AYUB 1 - BUKI SUSI Wahasa ngu Taghul᷊andang l᷊ou-l᷊ou

Setang nanal᷊uka si Ayub

¹ Su tana Us pia singkatau ko ese natana, arenge i Ayub. I sie manumba Mawu Ruata dang satia si Sie. I sie taumata ko mapia kakanoae dang ta nukoa ko l᷊al᷊ai sarang singkodo.

² I sie pia anae ko ese pitu ngkatau l᷊au kowawine tatilu.

³ Su l᷊ikuru e'e i sie pia l᷊ange maul᷊i, domba pituhiwu, onta tiluhiwu, sapi sihiwu, l᷊au keledai l᷊imahasu. Pol᷊o ngu didato, i sie ko singkatau kakalakenge su tal᷊oara u taumata ko natana su wanua ngu raki.

⁴ I sire pitu ana i Ayub ko ese pia narang i sire mukoa sal᷊iwang su wal᷊e ngi sire simbau-simbau mul᷊al᷊ol᷊osi. Su sal᷊iwang e'e ana i Ayub kowawine tatilu e'e mang inoti l᷊ai, bou e'e i sire kaul᷊ie kumang manginung singkahindo.

⁵ Masue sal᷊iwange i Ayub sintinia muwangung mal᷊uka-l᷊ukari dang manumba ngu korbang guna ngu apang anae tadeau i sire iampungang u Mawu. Watu'u i Ayub nusipiri, botonge mariadi apang anae e'e seng nubardosa dang ta nutaturi nuhinakang Mawu Ruata.

⁶ Pia su silou manga ko niriadi su sorga nupasaruang Mawu, dang Mananal᷊uka ene su tal᷊oara i sire l᷊ai.

⁷ Mawu nukina si sire, “Bou apa i kau?” Sasimbahi Mananal᷊uka, “L᷊ang mbuhue l᷊ai nul᷊umal᷊eng tamai-mai dang nul᷊iku kaul᷊i u dunia.”

⁸ Bou e'e Mawu nakina, “Apa i kau seng nakawua l᷊ang-Ku i Ayub? Su kaul᷊i u dunia takoae taumata ko kere'e kasatiange dang kapiange naunge kere i sie. I sie manumba si Sia dang ta paghisa nukoa ko l᷊al᷊ai.”

⁹ Kateho Mananal᷊uka nusumimbahi, “Tantu l᷊ai i Ayub manumba si Kau watu'u i sie manarima l᷊uange.

¹⁰ I sie, wal᷊aghenge, dang kaul᷊i u kakakalae sintinia diagateng-U. Hal᷊ie sintinia al᷊amating-U dang i sie nionggol᷊ang-U maul᷊i binatang papal᷊iharang botonge guna ngu pamene kaul᷊i u wanua.

¹¹ Kateho andenge patiku kakakalae e'e al᷊akeng-U, nal᷊ahe i sie sarung turusi mangutoki si Kau!”

¹² Kuteu angkung u Mawu su Mananal᷊uka, “Kere'ete, koaete apang ko ikoau su kaul᷊i u kakakala i Ayub, asal᷊i kumbahang i kau mupakasaki i sie!” Bou e'e natamaite Mananal᷊uka e'e bou saruang u Mawu.

Manga ana dang kakakala i Ayub nipakasue

¹³ Pira ngkatempo tuhue manga ana i Ayub su tempo kapukoae sal᷊iwang su wal᷊e ngu tuhang i sire ko kaiyakanenge.

^14-15 Singkahuwiu singkatau paparentang nusumongo katal᷊ange sarang wal᷊e ngi Ayub dang nulapori, “Tuang, Tau Syeba seng nusumongo nangalo si kami su tempo ngu manga sapi kapamongkari anseri dang manga keledai kakange ruku masandighi u e'e. I sire seng namal᷊aho manga binatang e'e dang namate manga l᷊ang i Tuang ko ene su se'e. Kitang l᷊ang sisane ko nal᷊iwiri hakiu botonge makahabari si Tuang.”

¹⁶ Su tempo ngi sie mborong kadidatonge, nasongote l᷊ang karuange nangul᷊i, “Manga domba ngi Tuang dang manga mul᷊al᷊ukari seng nisaheri u kila hakiu nate kaul᷊ie. Kitang l᷊ang sisane nal᷊iwiri hakiu botonge makahabari si Tuang.”

¹⁷ I sie mborong ta nasue didatonge, su tempo ngu l᷊ang ko katilunge nusumongo nuhabari, “Tilu ngkomol᷊ang mul᷊ahampasi bou Kasdim seng namal᷊aho manga onta ngi Tuang dang namate manga l᷊ang i Tuang. Kitang l᷊ang nal᷊iwiri hakiu botonge makahabari si Tuang.”

¹⁸ Su tempo ngi sie mborong kadidatonge, nasongote l᷊ang ko wal᷊inge ko numbawa habari, “Manga ana i Tuang kapusal᷊iwange su wal᷊e ngu ana i Tuang ko iyakang.

¹⁹ Singkahuwiu anging mauha nutumiu bou wanua l᷊inggi dang nundusa wal᷊e e'e hakiu nahaka dang nakapate kaul᷊i u ana i Tuang. Kitang l᷊ang ko nal᷊iwiri hakiu botonge makahabari si Tuang.”

²⁰ Bou e'e i Ayub nurumarisi dang nunggehe pakeange tatia ngu nasusa. I sie nangol᷊o utae, bou e'e nusuba

²¹ dang nangul᷊i, “Ia nipahinding takoae manga apa, dang sarung mate takoae manga apa l᷊ai. Mawu seng nangonggo dang Mawu l᷊ai seng nangal᷊a. Idalote areng-E!”

²² Inau maneng we i Ayub nakarea patiku hombang e'e, i sie ta nukoa dosa dang ta nupunsal᷊a ngu Mawu Ruata.