DANIEL 10 - BUKI SUSI Wahasa ngu Taghul᷊andang l᷊ou-l᷊ou

Ko nikawua ngi Daniel su Sal᷊uhi Tigris

¹ Su taung katilunge pamarentahang i Ratu Koresh su Persia, simbau tatanata nil᷊ahe si Daniel ko nisigho l᷊ai si Beltsazar. Tatanata e'e ko tingari, kateho matital᷊i kahingang panginange. Su tempo ngu mutawakal᷊i mangina e'e i Daniel nakatarima pul᷊al᷊ahi mangal᷊eng u tatanata e'e su l᷊al᷊ung u simbau kawawua.

² Su tempo e'e ia nuhae watangengku nukal᷊iomaneng tilu ngkamisa l᷊iwuenge.

³ Su kanandu u tempo e'e ia ta nukumang kang ko matemang arako l᷊ai daging; ia ta nanginung anggori, dang ta l᷊ai nanahe utaku.

⁴ Su tanggali duampul᷊opa wul᷊ang kahimotongange taung e'e, ia kararisi su wiwihi u Saluhi Tigris ko l᷊abo e'e.

⁵ Ia nul᷊umingara, bou e'e daku nikawua singkatau ko nul᷊oho l᷊aku bou leneng l᷊au papehe bou wul᷊aeng tuleng.

⁶ Badange kukerong kere permata, pahesie kere sua ngu sinang u kila, matange karilie kere putung. Takiahi l᷊au l᷊aeri kukerong kere witu ko kahikiso, dang tingihie nikaringihi kere tingihi u taumata ko maul᷊i.

⁷ Kitang ia sisaneku nakawua kawawua e'e. Manga taumata ko ene dingangku ta nakawua, kateho i sire nataku kahingang hakiu i sire nutumal᷊ang dang nukumbuni.

⁸ Ia nitintang su se'e sisaneku, apiru kaputuhunge kawawua ko nakahuwi e'e. Ia seng ta nakakoa manga apa dang pahesiku nawilosi kahingang.

⁹ Su tempo ngu ia nakaringihi tingihie, ia nanawo napinsang sarang nararuma su tana.

¹⁰ Bou e'e pia l᷊ima nanuhung si sia dang nakapuwangung si sia apiru nutiking su l᷊ima l᷊au su wukuku.

¹¹ Malaikati e'e nangul᷊i si sia, “Daniel, i kau nikindaghi u Mawu Ruata. Wangungte dang rarisi bou e'e raringihiko manga didatoku i'i pakapia-pia. Ia i'i seng niroi sarang koau.” Su tempo ngu i sie nangul᷊i hal᷊i e'e, ia nurumarisi kakendenge.

¹² Bou e'e niul᷊ie si sia, “Daniel, kumbahang mataku. Mawu Ruata seng nundaringihi kakal᷊iomanengu mangki l᷊ou kahimotongange i kau namutusi mutingkasana u watangengu tadeau makoa ko mapilesa. Ia seng nusumongo kere sasimbahi su kakal᷊iomanengu.

¹³ Malaikati mananirung kararatuang u Persia nundoka si sia su kanandu duampul᷊onsau su l᷊ounge. Bou e'e i Mikhael, singkatau bou manga pangaha u malaikati, nusumongo nutul᷊ung si sia. Daku nitintang i sie pai se'e, su Persia.

¹⁴ Ia nusumongo guna ngu mukoa si kau tadeau makahingang apa ko sarung mariadi su bangsa ngu. Kawawua i'i hal᷊i u l᷊ou su saruang.”

¹⁵ Su tempo ngu i sie nangul᷊i u hal᷊i e'e, ia nukumakurung dang ta nakapudidato.

¹⁶ Bou e'e malaikati ko musul᷊ung u taumata e'e nangul᷊uhi l᷊imange dang nanuhung wiwihiku. Ia nangul᷊i si sie, “Tuang, kawawua i'i nakabuha si sia hakiu ia ta makakoa manga apa.

¹⁷ Ia kere singkatau l᷊ang ko kararisi su tingo ngu mawunge. Kirapawe ia makapudidato si Tuang? Uhaku seng nasue dang sal᷊a ta makasinda.”

¹⁸ Kuteu paghisa l᷊ai i sie nanuhung si sia, bou e'e daku nikapundangeng uhaku natamba.

¹⁹ I sie nangul᷊i, “Mawu Ruata nukumindaghi i kau, watu'u e'e kumbahang maghagha arako mataku, ndaie pakatoghasi!” Tintal᷊a i sie kapangul᷊ie hal᷊i e'e, ia nakapundang lebe natoghasi l᷊ai dang nangul᷊i, “Pudidatote Tuang. I Tuang seng nanamba katatoghasiku.”

^20-21 Bou e'e i sie nusumimbahi, “Apa i kau matitong apa sabapie ia nusumongo sarang koa u? Pandungku tadeau mangul᷊i si kau apa ko kawawohe su l᷊al᷊ung u Buki Ko Nuhino. Orasi i'i ia mambeng musul᷊e guna ngu muparang mundoka malaikati mananirung Persia. Suapang bou e'e malaikati mananirung Yunani sarung sumongo. Takoae ko sarung mutul᷊ung ia su l᷊ikuri Mikhael, malaikati mananirung Israel, negarau.