EFESUS 1 - BUKI SUSI Wahasa ngu Taghul᷊andang l᷊ou-l᷊ou

¹ Umati Mawu Ruata su Efesus, ko masatia si Kristus Yesus!

² Ia, i Paulus, rasuli I Kristus Yesus bou kao-U Mawu Ruata, muharapi tadeau Mawu Ruata Yamang i kite dang Mawu Yesus Kristus munggile al᷊amati dang kapapia si kumu.

Al᷊amati Rohani bo I Kristus

³ Pudalote Mawu Ruata, Yamang Mawu ngi kite Yesus Kristus! I Sie mangal᷊amati si kite dingang u kaul᷊i u al᷊amati Rohani su l᷊al᷊ung u sorga, watu'u i kite nasimbau dingang I Kristus.

⁴ Su horo u dunia i'i niriadi, Mawu Ruata seng namile si kite su l᷊al᷊ung I Kristus dingang u karaki tadeau i kite mariadi koa-E, ko takoae kurange su saruang-E. Watu'u kakindaghi u Mawu Ruata,

⁵ kuteu I Sie seng nanantu lebe horo su l᷊al᷊ung I Yesus Kristus, I Sie sarung nuhengke si kite makoa ana-E sisane. Dang tingari e'e ko mambeng koateng-E.

⁶ Pudalote Mawu Ruata ko mawantughi, watu'u Ahus-E ko ikukindaghi I Sie tumaniu kumindaghi si kite.

⁷ Watu'u bou papateng I Kristus, i kite nipakal᷊iwiri Mawu Ruata, mangal᷊enge I Sie seng nangampung si kite bou apang dosa ngi kite.

⁸ I Sie nukoa e'e watu'u I Sie tumaniu kumindaghi si kite, dang kakindaghi e'e nionggo-E si kite dingang napene kapapilesa dang pangangina.

⁹ Tumuhu kao-E sisane, Mawu Ruata nupakatitong si kite rahasia ngu kirou-E; I Sie seng nanantu u hal᷊i e'e hindo ipakasue'e su l᷊al᷊ung I Kristus.

¹⁰ Kirou e'e ko tadeau kaul᷊i u patiku, maning ko su sorga maning l᷊ai ko su dunia, makoa simbau dingang I Kristus kere timboe. Dang hal᷊i e'e hindo nipakasue u Mawu Ruata boko seng nurating tempoe.

¹¹ Mawu Ruata nukoa kaul᷊i u patiku tumuhu kao-E dang ponesi-E sisane. Bou titae I Sie seng namile si kite watu'u I Sie mo tadeau i kite makoa umati-E watu'u nasimbau dingang I Kristus.

¹² Walate i kite ko kahimotongange muharapi si Kristus mudalo Mawu Ruata ual᷊ing u kawawantughi-E!

¹³ I kumu l᷊ai seng nakoa umati Mawu Ruata su tempo ngi kumu nakaringihi tatanata Mawu Ruata, uare Habari Mapia ko munggile u kasasal᷊amati si kumu. I kumu mangimang si Yesus Kristus, ual᷊ingu e'e Mawu Ruata nunggile tatia si kumu ko koa-E, inau Roh-E ko nipudiandi-E.

¹⁴ Roh e'e l᷊aiki tadeau i kite sarung manarima apa ko seng nipudiandi ngu Mawu Ruata su umati-E. Ii mupangaking si kite himoneu Mawu Ruata l᷊ai mul᷊iwiri umati-E. Pudalote Mawu Ruata ual᷊ing kawawantughi!

Kal᷊iomaneng i Paulus

¹⁵ Watu'u e'e su tempo ngu ia nakaringihi uare i kumu mangimang su Mawu Yesus, dang i kumu nukumindaghi kaul᷊i u umati Mawu Ruata,

¹⁶ ia ta masue mutarimakase su Mawu Ruata ual᷊ing i kumu. Sintinia ia musigho areng i kumu su tempo ngu ia mukal᷊iomaneng.

¹⁷ Ia mukahioro tadeau Mawu Ruata mawu ngi kite Yesus Kristus, Yamang ko mawantughi, munggile u Roh-E si kumu. Roh e'e sarung mukoa si kumu mapilesa, dang sarung mupakal᷊ahe Mawu Ruata si kumu tadeau i kumu makakil᷊al᷊a si Sie.

¹⁸ Ia mukahioro tadeau Mawu Ruata mamuka sipirang i kumu tadeau mariadi masua; tadeau i kumu makahingang apa ko luharapeng bou Mawu Ruata ko mukui si kumu. L᷊au u tadeau i kumu matitong kirapa manga al᷊amati ko mapia ko nisadia-U Mawu Ruata su umati-E;

¹⁹ dang kirapa katoghasi Mawu Ruata nuhal᷊i dingang napene kawasa su l᷊al᷊ung i kite ko mangimang. Kawasang-U Mawu Ruata e'e musul᷊ung kere kawasa ko takoae sihinge

²⁰ ko nipake-E su tempo sau nupuwiahi I Kristus bou papate dang nunggile si Sie tampa karangetange dingang u Mawu Ruata su sorga.

²¹ Tampa I Kristus e'e marau lebe marange bou tampa kaul᷊i u tumbonang, kaul᷊i u mangangawasa, kaul᷊i u pangaha, kaul᷊i u l᷊uadateng dang i sai l᷊ai ko mbuae nionggol᷊ang u tampa marange; maneng ko wiahi orasi i'i maning l᷊ai ko wiahi su tempo ko l᷊ai kasongonge.

²² Mawu Ruata nanarakang u kaul᷊ie su l᷊al᷊ung u kawasang I Kristus, dang nunggile I Kristus su jamaati kere timboe bou kaul᷊i u patiku.

²³ Jamaati e'e ko badang I Kristus, nipakasuku I Sie ko mupakasuku kaul᷊i u patiku su apang tampa.