AMOS 1 - BUKI SUSI Wahasa ngu Taghul᷊andang l᷊ou-l᷊ou

¹ I Amos ko singkatau mul᷊al᷊ukari domba bou soa ngu Tekoa. I sie nakoa nabi su tempo ngu wanua ngu Yehuda niparenta ngi Ratu Usia, dang Israel niparenta ngi Ratu Yerobeam, ahusi Yoas. Dua taung su horo u pia rinuhi nariadi, Mawu Ruata nupakal᷊ahe si Amos manga hal᷊i ko mariadi su Israel.

² I'i ko niul᷊i i Amos, “Mawu nukumiha bou Bongkong u Sion, Tingihi-E ghughal᷊udu bou Yerusalem. Manga nguda u rindulu nasue namara, rindulu su Wul᷊uri u Karmel nasue nahango.”

Hukumang u Mawu Ruata su manga negara l᷊ampung u Israel Siria

³ Mawu nuhengetang, “Taumata ngu Damsyik seng masau mukoa dosa, ual᷊ingu e'e Ia nal᷊ahe sarung muhukung si sire. I sire mukoa tau Gilead matingkai kahingang,

⁴ watu'u e'e Ia sarung mundoho ngu putung sarang wal᷊e ngu Ratu istana ngi Hazael, dang manutung pakasue manga tatinda u Ratu Benhadad.

⁵ Manga tukari u soa ngu Damsyik sarung Daku ighoghahi, dang taumata ngu Wal᷊ang u Awen sarung Daku imu bou tampa katanakeng i sire. Mangangawasa ngu Bet-Eden sarung Daku ipal᷊intu bou kakangianenge, dang taumata ngu Siria sarung itaweng l᷊au iwawa sarang wanua ngu Kir.”

Filistin

⁶ Mawu nuhengetang, “Taumata ngu Gaza seng masau mukoa dosa, ual᷊ingu e'e Ia nal᷊ahe sarung muhukung si sire. I sire seng nanaweng bangsa simbau kaul᷊ie, dang niwal᷊u kere l᷊ang su tau Edom.

⁷ Watu'u e'e Ia sarung mundoho ngu putung sarang manga meseli Gaza, dang manutung pakasue manga tatindae.

⁸ Taumatange l᷊au mangangawasa soa ngu Asdod dang Askelon sarung Daku ipakaghea. Soa ngu Ekron sarung Daku ihukung, dang kaul᷊i u l᷊umbei ngu tau Filistin sarung Daku ipakawinasa.”

Tirus

⁹ Mawu nuhengetang, “Taumata ngu Tirus seng masau mukoa dosa, ual᷊ingu e'e Ia nal᷊ahe sarung muhukung si sire. I sire seng nanaweng bangsa simbau kaul᷊ie sarang pundandumekang, dang nisarakang su Edom; i sire seng nul᷊umawang pudadiandi pughaghawe.

¹⁰ Watu'u e'e Ia sarung mundoho ngu putung sarang manga meseli Tirus dang manutung pakasue manga tatindae.”

Edom

¹¹ Mawu nuhengetang, “Taumata ngu Edom seng masau mukoa dosa, ual᷊ingu e'e Ia nal᷊ahe sarung muhukung si sire. Takoae kakindaghie, i sire seng nangalo tau Israel, manga ana u simbau i sire. I sire mangkate kapuwawal᷊uange turusi dang tatapi kapundeso u dugali.

¹² Watu'u e'e Ia sarung mundoho ngu putung sarang soa ngu Teman, dang manutung pakasue manga tatinda u Bozra.”

Amon

¹³ Mawu nuhengetang, “Bangsa Amon seng masau mukoa dosa, ual᷊ingu e'e Ia nal᷊ahe sarung muhukung si sire. Su tempo ngu muparang mupakawunahi u kararatuange, i sire namuresi tiang u manga kowawine ko pia kal᷊uwaenge su Gilead.

¹⁴ Watu'u e'e Ia sarung mundoho ngu putung sarang manga meseli soa ngu Raba, dang manutung pakasue manga tatindae. Su tempo e'e sarung ikaringihi gara u puraroka dang parang nariadi kere suwu-suwu.

¹⁵ Ratu ngi sire l᷊au manga tumbonang u pamarentahange sarung itaweng sarang pundandumekang. Ia, Mawu, seng nuhengetang.”