DANIEL 9 - BUKI SUSI Wahasa ngu Taghul᷊andang l᷊ou-l᷊ou

I Daniel nukal᷊iomaneng guna ngu bangsange

^1-2 Su taung kahimotongange pamarentahang i Darius tau Media, ahusi Ahasyweros su kararatuang u Babel, ia i Daniel, kapubasange manga buki u agama. Ia kasipiri himoneu tumuhu hengetang u Mawu si Nabi Yeremia, soa ngu Yerusalem sarung tatapi kal᷊aopehi pitumpul᷊o su taunge l᷊iwuenge.

³ Bou e'e ia nukal᷊iomaneng kahingang su Mawu Ruata, dang nukahioro kakindaghi-E. Ia l᷊ai nupuasa, dang nupake u wal᷊i karong l᷊au nukumangiang su wawo u awu.

⁴ Apang dosa ngu bangsaku daku niaku su Mawu Ruataku. Ia nangul᷊i, “Mawu Ruata, I Kau ko l᷊abo, dang i kami mangadati si Kau. I Kau sintinia mungganapi pudadiandi-U dang manode kakindaghi-U ko takoae panginsuenge si sire ko mukumindaghi I Kau dang mukoa apang ko niparenta-U.

⁵ I kami seng nubardosa, i kami seng nukoa ko dal᷊ai dang nukoa pusansal᷊a. I kami seng namarontaki dang nul᷊umawang parenta-Ngu l᷊au nul᷊enga bou manga atorang-U.

⁶ I kami ta nundaringihi manga nabi, manga l᷊ang-U e'e, ko seng nudidato su areng-U su manga ratu ngi kami, su manga pangaha, manga i upung dang su kaul᷊i u bangsa ngi kami.

⁷ O Mawu, kakanoa-U sintinia mutatahino dang maadili, arawe i kami sintinia mupasongo ngu mea su watangeng i kami, e'e ko i kami kaul᷊ie ko natana su Yudea dang su Yerusalem dang kaul᷊i u taumata bangsa simbau dingang i kami ko seng nipukaesi-U su manga wanua ko marau l᷊au ko masandighi ual᷊ing i sire ta masatia si Kau.

⁸ Manga ratu ngi kami, manga pangaha l᷊au manga i upung i kami seng nukoa manga hal᷊i ko nakamea dang seng nubardosa si Kau, o Mawu.

⁹ I Kau napene u pangangampung l᷊au kakindaghi, manengwe i kami seng nul᷊umawang si Kau.

¹⁰ I kami ta nundaringihi tingihi-U, o Mawu Ruata ngi kami, su tempo ngu I Kau nundoi si kami puwiahi patuhu manga tita ko seng nionggo-U si kami bou manga nabi, manga l᷊ang-U e'e.

¹¹ Kaul᷊i u Israel seng nul᷊umawang manga tita ngu dang mandi mundaringihi tingihi-U. I kami seng nubardosa si Kau, dang watu'u e'e I Kau nanimbo ngu kutoki si kami ko seng kawawohe su Buki i Musa, l᷊ang-U.

¹² I Kau nukoa ko nuhino kere ko seng nipudiandi Ngu si kami dang su manga mangangawasa ngi kami, Yerusalem seng nihukung-U lebe mabuha bou manga soa ko wal᷊inge su dunia i'i.

¹³ Manga silaka ko kawawohe su l᷊al᷊ung u Tita ngi Musa seng nitimbo-U si kami. Kateho manengwe kere'e, o Mawu Ruata ngi kami, i kami mborong l᷊ai mandi mupakal᷊uasi naung-U. I kami tawe mo manintang u manga dosa ngi kami dang ta l᷊ai mupandung manga tatintiro-U.

¹⁴ I Kau, o Mawu Ruata ngi kami, seng nuhukung si kami dingang u silaka ko seng nisadia-U; kakanoa-U sintinia ko nuhino dang maadili, kateho i kami ta mundaringihi tingihi-U.

¹⁵ O Mawu Ruata ngi kami, I Kau seng nanode u kawasang-U dingang numbawa umati-U nusumuwang bou Mesir, dang kawasang-U e'e mborong tatapi tinaungang. I kami seng nubardosa dang nukoa pusansal᷊a.

¹⁶ I Kau seng nanatawang si kami su tempo horo, watu'u e'e kumbahang l᷊ai muwawal᷊uang su Yerusalem, soa-U sisane, bongkong-U ko susi. Ual᷊ingu dosa ngi kami l᷊au kal᷊al᷊ai u manga i upung i kami, kuteu apang taumata ko ene su sindihang i kami nupakasana u Yerusalem dingang u umati-U.

¹⁷ O Mawu Ruata ngi kami, raringihiko kakal᷊iomaneng l᷊au kakahioroku. Koako sau wal᷊e-U ko seng nirusa e'e, koako sau tadeau kaul᷊i u taumata matitong himoneu ko I Kau Mawu Ruata.

¹⁸ Raringihiko i kami o Mawu Ruata, tuhungeko i kami dang pundungeko singsara ngi kami l᷊au kaghaghoghahi u soa ko nisigho dingang areng-U. I kami mukal᷊iomaneng si Kau wal᷊inge ual᷊ingu manga kapia ngi kami, kateho ual᷊ing I Kau napene u kakindaghi.

¹⁹ Mawu, raringihiko i kami, ampungeko i kami, tuhungeko i kami dang pakaehongko koa! Kumbahang mal᷊ongge, tadeau kaul᷊i u taumata matitong himoneu ko I Kau Mawu Ruata. Watu'u Yerusalem l᷊au umati-U e'e ko koa-U sisane.”

I Gabriel nul᷊ahe u papatehi e'e

²⁰ Ia sintinia kapukal᷊iomanenge dang kapangaku ngu dosaku l᷊au dosa ngu bangsaku Israel, dingang nukahioro su Mawu Ruataku tadeau sau pukoa wal᷊e-Nge ko susi.

²¹ Tintal᷊a ia kapukal᷊iomanenge, I Gabriel ko seng daku nikawua su l᷊al᷊ung u kawawuaku ko horo e'e, nutumila sarang koaku. Orasi e'e ko tempo ngu taumata manumba ngu korbang wawul᷊aeng.

²² Bou e'e i Gabriel nul᷊ahe kiri'i, “Daniel, ia nusumongo guna ngu mutul᷊ung si kau tadeau makahingang papatehi e'e.

²³ Su tempo ngu i kau nanita nukahioro su Mawu Ruata, I Sie nangonggo u sasimbahie. Ia nusumongo muhabari e'e watu'u I Sie mukumindaghi i kau. Ho, raringihiko pakapia tintal᷊a ia mul᷊ahe u mangal᷊eng u kawawua e'e.

²⁴ Paka pitu taha pitumpul᷊o su taunge e'e tempo ko seng nitantu u Mawu Ruata guna ngu mul᷊iwiri bangsa ngu l᷊au soa ngu ko susi e'e bou dosa l᷊au kal᷊al᷊ai. Apang dosa sarung iampungang dang kal᷊aadili ko kakal sarung ipakatei, hakiu kawawua l᷊au papatehi e'e sarung makoa kal᷊al᷊ahe, dang Wal᷊e ngu Mawu ko susi e'e sarung ipake sau guna ngu Mawu.

²⁵ Woheko dang panginako i'i: Pakapitu taha pitu taung sarung mal᷊iu, manita bou tempo ngu nipasuwang parenta guna ngu sau mamangung Yerusalem, murating sarang sasongo ngu singkatau pangaha ko nipile ngu Mawu Ruata. Salama ngu pakapitu taha nungupul᷊odua su taunge manga l᷊al᷊eng l᷊au manga pagari u Yerusalem sarung sau ikoa, kateho tempo e'e napene u kasasusa.

²⁶ Su panginsueng u tempo e'e pangaha ko nipile ngu Mawu Ruata e'e sarung ipate, sumbal᷊i i sie ta nunsal᷊a. Kuteu sordado ngu singkatau ratu ko matoghasi nusumongo, bou e'e nundusa soa ngu Yerusalem l᷊au Wal᷊e ngu Mawu. Tempo panginsuenge e'e sarung sumongo kere l᷊uwa ko mumbawa parang l᷊au kawawinasa, kere ko seng nitantu u Mawu Ruata.

²⁷ Ratu e'e sarung mukoa pudadiandi ko matoghasi dingang u taumata ko maul᷊i pitu taung l᷊iwuenge. Su tal᷊oara u tempo e'e, i sie sarung mupangiro ngu mumbawa korbang l᷊au sasumba. Mbuhue simbau ko makatataku ko nisigho Kal᷊al᷊ai ko mupakawinasa sarung ipilo su Wal᷊e ngu Mawu dang sarung tatapi ene su se'e sarang i sie ko namilo e'e su se'e ikahinong u kawawinasa ko seng nitantu u Mawu Ruata si sie.”