ESTER 5 - BUKI SUSI Wahasa ngu Taghul᷊andang l᷊ou-l᷊ou

I Ester nunoti ratu l᷊au i Haman sarang sal᷊iwange

¹ Su l᷊ou katilu ngu puasange, i Ester nul᷊oho l᷊aku wawu bokinge, bou e'e natamai sarang lilahi su l᷊al᷊ung u istana dang nurumarisi su tingo ngu tukari u pandopo. Ratu kakangiang su kadera ko tutatingo ngu tukari e'e.

² Su tempo ngu i sie nakawua si Ratu Ester kararisi su l᷊ikuri, i sie nukumindaghi si sie dang nangul᷊uhi tiking wul᷊aenge si sie. Kuteu u i Ester natamai, bou e'e nanuhung pondol᷊i tiking e'e.

³ Mbuhue ratu nakina, “Ko pia apa, Kawingku? Ul᷊ie! Maneng ko ipundokangu stenga bou kararatuangku, sarung daku ionggo l᷊ai.”

⁴ I Ester nusumimbahi, “Boko i ko i L᷊uadateng mal᷊uasi, kenangko huwi i'i i ko i L᷊uadateng l᷊au i Haman musumongo su sal᷊iwang ko ikoa u l᷊ang u guna ngi ko i L᷊uadateng.”

⁵ Ratu nangoro si Haman tadeau pakaehong sumongo, tadeau i sire botonge makasongo su noti i Ester. Kuteu i sire nusumongo sarang sal᷊iwang ko nikoa i Ester e'e.

⁶ Su tempo ngu kainunge anggori, ratu nakina, “Orasi i'i ul᷊ie apa ko ikaou. Maneng apa ko ipundokangu sarung daku ionggo, maneng stenga bou kararatuangku!”

⁷ I Ester nusumimbahi,

⁸ “Boko i ko i L᷊uadateng mal᷊uasi mundaringihi kakahioro u l᷊ang, kerewotonge i ko i L᷊uadateng l᷊au i Haman musumongo sau su sal᷊iwang ko ikoa l᷊angu dol᷊ou huwi. Hindo su sal᷊iwang e'e l᷊ang sarung mangul᷊i ndo u l᷊ang si ko i L᷊uadateng.”

I Haman pia naunge mamate si Mordekhai

⁹ I Haman napul᷊e bou sal᷊iwang i Ratu Ester dingang u naung ko mal᷊uasi kahingang. Kateho su tempo ngu su tukari u istana i sie nakawua si Mordekhai ko ta nurumarisi nangonggo adati si sie, i sie nuwawal᷊uang kahingang.

¹⁰ Kateho i sie nukuhirang u watangenge dang napul᷊e sarang wal᷊enge. Nasongo pai se'e i sie nangoro manga ghawe'e pasongo dang nundo si Zeres, kawinge, tadeau kumangiang dingang i sire.

¹¹ Bou e'e i Haman nuwuke si sire dang nangoboti u kakakalae, ul᷊i u anae kol᷊aese, hal᷊ie ko mapia ko mbuhue nitarimae bou ratu, l᷊au pangkati ko lebe marange bou manga pagawai ko wal᷊inge.

¹² Angkunge l᷊ai, “Ratu Ester l᷊ai kitang nunoti si sia l᷊au su ratu sarang sal᷊iwang ko nikoae guna ngi kami, dang dol᷊ou huwi i kami ninotie l᷊ai.

¹³ Kateho Kaul᷊ie e'e takoae mangal᷊enge, salama ngu ia mborong makawua si Mordekhai, tau Yahudi e'e, kakangiang su tukari u istana.”

¹⁴ Nakaringihi e'e kawinge l᷊au manga ghawe'e nanughu kiri'i, “Pangoroko pukoa rihi ngu punggantongang. Range'e duampul᷊odua su meteri. Bou e'e ndai mal᷊ou, mal᷊uka-l᷊ukari paghileiko su ratu guna ngu munggantong si Mordekhai su rihi e'e. Dingang kere'e i kau botonge matamai sarang sal᷊iwang e'e dingang u naung ko matatapi.” Tatughu e'e mapia kahingang su sipirang i Haman, watu'u e'e i sie maehong nundoi pukoa rihi ngu punggantongang e'e.