DANIEL 5 - BUKI SUSI Wahasa ngu Taghul᷊andang l᷊ou-l᷊ou

Ratu Belsyazar ahusi Nebukadnezar nukoa sal᷊iwang

¹ Pia su silou Ratu Belsyazar nunoti sihiwu su kataunge mapapangkati tadeau pasongo su sal᷊iwange ko l᷊abo dang manginung anggori.

² Tintal᷊a i sire kapanginunge, i Belsyazar namarenta tadeau pakipangal᷊a manga wohosi wul᷊aeng l᷊au sal᷊aka, ko seng nihampasi Nebukadnezar, i papange bou l᷊al᷊ung u Wal᷊e ngu Mawu su Yerusalem. Pandung u Ratu Belsyazar e'e ko tadeau manga mapapangkati, manga kawinge, manga dokae l᷊au i sie sisane, manginung bou manga wohosi e'e.

³ Dingang masahawu manga wohosi e'e niwawa sarang koae, bou e'e i sire kaul᷊ie nanginung anggori bou manga pakakasi u inung e'e.

⁴ Apiru kainunge i sire nundalo-dalo manga dewa ko nikoa bou wul᷊aeng, sal᷊aka, witu, kau l᷊au watu.

⁵ Singkahuwiu nikawua pia l᷊ima ngu taumata kapamohe'e manga apa su rarinding u wal᷊e ngu ratu istana su tampa ko kasuange ko nikahino ngu sinang u sol᷊o, hakiu ratu nakawua e'e mal᷊ahe.

⁶ I sie nawilosi dang nataku kahingang hakiu kakendenge wukunge.

⁷ Dingang kakihae i sie nundo tadeau pakikuie manga tahawawua, tahahopa, l᷊au mapapande ngu wituing. Suapang i sire nasongo, ratu nangul᷊i, “I sai-sai ko botonge makabasa wohe e'e, dang muhabari mangal᷊enge si sia, sarung daku onggol᷊ang u pakeang u kararatuang kere juba ko bung l᷊au hante wul᷊aeng tatia ngu l᷊aadati. Su l᷊ikuri e'e i sie sarung daku ihengke makoa mangangawasa ko katilunge su l᷊al᷊ung u kararatuangku.”

⁸ Apang mapapande nuhumaung, kateho takoae sarang singkatau bo i sire ko botonge nakabasa wohe e'e arako nuhabari mangal᷊enge su ratu.

⁹ Ratu Belsyazar nanamba naghagha dang sau nawilosi; l᷊ai manga mapapangkati nubingo kahingang.

¹⁰ Nakaringihi manga kiha u ratu l᷊au manga mapapangkati, i mama ngu ratu nusumu sarang tampa u sal᷊iwang. Bou e'e i sie nangul᷊i, “Kaumuri i Tuangku sarang kal᷊iwuenge! Pakatatapi naung i Tuangku dang kumbahang mawilosi.

¹¹ Watu'u su kararatuang i Tuangku pia singkatau ko ese ko nikasukang u roh u manga dewa ko susi. Su tempo ngu pamarentahang i papa ngi Tuangku, tau e'e nal᷊ahe pia kapapande, pangangina, l᷊au kapapilesa, ko kere kapapilesa ngu manga dewa. I papa ngi Tuangku Ratu Nebukadnezar seng nuhengke si sie nakoa pangaha u manga tahawawua, tahahopa, manga taumata ko pia titonge dang mapapande ngu wituing.

¹² I sie wal᷊inge gampang kapandenge l᷊au kapilesange dingang ko pande su l᷊al᷊ung u mul᷊ahe u ipi, mamuka rahasia dang musipiri manga hal᷊i ko mababuha. Arenge i Daniel, kateho ratu nusigho si sie i Beltsazar. Kuieko i sie. I sie sarung muhabari si Tuangku apa mangal᷊enge wohe i'i.”

I Daniel nul᷊ahe mangal᷊eng u wohe e'e

¹³ Dingang masahawu i Daniel niwawa nutumatingo ratu. Bou e'e ratu nakina si sie, “I kau i Daniel, tau Yahudi nirume, ko niwawa i papaku bou tana Yehuda?

¹⁴ Nikaringihiku uare i kau nisongong u manga roh u dewa ko susi, dang uare i kau pia kapapande, pangangina dingang u kapapilesa ko takoae sihinge.

¹⁵ I sire ko mapapande l᷊au manga tahahopa seng nanuka nubasa wohe i'i dang muhabari mangal᷊enge. Kateho i sire ta nakakoa.

¹⁶ Mbuhue daku nikaringihi uare i kau botonge mamuka haghi ngu rahasia dang makasipiri tatika u manga soali ko mababuha. Boko i kau makabasa wohe i'i dang muhabari mangal᷊enge si sia, i kau sarung daku onggol᷊ang u pakeang kararatuang kere juba ko bung l᷊au hante wul᷊aeng tatia ngu l᷊aadati. Su l᷊ikuri e'e i kau sarung daku ihengke makoa mangangawasa katilunge su l᷊al᷊ung u kararatuangku.”

¹⁷ I Daniel nusumimbahi, “I Tuangku tawahal᷊uasi mangonggo manga paraseng e'e si sia, onggote su taumata ko wal᷊inge. Ia sarung mubasa wohe e'e guna ngi Tuangku dang muhabari mangal᷊enge.

¹⁸ Mawu Ruata Ko Karangetange nukoa si Nebukadnezar, i papa ngi Tuangku nakoa ratu ko mawantughi dang nangonggo si sie kal᷊al᷊abo l᷊au katateleng.

¹⁹ I sie kere'e kal᷊aboe, hakiu manga taumata bou apang bangsa, suku bangsa, l᷊au wahasa, naghagha dang mataku si sie. Boko i sie mo mamate taumata, apiru ipatenge taumata e'e. Boko i sie mo mangambang pusingkatau, iambangenge taumata e'e. I sie mupakarange arako mupakasana si sai-sai tumuhu kaoe.

²⁰ Kateho suapang i sie nakoa ko maoboti, makul᷊i dang matingkai, i sie nipakanawo bou kadera kararatuange hakiu i sie nikailangeng u kawawantughi.

²¹ I sie nitokol᷊i bou ana u kawanua ngu taumata dang sipirange nakoa kere sipirang u binatang. I sie nuwiahi dingang u keledai ngu ngudae, nukumang rindulu kere sapi, dang natiki su peleng hakiu naunsa u namuhi. Samuringe i sie nangaku himoneu Mawu Ruata Ko Karangetange mukawasa su kararatuang u taumata dang kararatuang e'e nionggo-E si sai-sai ko nipile-E.

²² Kateho ahusie, e'e ko i Tuangku sisane, mandi mutingkasana u watangeng, manengwe i Tuangku matitong kaul᷊i u e'e.

²³ I Tuangku nupakarange u watangeng su saruang u Mawu su sorga dang wahani nundoi pumbawa pasu manga wohosi ko seng nihampasi bou Wal᷊e ngu Mawu. Bou e'e i Tuangku dingang u manga mapapangkati, manga kawing l᷊au manga doka i Tuangku nanginung bou manga wohosi e'e. I Tuangku nundalo-dalo manga dewa ko nikoa bou wul᷊aeng, sal᷊aka, witu, uase, kau, l᷊au watu, manga dewa ko ta makawua l᷊au ta makaringihi manga apa. I Tuangku ta nangadati Mawu Ruata ko manantu puwawahi l᷊au papate ngi Tuangku dang manatapi l᷊al᷊al᷊engang u puwawiahi Tuangku.

²⁴ E'e sabapie Mawu Ruata nundoho ngu l᷊ima e'e tadeau pamohe tatanata-E.

²⁵ Ko i'i wohe e'e, ‘Nirekeng, nirekeng, nitimbang, nipahia.’

²⁶ Dang ko i'i mangal᷊enge: Nirekeng, tempo ngu pamarentahang i Tuangku seng nirekeng u Mawu Ruata dang nikinsue-E;

²⁷ nitimbang, i Tuangku seng nitimbang dang nikahombangeng ta nakal᷊uasi naung;

²⁸ nipahia, kararatuang i Tuangku nipahia dang nionggo su tau Media l᷊au Persia.”

²⁹ Dingang masahawu i Belsyazar namarenta manga pagawainge tadeau pul᷊oho juba ko bung si Daniel dang pul᷊oho hante wul᷊aeng su l᷊ehie. Bou e'e i sie nuhengke si Daniel nakoa mangangawasa katilunge su l᷊al᷊ung u kararatuange.

³⁰ Su huwi e'e l᷊ai i Belsyazar ratu ngu Babel e'e nikapate.