ESTER 6 - BUKI SUSI Wahasa ngu Taghul᷊andang l᷊ou-l᷊ou

Ratu nangadati si Mordekhai

¹ Su huwi e'e l᷊ai ratu ta nakatatiki. Watu'u e'e i sie nundo pakial᷊a buki wuke ngu kararatuang dang nundoi taumata pubasa.

² Su l᷊al᷊unge nikahombang kawawohe himoneu i Mordekhai seng nangalaki pia tawakal᷊i pamamate su ratu ko nikaraki i Bigtan l᷊au i Teres, i sire rua mapapangkati ko nihae ko mundadiaga kamari u ratu.

³ Ratu nakina, “L᷊aadati l᷊au wawal᷊isi apa ko seng nionggo si Mordekhai e'e?” Manga paparentang nusumimbahi, “I sie ta nanarima manga apa.”

⁴ Bou e'e ratu nangul᷊i, “I sai pagawaiku ko ene su istana orasi i'i?” Nusarita u e'e i Haman mbuhue nusumu su lilahi u istana; i sie mo mundo maghilei su ratu tadeau munggantong si Mordekhai su rihi ko seng nipararisie.

⁵ Manga paparentang e'e nusumimbahi su ratu, “I Haman ene su istana dang i sie mo mutumatingo si ko i L᷊uadateng.” “Roiko i sie pasu,” angkung u ratu.

⁶ Suapang i Haman nusumu, ratu nangul᷊i si sie, “Pia taumata ko daku onggol᷊ang u l᷊aadati ko l᷊abo. Apa ko sarung daku ikoa si sie?” Su sipirang i Haman, “I sai l᷊ai ko sarung ionggol᷊ang u ratu l᷊aadati kere'e kal᷊aboe? Nal᷊ahe ko ia!”

^7-8 Watu'u e'e i sie nusumimbahi, “Kenangko tau e'e ial᷊akeng u pakeang kawawantughi ko narang ipake i ko i L᷊uadateng sisane. Bou e'e kawal᷊o ngi ko i L᷊uadateng pakil᷊ighahi dingang u manga tatia ngu kararatuang.

⁹ Singkatau tumbonang u negara bou hintou ngu papung mambeng mupul᷊oho u pakeang e'e su taumata ko sarung iadateng u ratu e'e, bou e'e manundughi tau e'e dingang pasake kawal᷊o ngi ko i L᷊uadateng bou peleng u soa. Mapapangkati e'e sarung l᷊umal᷊eng su tingonge apiru kakihae, ‘Ko kiri'i ratu mangonggo u pul᷊ahariga su taumata ko iadatenge!’ ”

¹⁰ Bou e'e ratu nangul᷊i si Haman, “Pakaehong, al᷊ako pakeang l᷊au kawal᷊o e'e dang onggoko apang l᷊aadati e'e si Mordekhai, tau Yahudi e'e. Koako kere ko seng niul᷊i u kaninite, kumbahang munggahing sarang singkodo. I kau makapusombang i sie su tukari u istana.”

¹¹ Bou e'e i Haman nangal᷊a pakeang l᷊au kawal᷊o e'e dang nupul᷊oho u pakeang e'e si Mordekhai. Suapang i Mordekhai nusumake su kawal᷊o e'e i Haman nangaha nul᷊umiu peleng u soa, apiru kakihae, “Putuhungko, ko kiri'i ratu mangonggo u pul᷊ahariga su taumata ko niadatenge!”

¹² Bou e'e i Mordekhai nusul᷊e sarang tukari u istana. Arawe i Haman maehong-ehong napul᷊e. I sie mandi ikawua ngu taumata, ual᷊ing i sie mamea kahingang, kuteu nitimbukunge pahesie.

¹³ Su kawing l᷊au su kaul᷊i u ghawe'e i sie nuwuke ngu apang ko seng nariadi e'e. Mbuhue kawing l᷊au manga ringange ko mapilesa e'e nangul᷊i si sie, “Katatoghasiu nanita nikawata i Mordekhai. I sie tau Yahudi dang i kau ta makal᷊awang si sie. I sie nal᷊ahe sarung makawata si kau.”

I Haman nipate

¹⁴ Tintal᷊a i sire mborong kadidatonge dingang i Haman, manga mapapangkati u istana nusumongo dingang masahawu-sahawu mangunturi si Haman sarang sal᷊iwang ko nikoa i Ester.