ESTER 1 - BUKI SUSI Wahasa ngu Taghul᷊andang l᷊ou-l᷊ou

Ratu Wasti nundoka parenta ngi Ratu Ahasyweros

^1-2 Su Susan, pusati u wanua ngu Persia, i Ahasyweros namarenta kere ratu. Pia mahasuduampul᷊opitu propinsi su Kararatuang e'e, nanita bou India nurating sarang Sudan.

³ Su taung katilu ngu pamarentahange, i Ratu Ahasyweros nukoa sal᷊iwang ko l᷊abo guna ngu kaul᷊i u mapapangkati l᷊au pagawainge. Manga panglima ngu Persia l᷊au Media nusumongo l᷊ai su sal᷊iwang e'e, kere'e l᷊ai manga gubernur l᷊au manga mapapangkati mararange bou apang propinsi.

⁴ Nungu wul᷊ang l᷊iwuenge ratu nangandaghi kakakala u wal᷊e ngu ratunge l᷊au kal᷊ahamaghi dang kawawantughi u kararatuange.

⁵ Bou e'e ratu sau nukoa sal᷊iwang guna ngu kaul᷊i u kawanua su Susan, maneng ko kala arako l᷊ai ko susa. Sal᷊iwang e'e nikoa singkamisa tiwatu dang nikoa su taman istana.

⁶ Lilahi u istana nil᷊ighahi dingang u hordeng bou heka leneng ko maal᷊usi kulurie ko biru l᷊au ko mawira, niiki u tal᷊i leneng ko maal᷊usi dang nikai su manga wukal᷊a sal᷊aka ko matataing su manga rihi marmar. Su wawae nipilonang u manga l᷊al᷊okang wul᷊aeng l᷊au sal᷊aka su wawo u lante ko nil᷊ighahitang u marmar ko mawira, hablur ko mahamu, pisi ngu puhe ko kukerong l᷊au watu permata ko biru.

⁷ Ratu nanadia anggori maul᷊i-ul᷊i ko isiliwiri su l᷊al᷊ung u manga mangko wul᷊aeng ko mul᷊ahaghi ghahie.

⁸ Anggori nisadia su sake takoae ukurange dang i sire nisihasa panginung. Ratu seng nangonggo u parenta su manga musasiliwiri u istana, tadeau apang sake pakisiliwiri tumuhu kao u simbau-simbau.

⁹ Tintal᷊a e'e i Wasti, wawu boki ngu ratu, l᷊ai nukoa sal᷊iwang guna ngu manga kowawine su l᷊al᷊ung u istana.

¹⁰ Su l᷊ou ko kapitunge, ratu mangkate kainunge sarang nakapundang mal᷊uasi kahingang. Watu'u e'e i sie nukui si sire pitu mapapangkati ko nihae ko nakoa mutatangkiang watangenge; i sire e'e ko i Mehuman, i Bizta, i Harbona, i Bigta, i Abagta, i Zetar l᷊au i Karkas.

¹¹ I sie nangoro si sire pumbawa sarang saruange wawu Boki Wasti dingang u makota ngu kararatuang su timboe. I Wawu Boki ko masidada kahingang, dang ratu mo mangandaghi u kasasidadae su manga tumbonang l᷊au su kaul᷊i u sake'e.

¹² Kateho su tempo ngu manga mutatangkiang e'e nuhabari parenta ngu ratu si wawu Boki Wasti, wawu boki mandi musumongo, hakiu ratu nuwawal᷊uang kahingang.

¹³ Ratu pia narange mundo tughu bou manga mapapande hal᷊i u tita l᷊au adati. Watu'u e'e i sie nukui manga mananughunge ko matitong apa ko mambeng ikoa su l᷊al᷊ung u soali ko kere'e.

¹⁴ Manga mananughu ko kasaunge ikuiang u ratu e'e ko: i Karsena, i Setar, i Admata, i Tarsis, i Meres, i Marsena l᷊au i Memukan. I sire ko manga mapapangkati Persia l᷊au Media ko pia pangkati ko karangetange su kararatuang.

¹⁵ Angkung i ratu si sire pitu ngkatau e'e, “Ia seng nundoi manga mutatangkiangku sarang koa i wawu Boki Wasti tadeau pundoi si sie pasongo sarang koaku. Kateho i sie mandi. Tumuhu tita, hukumang apa ko mambeng koateng i kite si sie?”

¹⁶ Kuteu angkung i Memukan su ratu l᷊au su manga mapapangkati e'e, “Dingang u kakanoa e'e, wal᷊inge kitang ko i L᷊uadateng ko seng nipakamea ngi wawu Boki Wasti, kateho kaul᷊i u pagawai ngi ko i L᷊uadateng, sarang kaul᷊i u kol᷊aese su kararatuang i'i!

¹⁷ Watu'u kakanoa i wawu boki e'e sarung ikatitonang u kaul᷊i u kowawine, dang i sire sarung ta mundaringihi u kawing i sire simbau-simbau. I sire sarung mangul᷊i himoneu ko i L᷊uadateng seng namarenta si wawu Boki Wasti tadeau pupatingo, kateho i wawu boki mandi musumongo.

¹⁸ Inau, boko manga kawing u manga mapapangkati su Persia l᷊au su Media makaringihi hal᷊i e'e, nal᷊ahe i sire sarung maehong muhabari e'e su kawing i sire simbau-simbau. Suenge, kowawine sarung mundoka parenta ngu kawinge dang ko ese sarung muwawal᷊uang kawinge.

¹⁹ Watu'u e'e i kami mukahioro tadeau i ko i L᷊uadateng mangal᷊a putusang himoneu wawu Boki Wasti seng ta botonge sau mutumatingo si ko i L᷊uadateng. Putusang e'e mambeng ikoa atorang u Persia l᷊au Media, tadeau seng ta sau ikasawu. Bou e'e, onggoko kakangianeng i wawu Boki Wasti su kowawine ko wal᷊inge ko lebe mapia bo i sie.

²⁰ Boko putusang i ko i L᷊uadateng e'e seng makeke su kaul᷊i u kararatuang ko mal᷊oahi i'i, apang kowawine sarung mangadati kawinge, maneng ko kala arako l᷊ai ko susa.”

²¹ Tughu ngi Memukan e'e nitarima u ratu l᷊au manga mapapangkati, kuteu ratu apiru nupal᷊al᷊eng u e'e.

²² I sie nundoho ngu parenta su kaul᷊i u propinsi ngu kararatuang, su l᷊al᷊ung u wahasa l᷊au wohe u propinsi e'e simbau-simbau. Parenta e'e tingihie himoneu su l᷊al᷊ung u apang ruma tangga, ko ese mambeng makoa tumbonang, dang ko hinonge mangal᷊a apang putusang.