DANIEL 11 - BUKI SUSI Wahasa ngu Taghul᷊andang l᷊ou-l᷊ou

¹ I sie niroi pusumbala dang panatawang si sia su taung kahimotongange pamarentahang i Darius tau Media e'e.

² Dang apa ko sarung daku iul᷊i si kau e'e ko tingari.” Malaikati e'e nangul᷊i, “Pia ratu tatilu ko wal᷊inge sarung mamarenta Persia, ituhukang u ratu kapae ko sarung lebe marotong bou ko wal᷊inge. Su kararange u kawasange l᷊au kakakalae, i sie sarung mundoka katatoghasi u kararatuang u Yunani.

Kararatuang u Mesir l᷊au Kararatuang u Siria

³ Bou e'e sarung mul᷊umitou singkatau ratu ko wahani. I sie sarung mamarenta kararatuang ko l᷊abo kahingang dang sarung mukoa tumuhu kaoe.

⁴ Kateho su pusu u kal᷊ahamaghi, kararatuange sarung mahose dang mapahia pa. Manga ratu ko wal᷊inge hintounge sarung mamarenta mundol᷊osi si sie, dang katatoghasi sire sarung ta makasul᷊ung katatoghasie.

⁵ Ratu wanuangu timuhi sarung matoghasi. Kateho singkatau bou manga panglimae sarung makoa lebe matoghasi bo i sie, dang i sie sarung mamarenta kararatuang ko lebe l᷊abo l᷊ai.

⁶ Pira taung bou e'e ratu wanua ngu timuhi sarung mukoa pukakauhi dingang u ratu wanua ngu sawunahi dang mupukawing ahusie kowawine dingang u ratu wanua ngu sawunahi e'e. Kateho pukakauhi e'e ta nataeri, ana u ratu kowawine e'e sarung ipate, kere'e l᷊ai kawing l᷊au anae dingang u manga l᷊ang ko seng nangunturi si sie.

⁷ Ta nal᷊iwue bou e'e, singkatau bou ghe u ahusi u ratu kowawine e'e sarung makoa ratu. I sie sarung mangalo sordado ngu ratu wanua ngu sawunahi, mangalo tatindae dang mupakawata.

⁸ Su tempo ngu i sie musul᷊e sarang Mesir, i sie sarung mumbawa patong u dewa ngu rokae l᷊au pakakasi wul᷊aeng dingang u sal᷊aka ko seng nisumba su dewa e'e. Pira taung l᷊iwuenge i sie sarung ta muparang su ratu wanua ngu sawunahi.

⁹ Mbuhue ratu wanua ngu sawunahi sarung mangalo wanua ngu timuhi, kateho i sie sarung ipahangeng pasoho dang pakapul᷊e sarang wanuange sisane.

¹⁰ Bou e'e manga ahusi u ratu wanua ngu sawunahi sarung musasadia guna ngu muparang dang mukoa komol᷊ang u sordado ko l᷊abo. Singkatau bo i sire e'e sarung mangansing mangalo kere l᷊uwa. Su pangangalo karuange i sie nangalo tatinda u roka.

¹¹ Kuteu ratu wanua ngu timuhi nuwawal᷊uang, dang i sie mangansing sarang tampa u parang mundoka ratu wanua ngu sawunahi. I sie sarung makauntung mamata sordado ko l᷊abo ko nikanoa u ratu wanua ngu sawunahi.

¹² Bou e'e i sie sarung mul᷊umiaghi ual᷊ingu kal᷊auntunge dang ual᷊ingu seng nakapate roka ko maul᷊i, kateho i sie sarung ta mukawasa turusi.

¹³ Su karuange ratu wanua ngu sawunahi sarung mukoa pasukang ko l᷊abo, katewe lebe l᷊abo bou kahimotongange. Boko temponge seng murating, i sie sarung mukumanoa mangansing dingang u sordado ko l᷊abo dingang u aghiri ko maul᷊i kahingang.

¹⁴ Kuteu maul᷊i taumata sarung mamarontaki su ratu wanua ngu timuhi. Dang pirangkatau taumata ko matatingkai bou bangsangu, Daniel, sarung mamarontaki l᷊ai ual᷊ing i sire seng nakawua simbau kawawua. Kateho i sire sarung ta makauntung.

¹⁵ Mbuhue ratu wanua ngu sawunahi sarung mul᷊iwung soa ko pia tatindae simbau dang mangaho soa e'e. Sordado wanua ngu timuhi sarung ta makataeri, dang manga pasukang ko nipilenge l᷊ai mang sarung ta makaroka.

¹⁶ Ratu wanua ngu sawunahi sarung mukoa mutumuhu kaoe dingang takoae puraroka maneng kitang singkodo. I sie sarung mukumangiang su tana ko masidada dang mangawasa kal᷊aboe e'e.

¹⁷ Mbuhue ratu wanua ngu sawunahi sarung manadia sordadonge guna ngu mangalo wanua ngu timuhi. Bou e'e dingang u pandung mangawasa kal᷊abo u kararatuang u rokae, i sie sarung mukoa pukakire dingange, dang mupukawing ahusie kowawine dingang u ratu ngu Mesir e'e; kateho kirounge e'e sarung ta mariadi.

¹⁸ Bou e'e i sie sarung mangalo manga bangsa su wiwihi u l᷊auri, dang maul᷊i ko ikawatae. Kateho singkatau pangaha wanua ngu raghi sarung mupangiro ngu l᷊ahinakang ko nikoae e'e, katewe sarung mamal᷊isi l᷊ahinakang e'e si sie.

¹⁹ Ratu wanua ngu sawunahi e'e sarung musul᷊e sarang wanuange sisane ko pia tatindae, kateho i sie sarung ikawata dang seng takoae habari l᷊ai bou hal᷊i i sie.

²⁰ I sie sarung il᷊ol᷊osang u singkatau ratu ko sarung mundoi pagawainge ko matingkai guna ngu pangomol᷊i balasteng dingang u sasihasa tadeau panamba kakakala u kararatuange. Ta mal᷊iwue bou e'e ratu e'e sarung ipate, wal᷊inge su suange dang wal᷊inge l᷊ai su l᷊al᷊ung u parang.”

Ratu wanua ngu sawunahi ko dal᷊ai

²¹ Malaikati e'e sau nangul᷊i, “Ratu tuhue ko mamarenta wanua ngu sawunahi e'e singkatau ko hina ko takoae hakie makoa ratu. Kateho i sie sarung musumongo dingang ta nikatitonang dang mangaho kakangianeng u ratu dingang u akal᷊i ko dal᷊ai.

²² Apang sordado ko mundoka si sie, sarang Imam Ko L᷊abo l᷊ai sarung ipakasue'e.

²³ I sie musingking u manga pudadiandi ko wuhu nikoae dingang u manga bangsa ko wal᷊inge. Dang i sie sarung natamba katatoghasie, manengwe i sie kitang kapamarentange negara ko dio.

²⁴ Dingang u akal᷊i ko mal᷊ana i sie sarung mangalo manga tampa ko matatawa su tempo ngu taumatange makapundang mapia su se'e. I sie sarung mukoa apang ko tangkeng nikoa u manga i upunge. Bou e'e i sie sarung mamahia su manga tumatuhue apang barang ko nihampasi l᷊au kakakala ko nikareae bou l᷊al᷊ung u parang. I sie sarung mukoa akal᷊i ko dal᷊ai guna ngu mangalo manga tampa ko pia tatindae, kateho temponge seng maehong masue.

²⁵ Mbuhue dingang wahani i sie sarung munggopol᷊i sordado ko l᷊abo guna ngu mangalo ratu wanua ngu timuhi ko seng kapusasadiange l᷊ai guna ngu mundoka si sie dingang u sordado ko matoghasi dang ko l᷊abo kahingang. Kateho ratu wanua ngu timuhi sarung ta makatahang ual᷊ing i sie sarung ikaakal᷊eng.

²⁶ Manga mananughunge ko kasandighange dingange sarung mupakanawo i sie. Maul᷊i bou tal᷊oara u manga parajuriti sarung ikapate, dang sordadonge sarung ipakasue.

²⁷ Bou e'e ratu darua e'e sarung mukumangiang su meda simbau dang mukumang singkahindo, kateho i sire l᷊awo pia pandung ko dal᷊ai, dang i sire sarung mul᷊al᷊eo. Kateho pandung i sire sarung ta mariadi watu'u temponge tangkeng nurating.

²⁸ Mbuhue ratu wanua ngu sawunahi sarung mapul᷊e sarang wanuange dingang u manga barang ko nihampasi. I sie nangantighi guna ngu munggaghoro agama ngu umati Mawu Ruata. I sie sarung mukoa mutumuhu kaoe bou e'e musul᷊e sarang wanuange sisane.

²⁹ Pira ngkatempo bou e'e i sie sarung sau mangalo wanua ngu timuhi, kateho sukenge mutatintang dingang ko horo.

³⁰ Watu'u manga tau Roma dingang u manga kapal᷊i sarung musumongo bou Siprus dang mangalo si sie, hakiu i sie mataku. Bou e'e i sie sarung mapul᷊e dingang u wawal᷊uang kahingang dang mutawakal᷊i munggoghahi agama ngu umati Mawu Ruata. I sie sarung mutumuhu sasasa i sire ko seng nutumal᷊ikuri bou agama e'e.

³¹ Bou e'e i sie mundoho ngu manga pasukang ko mupakal᷊amuhu Wal᷊e ngu Mawu. I sire sarung mupakailang korbang l᷊ou-l᷊ou dang mupararisi simbau ko makatataku ko isigho Kal᷊al᷊ai ko mupakaghaghoro.

³² Kuteu dingang u akal᷊i ko dal᷊ai ratu e'e sarung mul᷊ana manga taumata ko seng nanintang u agama ngi sire, tadeau mo musumbala si sie. Kateho manga taumata ko matuhu su Mawu Ruata sarung wahani mundoka si sie.

³³ Manga taumata ko mapapilesa ko mangaha ana u kawanua sarung mukoa maul᷊i taumata ko makahingang. Kateho pira ngkatempo l᷊iwuenge, pirangkatau bou tal᷊oara i sire sarung ikapate ual᷊ingu parang arako ual᷊ingu putung, dang pirangkatau l᷊ai sarung ihampasi l᷊au itaweng.

³⁴ Tintal᷊a pamamate e'e nariadi, umati Mawu Ruata sarung makarea bantuang singkodo, kateho maul᷊i taumata sarung mutatamba dingang i sire kitang guna ngu watangeng i sire sisane.

³⁵ Simbahageang bou manga pangaha ko mapapilesa e'e sarung ikapate, kateho e'e makoa kere sasuka su umati hakiu i sire sarung makoa ko matilang. Hal᷊i e'e sarung mariadi sarang tempo panginsuenge, e'e ko tempo ko seng nitantu u Mawu Ruata.

³⁶ Ratu wanua ngu sawunahi sarung mukoa mutumuhu kaoe. Dingang u oboti i sie sarung mangul᷊i himoneu i sie lebe l᷊abo bou kaul᷊i u dewa, katewe i sie l᷊ai lebe l᷊abo bou Mawu Ruata Ko Karangetange. I sie sarung botonge mukoa kere'e sarang wawal᷊uang u Mawu Ruata masue. Watu'u apang ko seng nitantu u Mawu Ruata mambeng mariadi horo.

³⁷ Ratu e'e sarung ta muhariga ngu kaul᷊i u dewa ko nisumba ngi upunge, nasu dewa ko isumba ngu manga kowawine. I sie ta mubardekeng su manga dewa e'e ual᷊ing i sie mutuhung watangenge lebe l᷊abo bo i sire.

³⁸ Su l᷊ikuru e'e, i sie sarung mangadati dewa ko mborong tangkeng nisumba ngu manga i upunge, e'e ko dewa mananirung manga tatinda. I sie sarung manumba ngu wul᷊aeng, sal᷊aka, permata l᷊au manga sasumba ko mal᷊al᷊ighari ko wal᷊inge su dewa ko mborong tangkeng nisumba ngu manga i upunge.

³⁹ I sie sarung mamile manga taumata ko manumba dewa raghi, guna ngu mangalo manga tatinda ko matoghasi. I sai ko mangaku dewa e'e sarung ionggol᷊ange l᷊aadati ko l᷊abo dang kakangianeng ko marange l᷊au tana kere l᷊uange.

⁴⁰ Boko panginsueng u kawasa ngu ratu wanua ngu sawunahi seng masandighi temponge, ratu wanua ngu timuhi sarung mangalo si sie. Bou e'e ratu wanua ngu sawunahi sarung mamal᷊isi pangangalo e'e dingang mahasa. I sie sarung manganoa maul᷊i kereta ngu parang, kawal᷊o l᷊au kapal᷊i ko sarung mangalo kere l᷊uwa, dang mangawasa maul᷊i wanua.

⁴¹ Katewe tana ko masidada l᷊ai sarung ipangalonge, l᷊au pul᷊ohiwunge taumata sarung ipatenge. Kateho manga kararatuang u Edom, Moab l᷊au bahageang ko kahimotongange bou kararatuang u Amon sarung masal᷊amati.

⁴² Su tempo ngu i sie nangawasa manga kararatuang e'e, kararatuang u Mesir l᷊ai ta nal᷊iwiri.

⁴³ I sie sarung muhampasi rarotong u Mesir kere wul᷊aeng, sal᷊aka l᷊au rarotong ko wal᷊inge ko mal᷊ighari kahingang. I sie sarung isumbalang u tau Libia l᷊au Sudan.

⁴⁴ Bou e'e habari bou raki l᷊au sawunahi sarung makahuwi si sie, hakiu i sie sarung muparang dingang mahasa dang mamate taumata maul᷊i.

⁴⁵ Katewe i sie sarung mutaing u kema kararatuange su tal᷊oara u l᷊auri l᷊au wul᷊uri tampa Wal᷊e ngu Mawu. Kateho bou e'e i sie sarung mate dang takoae sarang singkatau ko mutul᷊ung si sie.”