ESTER 3 - BUKI SUSI Wahasa ngu Taghul᷊andang l᷊ou-l᷊ou

I Haman nukirou ko dal᷊ai mupakawinasa tau Yahudi

¹ Pira ngkatempo tuhue Ratu Ahasyweros nuhengke singkatau ko arenge i Haman nakoa perdana menteri. I Haman ko ana i Hamedata bou hintou ngi Agag.

² Ratu namarenta su kaul᷊i u pagawainge tadeau pangadati si Haman dingang musuba su tingonge. Kaul᷊ie nutumuhu parenta e'e, su l᷊ikuri Mordekhai.

³ Manga pagawai ko wal᷊inge su istana nakina si sie nakurawe i sie nul᷊umawang parenta ngu ratu,

⁴ dang l᷊ou-l᷊ou i sire manihasa si sie tadeau mangkate tuhuke, kateho i sie mandi mundaringihi. Angkunge, “Ia ko tau Yahudi; ia ta makapusuba su taumata.” Bou e'e i sire nangalaki u hal᷊i e'e si Haman ual᷊ing i sire mo matitong minsang apa ko sarung ikoae si Mordekhai.

⁵ I Haman nuwawal᷊uang kahingang su tempo ngu nakatitong himoneu i Mordekhai mandi musuba si sie.

⁶ Dang suapang nikatitonange himoneu i Mordekhai ko tau Yahudi, i sie nangal᷊a putusang tadeau muhukung si Mordekhai dang wal᷊inge kitang e'e, kateho sarung mupakawinasa l᷊ai kaul᷊i u bangsa Yahudi su kararatuang u Persia.

⁷ Su taung kapul᷊oduange pamarentahang i Ratu Ahasyweros, su wul᷊ang kahimotongange, e'e ko wul᷊ang Nisan, i Haman nangoro panawu loti ko nisigho “purim” tadeau makatitong l᷊ou arako wul᷊ang sude'e mahino guna ngu mupal᷊al᷊eng kirounge ko dal᷊ai e'e. Kuteu seng nitantu su tanggali kapul᷊otilunge wul᷊ang kapul᷊oduange, e'e ko wul᷊ang Adar.

⁸ Bou e'e i Haman nangul᷊i su ratu, “Ko Il᷊uadateng, pia simbau bangsa ko lulunge mutatintang ko nakeke su apang propinsi ngu kararatuang i'i. Adati sire ko mutatintang kahingang dingang u manga bangsa ko wal᷊inge. I sire ta mutumuhu manga tita ngu kararatuang. Inau, mapiang i ko i L᷊uadateng kumbahang mamala ngi sire mukoa tuhu kao i sire.

⁹ Boko i ko i L᷊uadateng mupahumbang, kenangko pasuwang surati parenta guna ngu mupakawinasa ngi sire. Dang boko ko i L᷊uadateng mo manarima usuli u l᷊angu, l᷊ang nal᷊ahe sarung botonge makasu lebe bou tiluhasupaupul᷊o su hiwunge su kilonge sal᷊aka su l᷊al᷊ung u kasi i ko i L᷊uadateng.”

¹⁰ Nakaringihi e'e, ratu nul᷊ua sinsing bou tal᷊imboronge ko biasa ipake'e guna ngu mucap manga wohang ngu kararatuang, bou e'e nionggoe si Haman, roka ko l᷊abo u tau Yahudi.

¹¹ Angkung i ratu si sie, “Bangsa e'e dang l᷊ai doinge daku isarakang si kau. Pukoae si sire apang ko mutatahino si kau.”

^12-13 Kuteu su tanggali kapul᷊otilunge wul᷊ang kahimotongange, i Haman nukui manga mamamohe u ratu. I sire niroie pamohe surati sintuhu dingang u apang ko niparentange, bou e'e surati e'e nisaleng su kaul᷊i u wahasa l᷊au wohe ko ipake su kararatuang e'e. Surati e'e niwohe su areng i Ratu Ahasyweros dang nicapi dingang u sinsinge, bou e'e niroho dingang masahawu su manga mangangawasa, gubernur l᷊au mapapangkati su kaul᷊i u propinsi. Taho u surati e'e ko parenta himoneu su tanggali kapul᷊otilunge wul᷊ang Adar, kaul᷊i u bangsa Yahudi, maneng ko maghurang arako ko makuda, maneng kowawine arako manga rario, mambeng ipate takoae ampunge, dang manga rarotong i sire ihampasi.

¹⁴ Parenta e'e mambeng pakiwohang su apang propinsi tadeau kaul᷊i u taumata seng musasadia su l᷊ou ko seng nitantu e'e.

¹⁵ Manga raroi maehong nuwua nangunturi manga surati e'e sarang kaul᷊i u propinsi ngu kararatuang. Su raroi u ratu, parenta e'e niwohang l᷊ai su Susan, pusati u Persia. Bou e'e ratu dingang i Haman kakangiang apiru kapanginunge anggori, kateho soa ngu Susan nughigho u habari e'e.