ESRA 1 - BUKI SUSI Wahasa ngu Taghul᷊andang l᷊ou-l᷊ou

I Koresh nupakawala ngu tau Yahudi napul᷊e sarang wanua ngi sire

¹ Su taung kahimotongange pamarentahang i Koresh, ratu ngu Persia, Mawu nukoa apang ko seng nipuhengetang-E bo i Nabi Yeremia. Mawu nangosa naung i Koresh tadeau pupasuwang simbau parenta ko ibasa su kaul᷊i u kararatuange. Tatahoe kiri'i:

² “Ko i'i parenta ngi Koresh, ratu ngu Persia. Mawu Ruata mangangawasa su sorga seng nukoa si sia ratu su kaul᷊i u dunia, dang nangonggo hal᷊i si sia tadeau pupararisi wal᷊e guna ngi Sie su Yerusalem su bahageang u Yehuda.

³ Mal᷊umbako Mawu Ruata manirung si kumu ko nakoa umati-E. I kumu mambeng kapul᷊e sarang Yerusalem dang pupararisi sau Wal᷊e ngu Mawu Ruata ngu Israel, Mawu Ruata ko natana su Yerusalem.

⁴ Boko pia singkatau bou umati-E su tampa u pundandumekang i'i ko mundo bantuang tadeau makapul᷊e, kuteu manga l᷊ampunge mambeng pangonggo bantuang e'e. I sire mambeng pangonggo si sie sal᷊aka l᷊au wul᷊aeng, sinasa su l᷊al᷊eng l᷊au binatang pul᷊urangeng u wawaneng, dang l᷊ai manga sasumba guna ngu Wal᷊e ngu Mawu su Yerusalem.”

⁵ Mbuhue manga tumbonang u hintou bou suku ngi Yehuda l᷊au i Benyamin, manga imam l᷊au manga tau Lewi, dang apang taumata ko naunge nikanoa u Mawu Ruata, nusasadia guna ngu mapul᷊e sarang Yerusalem dang sau mupararisi Wal᷊e ngu Mawu.

⁶ Kaul᷊i u l᷊ampung i sire l᷊ai nusumbala dang nangonggo u manga barang, kere manga pakakasi sal᷊aka l᷊au wul᷊aeng, sinasa su l᷊al᷊eng, binatang pul᷊urangeng u wawaneng, rarotong ko wal᷊inge dang manga sasumba guna ngu Wal᷊e ngu Mawu.

⁷ I Koresh nupasuwang u manga wohosi l᷊au manga cawang ko horo nipake su l᷊al᷊ung u Wal᷊e ngu Mawu su Yerusalem. Manga barang e'e seng nihengke I Ratu Nebukadnezar dang nipilo su l᷊al᷊ung u kuil u manga dewange sisane.

⁸ I Koresh nanarakang manga barang e'e si Mitredat, tumbonang u mundandeso barang u kararatuang. Mbuhue i Mitredat namohe manga haghi ngu barang e'e guna ngi Sesbazar, gubernur u Yehuda.

^9-10 Ko i'i wohe'e: manga wohosi wul᷊aeng guna ngu upacara sasumba tilumpul᷊o manga wohosi sal᷊aka guna ngu upacara sasumba sihiwu manga wohosi ko wal᷊inge duampul᷊osio manga wohosi ko dadio bou wul᷊aeng tilumpul᷊o manga wohosi ko dadio bou sal᷊aka pauhasumapul᷊o pakakasi ko wal᷊inge sihiwu

¹¹ Kaul᷊ie l᷊imahiwupauhasu wohosi wul᷊aeng l᷊au sal᷊aka l᷊au sal᷊iumpuhi ko wal᷊inge. Kaul᷊ie e'e niwawa i Sesbazar su tempo ngu i sie dang manga taumata ko nirume ko wal᷊inge nuwua bou Babel nakoa sarang Yerusalem.