DANIEL 1 - BUKI SUSI Wahasa ngu Taghul᷊andang l᷊ou-l᷊ou

WUKE NGI DANIEL L᷊AU MANGA RINGANGE 1:1–6:29 Manga ana ko makakuda u Yahudi su wal᷊e ngi ratu Nebukadnezar

¹ Tilu taung suapang Ratu Yoyakim namarenta Yehuda, i Nebukadnezar ratu ngu Babel, nangalo sarang soa ngu Yerusalem dang nul᷊iwung soa e'e.

² MawuU nupakawala ngi sie namata Ratu Yoyakim dang nangaho simbahageang bou manga rarotong ko mahariga su Wal᷊e ngu Mawu. Manga taumata ko nitawenge, niwawae sarang kuil u dewange su Babel, dang manga rarotong ko mal᷊al᷊ighari ko niahoe, niresoe su l᷊al᷊ung u manga tampa pundandesonang su kuil e'e.

³ Mbuhue ratu namarenta si Aspenas, tumbonang u tataho u istana, tadeau pamile pirangkatau ko makakuda hintou ngu ratu arako toronang ngu papung bou tal᷊oara u manga taumata ngu Israel ko nitaweng.

⁴ I sire mambeng ana ko makakuda ko takoae kurange. I sire mambeng ko masidada, pia sikol᷊ange marange, mapilesa dang pia titonge maul᷊i dang hinonge muhal᷊i su l᷊al᷊ung u istana. I Aspenas mambeng panintiro si sire mubasa dang mamohe wahasa ngu Babel.

⁵ Ratu nanantu l᷊ai himoneu kang l᷊au inung i sire mambeng pusul᷊ung dingang ko nisadia guna ngu tataho u walagheng u ratu. Suapang bou nilati su l᷊al᷊ung u tilu taung, i sire mambeng putingo ratu guna ngu muhal᷊i su istana.

⁶ Bou tal᷊oara u ana ko makakuda e'e pia l᷊ai i Daniel, i Hananya, i Misael l᷊au i Azarya, kaul᷊ie bou suku ngi Yehuda.

⁷ Tumbonang u tataho u istana namal᷊u manga areng i sire nakoa: i Beltsazar, i Sadrakh, i Mesakh l᷊au i Abednego.

^8-9 Dingang u tul᷊umang u Mawu Ruata, i Daniel nikapiang l᷊au nikindaghi i Aspenas. I Daniel nukakiki wungahi ta mupakal᷊amuhu u watangenge dingang u kang l᷊au inung anggori bou istana, watu'u e'e i sie nundo si Aspenas tadeau botonge makarea kang ko wal᷊inge.

¹⁰ Ual᷊ingu mataku su ratu, i Aspenas nangul᷊i, “Ratu sisane seng nanantu kang l᷊au inungu, inau boko tumuhu si sie i kau tuhungang dio mahusaki bou manga ana ko makakuda ko wal᷊inge, nal᷊ahe ia sarung ipatenge.”

¹¹ Mbuhue i Daniel nudidato ngu hal᷊i e'e dingang u mundadiaga ko nipuhal᷊i i Aspenas tadeau putangkiang si Daniel l᷊au ringange i sire tilu. Angkung i Daniel,

¹² “Kenangko suka i kami su l᷊al᷊ung u mapul᷊o l᷊ou; onggoko si kami kitang duku l᷊au inung guna ngu kang l᷊au inung.

¹³ Suapang nal᷊iu bou mapul᷊o l᷊ou, kenangko sul᷊ung ghahi i kami dingang u ghahi u manga ana ko makakuda ko nukumang kang ko nitantu u ratu, bou e'e putusite tuhu su putatuhungu e'e.”

¹⁴ Mudadiaga e'e nukumire dang nanuka su l᷊al᷊ung u mapul᷊o l᷊ou.

¹⁵ Suapang tempo nasue, i sire tuhungang lebe masehati dang lebe matoghasi bou kaul᷊i u ana ko makakuda ko nakarea kang bou meda ngu ratu.

¹⁶ Nanita bou e'e mundadiaga e'e seng ta nanadia si sire kang l᷊au inung ko seng nitantu u ratu, kateho kitang duku l᷊au ake.

¹⁷ Mawu Ruata nangonggo su pa u katau ana ko makakuda e'e kapapilesa l᷊au kapapande su l᷊al᷊ung u wahasa l᷊au titong. Su l᷊ikuri e'e si Daniel nionggol᷊ang-E l᷊ai kapapande guna ngu mul᷊ahe kawawua l᷊au u ipi.

¹⁸ Su panginsueng u tilu taung tempo ngu sikol᷊a ko nitantu u ratu e'e, i Aspenas numbawa kaul᷊i u ana ko makakuda e'e mutumatingo Ratu Nebukadnezar.

¹⁹ Suapang bou nukakina dingang i sire kaul᷊ie, ratu nakarea himoneu i Daniel, i Hananya, i Misael l᷊au i Azarya nangilebe bou manga ko wal᷊inge su l᷊al᷊ung u apang hal᷊i. Kuteu i sire nanita nuhal᷊i su istana.

²⁰ Sintinia ratu muhabari hal᷊i ko mundea pul᷊al᷊ahi l᷊au pangangina, i sie nakawua himoneu sasasa l᷊au pul᷊al᷊ahi i sire pa ana ko makakuda e'e lebe mapia pakapul᷊o bou sasasa l᷊au pul᷊al᷊ahi u tahawawua l᷊au tahapul᷊iku mata su kal᷊abo u kararatuange.

²¹ I Daniel tatapi kapuhal᷊ie su istana sarang Ratu Koresh bou Persia namata Babel.