DANIEL 8 - BUKI SUSI Wahasa ngu Taghul᷊andang l᷊ou-l᷊ou

Ko nikawua ngi Daniel hal᷊i u domba ko ese l᷊au kambing ko ese

¹ Su taung katilunge pamarentahang Ratu Belsyazar, ia nakahombang kawawua karuange.

² Su kawawua e'e daku nikahombang watangengku ene su propinsi Elam, su Susan, pusati u soa ngu Persia. Ia kararisi masandighi u Sal᷊uhi Ulai,

³ dang su wiwihi u sal᷊uhi e'e nikawua domba ko ese simbau ko pia sasungenge darua ko manandu, simbau lebe manandu dang lebe ko wuhu bou ko wal᷊inge.

⁴ Daku nikawua domba ko ese e'e nanunge sarang tingo ngu wahe, sawunahi l᷊au timuhi. Takoae sarang simbau binatang ko makatahang mutumatingo si sie arako mal᷊iwiri bou kawasange. Binatang e'e nukoa numbatu kaoe dang naoboti.

⁵ Tintal᷊a ia kaputuhunge, nikawua pia kambing ko ese simbau katal᷊ange bou simbuka ngu wahe nul᷊umiu dunia. Kere'e kasahawue i sie nutumal᷊ang hakiu l᷊aeri ta nakatoto tana. Su tal᷊oara u matange darua pia sasunge simbau ko makal᷊aherang.

⁶ Kambing ko ese e'e nusumandighi domba ko ese ko daku nikawua su wiwihi u sal᷊uhi e'e, bou e'e nitumbounge dingang u kawahaninge.

⁷ Daku nituhungang i sie kapanumbounge domba ko ese e'e. I sie kere'e kawahaninge hakiu nanunge domba ko ese e'e dang namare sasungenge darua. Domba ko ese e'e ta nakakoa manga apa guna ngu mundoka. I sie nawahung su tana dang nil᷊al᷊indange, dang takoae sarang singkatau ko botonge mutul᷊ung si sie.

⁸ Kambing ko ese e'e kal᷊al᷊aboe. Kateho su tempo ngu i sie nurating u pusu u kawasange, sasungenge ko l᷊abo e'e nabare, bou e'e su tampa e'e nutumuwo sasunge pa ko makal᷊aherang, simbau-simbau manibo sarang bahageang ko mutatintang.

⁹ Bou simbau sasunge e'e nutumuwo sasunge ko dio, ko nakoa ko l᷊abo kahingang dang kawasange nal᷊abo sarang bahageang u timuhi, sarang bahageang u raki dang sarang bahageang u tana ko masidada.

¹⁰ Sasunge e'e nakoa lebe l᷊abo sarang botonge toghasi guna ngu mangalo sordado ngu sorga e'e ko manga wituing, katewe pira mbau niwahunge sarang tana dang nil᷊al᷊indange.

¹¹ Katewe i sie nundoka panglima sordado ngu sorga, nupangiro ngu korbang sasumba l᷊ou-l᷊ou ko nisumba su panglima e'e, dang nul᷊engge wal᷊e ngu pukakal᷊iomanengang si sie.

¹² Bou e'e manga taumata pai se'e nanita nubardosa dang seng ta nanumba ngu manga korbang ko seng nitantu. Kuteu nggaweti ko nuhino seng ta nikoa. Sasunge e'e nakauntung su l᷊al᷊ung u apang kakanoae.

¹³ Mbuhue daku nikaringihi singkatau malaikati nangul᷊i su ko wal᷊inge, “Sarang pira ngkatempo kaul᷊i u ko nikawua su l᷊al᷊ung u kawawua e'e sarung mariadi? Sarang kangereng dosa ko l᷊abo e'e mungganti korbang l᷊ou-l᷊ou?” Sarang kangereng sordado ngu sorga l᷊au wal᷊e ngu pukakal᷊iomanengang e'e il᷊al᷊indang?

¹⁴ Daku nikaringihi malaikati simbau l᷊ai nusumimbahi, “Sarang sihiwumahasul᷊imampul᷊o su l᷊ounge l᷊ai. Su kanandu e'e korbang wawul᷊aeng l᷊au korbang mal᷊ukari ta nionggo. Bou e'e mbuhue wal᷊e pukakal᷊iomanengang sarung sau ikoateng pakapia.”

Malaikati Gabriel nul᷊ahe mangal᷊eng u kawawua e'e

¹⁵ Su tempo ngu ia kaputawakal᷊inge mangina mangal᷊eng u kawawua e'e, singkahuwiu pia kere taumata kararisi su tingoku.

¹⁶ Daku nikaringihi tingihi ko kanggonge su simbuka ngu Sal᷊uhi Ulai, angkunge, “Gabriel, pakal᷊aheko si sie kawawuange e'e.”

¹⁷ Bou e'e i Gabriel ko kararisi su tingoku e'e nusumandighi si sia. Ia nataku kahingang, hakiu ia nabanting. Angkung i Gabriel si sia, “Ei taumata, i kau katitong, himoneu kawawua e'e ko hal᷊i u panginsueng u dunia.”

¹⁸ Tintal᷊a i sie kapudidatonge, ia napinsang. Kateho i sie nuhinggo si sia dang nutul᷊ung si sia sau pararisi. Bou e'e i sie nangul᷊i,

¹⁹ “Ia sarung mangul᷊i si kau apa ko sarung mariadi kere sueng u wawal᷊uang u Mawu Ruata. Watu'u kawawua ngu e'e manibo su panginsueng u dunia.

²⁰ Domba ko ese ko nikawuau e'e, ko pia sasungenge darua, mul᷊ul᷊ahe u kararatuang Media l᷊au Persia.

²¹ Kambing ko ese e'e mul᷊ahe u kararatuang u Yunani, dang sasunge ko makal᷊aherang su tal᷊oara u matange darua e'e ko ratunge kahimotongange.

²² Sasunge pa ko nutumuwo suapang sasunge kahimotongange e'e nabare, mangal᷊enge himoneu kararatuang u Yunani sarung mapahia makoa kararatuang pa, kateho maneng simbau sarung ta makasul᷊ung toghasi u kararatuang ko kahimotongange e'e.

²³ Masandighi tempo ngu manga kararatuang e'e masue, boko kal᷊al᷊ai seng mapal᷊iu, kuteu sarung musumongo ratu simbau ko mahasa dang ko pande mangakal᷊i.

²⁴ I sie sarung makoa ko matoghasi kahingang, kateho wal᷊inge ual᷊ingu katatoghasie sisane. I sie sarung mupasongo ngu kawawinasa ko makatataku dang apang ko ikoae mariadi. I sie sarung mupakawinasa manga taumata ko wawahani l᷊au umati Mawu Ruata.

²⁵ Ual᷊ing i sie taumata ko mal᷊ana, manga pul᷊al᷊ingae sarung mariadi. I sie sarung mangoboti u watangenge, dang dingang ta nangul᷊i horo i sie sarung mupakawinasa ngu taumata maul᷊i. Sarang i sie wahani mundoka Ratu Ko Kal᷊abokange. Kateho i sie sarung ipakaghaghoro wal᷊inge dingang u katatoghasi u taumata.

²⁶ Kawawua hal᷊i u korbang wawul᷊aeng l᷊au mal᷊ukari ko seng nil᷊ahe si kau e'e, tinga-tingari sarung mariadi. Kateho kaul᷊i u e'e sarung mariadi su tempo karintange ko mborong marau; inau kumbahang muwuke si sai-sai.”

²⁷ Mbuhue ia nakapundang nal᷊ome bou e'e nasaki pira l᷊ou. Suapang bou e'e ia nuwangung dang sau nukoa manga hal᷊iku guna ngu ratu. Kateho ia nibalisange nusipiri u manga kawawua e'e dang ta nakahingang mangal᷊enge.