ESTER 2 - BUKI SUSI Wahasa ngu Taghul᷊andang l᷊ou-l᷊ou

I Ester nakoa wawu boki

¹ Pira ngkatempo bou e'e, maneng ratu seng ta nuwawal᷊uang l᷊ai, i sie mborong kapusipiri u kakanoa i wawu Boki Wasti l᷊au hukumang ko seng nionggo si sie.

² Watu'u e'e manga mananughunge ko masandighi dingang u ratu nanughu kere tuhue i'i, “Mapiang ireakeng u manga mahua ko masasidada guna ngi ko i L᷊uadateng.

³ Kenangko ko i L᷊uadateng puhengke manga pagawai su kaul᷊i u propinsi kararatuang i'i guna ngu mundea manga mal᷊ahua ko masasidada bou e'e pumbawa si sire kaul᷊ie sarang l᷊al᷊ung u wal᷊e ngi wawu boki su Susan i'i. I Hegai, mapapangkati ko nitani nakoa tumbonang u ruma tangga ngu wal᷊e ngi wawu boki hindo mangurusi si sire dang mutangkiang si sire tadeau masidada.

⁴ Bou e'e, kenangko ko i L᷊uadateng pamile kowawine ko lebe ikao i ko i L᷊uadateng, dang koako i sie wawu boki kere ghaghanti ngi Ratu Wasti.” Ratu nanarima tatughu e'e dang nupal᷊al᷊eng u e'e.

⁵ Su soa ngu Susan e'e pia singkatau Yahudi arenge i Mordekhai ana i Yair. I sie hintou ngi Kis l᷊au i Simei bou suku ngi Benyamin.

⁶ I Mordekhai seng nitaweng su tempo ngu Yerusalem nikawata i Nebukadnezar, ratu ngu Babel. I Mordekhai niwembang sarang Babel singkahindo dingang i Yoyakin, ratu ngu Yehuda, l᷊au maul᷊i ko nitaweng ko wal᷊inge.

⁷ I sie pia ana u tamahuaringe, singkatau kowawine ko pahesie l᷊au badange masidada, arenge i Ester, dang arenge su wahasa ngu Ibrani i Hadasa. Ghaghurang i Ester seng napul᷊e asal᷊ie dang i sie nakoa kere ana ko niaku ngi Mordekhai dang nipal᷊ihara kere anae tutung.

⁸ Su tempo ngu parenta ngu ratu niwohang, maul᷊i ko mal᷊ahua nikomol᷊i su Susan dang i Ester ene su tal᷊oara i sire. I sie niwawa sarang istana dang nisarakang si Hegai tumbonang u ruma tangga ngu wal᷊e ngi wawu boki.

⁹ I Hegai naherang nakawua si Ester dang mo si sie. Dingang maehong ana mahua e'e nital᷊ungange pakasidada dingang kange ko nihae. I Ester nial᷊ing su bahageang ko kasidadakenge su wal᷊e ngi wawu boki e'e dang pitu ngkatau ko mal᷊ahua ko kapandenge su istana ngu ratu niputangkiang si sie.

¹⁰ Su sasasa i Mordekhai, i Ester ta nuhabari himoneu i sie ko singkatau Yahudi.

¹¹ L᷊ou-l᷊ou i Mordekhai mangkate kal᷊al᷊enge su lilahi tingo ngu wal᷊e ngi wawu boki e'e guna ngu makina kakakoa i Ester dang apa ko sarung mariadi si sie.

¹² Tumuhu atorang, manga kowawine ionggol᷊ang u putatangkiang tadeau pakasidada sintaung l᷊iwuenge: nungu wul᷊ang dingang u l᷊ana nil᷊aukang u kamania, dang nungu wul᷊ang tuhue dingang u l᷊ana ko nil᷊aukang u manga ko mawawungi ko wal᷊inge. Bou e'e, apang ana ko mal᷊ahua e'e mul᷊al᷊ol᷊osi mutumatingo Ratu Ahasyweros.

¹³ Su tempo ngu singkatau ana ko mahua mutumatingo ratu, i sie botonge mupake manga apa tuhu kaoe.

¹⁴ I sie iwawa sarang istana su tempo ngu huwi, dang ndai mal᷊ou i sie iwawa sarang istana ko wal᷊inge, dang iurusi Saasgas, singkatau mapapangkati ko nihae mutal᷊ung manga roka u ratu. Ana ko mahua e'e seng ta sau mutumatingo ratu, kitang ho boko ratu mo dang mukui si sie dingang musigho arenge.

¹⁵ Kuteu nuratingte bageang i Ester guna ngu mutumatingo ratu. – I Ester ko ana i Abihail dang ana u tamahuaringe i Mordekhai ko seng nuhengke si sie kere anae sisane; i Ester nikaherang u apang taumata ko mutuhung si sie. Su tempo ngu i sie natamai nutumatingo ratu, i Ester nul᷊oho l᷊aku nutumuhu tatul᷊ara l᷊au sasasa i Hegai, tumbonang u wal᷊e ngi wawu boki.

¹⁶ Kere'e, su taung kapitunge pamarentahang i Ahasyweros su wul᷊ang kapul᷊onge, e'e ko wul᷊ang Tebet, i Ester niwawa putumatingo ngi Ratu Ahasyweros su istana.

¹⁷ I sie makasanang l᷊au makal᷊uasi naung u ratu lebe bou manga ana ko mahua ko wal᷊inge. Watu'u e'e i sie lebe nikindaghi u ratu. Kuteu u ratu nutaing u makota kararatuang su timbo i Ester dang nukoa si sie wawu boki nungganti si Ratu Wasti.

¹⁸ Bou e'e, ratu nukoa sal᷊iwang ko l᷊abo guna ngu mangadati si Ester dang nunoti kaul᷊i u pagawai dang mapapangkati. I sie namohang l᷊ou pakansi su kaul᷊i u kararatuang dang namahia u paraseng maul᷊i-ul᷊i.

I Mordekhai nangambang sinango ngu ratu

¹⁹ Tintal᷊a e'e i Mordekhai seng nihengke nakoa pagawai ngu kararatuang.

²⁰ I Ester tangkeng nuhabari himoneu i sie ko tau Yahudi, watu'u i Mordekhai nularang si sie. I Ester nutumuhu si Mordekhai kere su tempo ngu i sie mborong ko dio dang nipal᷊ihara ngu ana u tamahuaringe.

²¹ Pia su silou, su tempo ngu i Mordekhai kapuhal᷊ie su istana, pia dua ngkatau mapapangkati u ratu ko nihae, e'e ko i Bigtan l᷊au i Teres, nul᷊ahawu mamate Ratu Ahasyweros, ual᷊ing i sire mabunsing kahingang si sie.

²² Kirou e'e nikatitonang i Mordekhai dang i sie maehong nuhabari e'e si Ester. Ta nundume u tempo, i Ester turusi nuwuke su ratu apa ko nikatitonang i Mordekhai e'e.

²³ Parkara e'e nipariksa, kuteu nal᷊ahe himoneu laporang e'e ko tingari. I sire rua e'e nihukung nighantong. Sintuhu dingang u parenta ngu ratu, hal᷊i e'e niwohe su l᷊al᷊ung u buki wuke ngu kararatuang.