DANIEL 6 - BUKI SUSI Wahasa ngu Taghul᷊andang l᷊ou-l᷊ou

I Daniel nipasu su l᷊iang u singa

¹ Suapang i Belsyazar nikapate, i Darius tau Media nangaho kadera ngu kararatuang. Su tempo e'e umurie nungupul᷊odua su taunge.

² I Darius namahia kararatuange nakoa mahasuduampul᷊o propinsi ko simbau-simbau niparenta ngu singkatau gubernur.

³ I Daniel dingang u ringange dua ngkatau nihengke'e guna ngu putuhung manga gubernur e'e tadeau ratu kumbahang ipakarugi.

⁴ Maehong nal᷊ahe himoneu hal᷊i i Daniel lebe mapia bou hal᷊i u manga gubernur l᷊au mutatuhung ko wal᷊inge. Ual᷊ingu e'e, ratu mo muhengke si sie makoa mangangawasa su kal᷊abo u kararatuang.

⁵ Kateho manga gubernur l᷊au mutatuhung e'e nutawakal᷊i nundea manga pusansal᷊a ngi Daniel su l᷊al᷊ung u hal᷊i u pamarentahang, kateho i sire ta nakarea, ual᷊ing i Daniel ko masatia l᷊au matul᷊iri dang takoae kindul᷊enge arako takoae pusansal᷊a manga apa.

⁶ Bou e'e i sire nangul᷊i, “I kite kitang makahombang pusansal᷊a ngi Daniel su l᷊al᷊ung u hal᷊i ko pia kaie dingang u agamae.”

⁷ Bou e'e i sire natamai singkahindo nutumatingo ratu dang nangul᷊i, “O Tuangku Ratu Darius, kaumuri i Tuangku sarang kal᷊iwuenge!

⁸ I kami kaul᷊ie ko mangangurusi kararatuang i Tuangku, maneng manga mutatuhung, manga gubernur, manga wakili u gubernur l᷊au mapapangkati ko wal᷊inge, seng nusingkanaung guna ngu mundo kere wotonge i Tuangku mupasuwang surati u parenta ko mambeng ituhukang kahingang-hingang. Kere wotonge i Tuangku mamarenta tadeau su kanandu tilumpul᷊o su l᷊ounge takoae sarang singkatau ipakawala muhabari kakahioro su singkatau dewa arako taumata, su l᷊ikuri kitang si Tuangku sisane. I sai-sai ko mul᷊umawang parenta e'e sarung iwahung su l᷊al᷊ung u l᷊iang u singa.

⁹ I kami mukahioro tadeau i Tuangku manekeng surati u parenta e'e tadeau makoa undang-undang u Media l᷊au Persia ko seng ta sau ikasawu.”

¹⁰ Kuteu Ratu Darius nanekeng surati u parenta e'e.

¹¹ Suapang i Daniel nakaringihi hal᷊i e'e, i sie napul᷊e sarang wal᷊enge. Kamari ko dasi su wawoe pia manga janelae ko nutumatingo sarang Yerusalem. Dang kere narange, i sie mukal᷊iomaneng su Mawu Ruatange dang mundalo si Sie pakatilu silou dingang musuba su tingo ngu manga janela ko kawawuka e'e.

¹² Suapang manga roka i Daniel nakawua si Daniel kapukal᷊iomanenge su Mawu Ruatange,

¹³ i sire kaul᷊ie natamai nutumatingo ratu guna ngu mangalaki i Daniel. I sire nangul᷊i, “Wal᷊ingewe i Tuangku seng nanekeng surati u parenta ko managakang kaul᷊i u taumata su kanandu tilumpul᷊o su l᷊ounge i'i muhabari kakahioro su singkatau dewa arako taumata su l᷊ikuri kitang si Tuangku? Dang l᷊ai, i sai-sai ko mul᷊umawang parenta e'e sarung iwahung su l᷊iang u singa?” Ratu nusumimbahi, “Tingari, dang parenta e'e nakoa atorang ngu Media l᷊au Persia ko seng ta sau ikasawu.”

¹⁴ Bou e'e angkung i sire su ratu, “I Daniel, singkatau bou tal᷊oara i sire ko nirume bou Yehuda, ta nubardekeng si Tuangku dang nupakasana u parenta ngi Tuangku. I sie mukal᷊iomaneng masihurupi taha pakatilu silou.”

¹⁵ Nakaringihi e'e ratu nasusa naunge dang naghagha, hakiu i sie nundea akal᷊i guna ngu mangambang si Daniel. Sarang wawul᷊aeng ratu mang mborong kapusipiri.

¹⁶ Bou e'e manga taumata e'e sau nusul᷊e nutumatingo ratu dang nangul᷊i, “Tuangku, kere wotonge i Tuangku putinaung himoneu tumuhu atorang u Media l᷊au Persia, parenta ko seng nipasuwang u ratu seng ta ikawal᷊u.”

¹⁷ Kuteu samuringe ratu nuparenta tadeau i Daniel pakisame dang pakiwahung su l᷊iang u singa. Angkung u ratu si Daniel, “Mal᷊umbako Mawu Ruata ngu ko nisumba ngu dingang masatia e'e mangambang si kau.”

¹⁸ Bou e'e watu simbau nipilo su mohong u l᷊iang e'e, dang ratu nucapi watu e'e dingang u capi u kararatuang l᷊au capi u manga mapapangkati, hakiu takoae sarang singkatau ko botonge makaambang si Daniel bou manga singa e'e.

¹⁹ Bou e'e ratu napul᷊e sarang istana. I sie mandi mukumang arako hiborang. Dang sihuwi e'e i sie ta nakatatiki.

²⁰ Kalonge ratu nuwangung dang natamai masahawu-sahawu sarang l᷊iang u singa.

²¹ Nurating u pai e'e, i sie nukui dingang u tingihi ko maghagha, “Daniel, l᷊ang u Mawu Ruata ko wiahi! Apa Mawu Ruatangu ko nisumba ngu dingang masatia e'e seng nakaambang si kau bou manga singa e'e?”

²² Bou e'e nikaringihi tingihi Daniel ko nusumimbahi, “Kaumuri i Tuangku sarang kal᷊iwuenge!

²³ Mawu Ruata ngu l᷊ang seng nundoi u malaikati-E nupakaghuming mohong u manga singa e'e hakiu i sire ta nukoa manga apa su l᷊ang. Mawu Ruata nangambang l᷊ang watu'u I Sie matitong himoneu l᷊ang ta nukoa pusansal᷊a si Sie dang si Tuangku.”

²⁴ Wal᷊inge gampang kal᷊uasi naung u ratu dang i sie namarenta tadeau i Daniel pakisuwang bou l᷊iang e'e. Suapang parenta e'e nihal᷊ikang, nal᷊ahe himoneu takoae sarang singkodo l᷊esi su badang i Daniel, ual᷊ing i sie mangimang su Mawu Ruatange.

²⁵ Mbuhue ratu namarenta taumata tadeau paname manga taumata ko nangalaki i Daniel. Bou e'e i sire singkahindo dingang u manga ana l᷊au manga kawing i sire niwahung su l᷊iang u singa e'e. Mborong tangkeng nurating u wal᷊ang u l᷊iang e'e, manga singa seng nanumbou si sire dang nunggaghoro manga duhi ngi sire.

²⁶ Bou e'e Ratu Darius nundoho ngu surati su manga taumata su apang bangsa, suku bangsa, l᷊au wahasa su kal᷊abo u dunia, “Adati kal᷊al᷊uasi!

²⁷ Ia muparenta su kaul᷊i u taumata ko ene su bahageang u kararatuangku tadeau kataku dang pangadati su Mawu Ruata ko nisumba ngi Daniel! I Sie Mawu Ruata ko wiahi sarang kal᷊iwuenge, sarang kal᷊iwuenge I Sie mamarenta. Kararatuang-E tawe waharia mawinasa. Kawasang-E takoae panginsuenge.

²⁸ I Sie mupakasal᷊amati dang mul᷊iwiri, mukoa tatia ko makal᷊aherang dang ko ajaipi su l᷊angi dang l᷊ai su dunia. I Daniel seng nipakasal᷊amati-E, bou pananumbou manga singa.”

²⁹ Ko kere'e i Daniel tatapi pia kawasange ko marange su kanandu u pamarentahang i Darius l᷊au pamarentahang i Koresh, tau Persia e'e.