊uasi. Dang ia tatapi mupundang kere'e,

¹⁹ watu'u ia matitong himoneu dingang u kakal᷊iomaneng i kumu dang dingang u tul᷊umang bou Roh I Yesus Kristus, ia sarung ipakal᷊iwiri.

²⁰ Ko daku i kao l᷊au daku iharapi tadeau kumbahang-bahang ia ta nakaturusi pul᷊ahal᷊iku. Arawe ia muharapi tadeau sintinia tempo, nangilembo su orasi i'i, ia botonge mutimbahani hakiu dingang kal᷊abo u katatoghasiku – maneng ia wiahi arako ia mate – I Kristus mang ipakawantughi.

²¹ Watu'u si sia, ol᷊ang u puwawiahiku kitang I Kristus! Dang mate mangal᷊enge kal᷊auntung.

²² Kateho boko dingang u puwawiahi su dunia i'i, ia botonge mukoa hal᷊i ko nangilembo pia mangal᷊enge kuteu ia wugha sude ko mambeng daku ipile.

²³ Ia niwol᷊eng bou dua mbuka. Ia mo kahingang manintang u dunia i'i tadeau matamai matana dingang I Kristus, watu'u seng e'e ko kapiange;

²⁴ Kateho, guna ngi kumu, mapiang boko ia tatapi matana su dunia.

²⁵ Ia mangaking su hal᷊i e'e. E'e sabapie ia matitong ia sarung tatapi matana dingang i kumu kaul᷊ie, tadeau botonge mutul᷊ung si kumu makoa kasaunge matoghasi dang kasaunge mal᷊uasi su l᷊al᷊ung u pangangimang su Mawu.

²⁶ Watu'u e'e boko ia sau musul᷊e sarang koa i kumu, i kumu ko seng nasimbau dingang I Kristus Yesus sarung pia lebe maul᷊i l᷊ai alasange guna ngu muhengke su watangengku.

²⁷ Ho, ko kapiange su orasi i'i ko himoneu i kumu muwiahi sindal᷊eng dingang u apang ko nitantu u Habari Mapia hal᷊i I Kristus e'e. Dingang kere'e, minsang ia botonge musombang dingang i kumu arako ta, ia sarung mundaringihi himoneu i kumu matoghasi su kasasimbau dang mutawakal᷊i singkahindo guna ngu kitang pandung simbau dingang u kao simbau, e'e ko pangangimang ko sindal᷊eng dingang u Habari Mapia bou Mawu Ruata e'e.

²⁸ Kenangko i kumu sintinia pakawahani; kumbahang mataku su manga roka i kumu. Dingang kere'e i kumu mangandaghi himoneu i sire nal᷊ahe sarung ikawata, dang i kumu sarung makauntung, ual᷊ingu Mawu Ruata sisane ko mangonggo kal᷊auntung si kumu.

²⁹ Watu'u Mawu Ruata seng mangonggo al᷊amati si kumu ual᷊ingu wal᷊inge kitang guna ngu mangimang si Kristus, kateho l᷊ai guna ngu mutatahang u singsara guna ngi Kristus.

³⁰ Su orasi i kumu l᷊ai mutumuhu dingangku su l᷊al᷊ung u pusaseke ko musul᷊ung; i kumu seng mbuae nakawua ia nuseke ndahuwite, dang mborong tatapi daku ipuseke sarang orasi i'i, kere ko seng nikaringihi kumu su orasi i'i.