2 TIMOTIUS 1 - BUKI SUSI Wahasa ngu Taghul᷊andang l᷊ou-l᷊ou

^1-2 I Timotius, anaku ko ikukindaghi! Ia, i Paulus namohe surati i'i si kau, dang muharapi mal᷊umbako Mawu Ruata Yamang dang Mawu ngi kite Kristus Yesus munggile u al᷊amati, kakindaghi dang kapapia si kau. Su l᷊al᷊ung u kao u Mawu Ruata, ia nihengke nakoa rasuli Kristus Yesus dang niroi guna ngu muhabari hal᷊i u puwawiahi ko nidiandi ngu Mawu Ruata. Puwawiahi e'e itarima i kite watu'u nasimbau dingang I Kristus Yesus.

Tatarima kase dang tughu

³ Ia mutarimakase su Mawu Ruata ko daku tal᷊ungang dingang u naung nasue ko bursi musul᷊ung ko nikoa i upungku horo. Ia sintinia mutarimakase su Mawu Ruata sintinia tempo ia makatinaung si kau su l᷊al᷊ung u kal᷊iomaneng, maning l᷊ou arako l᷊ai maning huwi.

⁴ Ia makatinaung kasasusa ngu naungu. Hakiu ia mo kahingang musombang dingangu tadeau ia botonge mahul᷊uasi.

⁵ Ia nakatinaung pangangimang u ko takoae sihinge si Kristus, musul᷊ung kere pangangimang i upungu i Lois dang i mamau i Eunike. Dang ia mangaking i kau l᷊ai mangimang kere e'e.

⁶ Watu'u e'e ia munggile u ingati si kau guna ngu mamiahi ganggile ko nionggo u Mawu Ruata si kau su tempo ngu ia namilo u l᷊imaku si kau.

⁷ Watu'u Roh ko ninggile Mawu Ruata si kite, wal᷊ingewe Roh ko mukoa si kite makoa ko matal᷊o. Kateho Roh u Mawu Ruata e'e mukoa si kite makao matoghasi, napene dingang u kakindaghi dang botonge mundiaga watangeng.

⁸ Watu'u e'e kumbahang mamea musaksi ngu Mawu ngi kite, dang kumbahang l᷊ai mamea ngu ia, ko kal᷊ahukung ual᷊ing I Sie. Kateho kenangko i kau dingang u katatoghasi bou Mawu Ruata, putuhu kasasusa guna ngu Habari Mapia e'e.

⁹ Mawu Ruata manal᷊amati si kite dang mukui si kite tadeau makoa umati-E sisane. I Sie mukoa e'e wal᷊ingewe apang ko mbuae nihal᷊ikang i kite, kateho bou kirou-E sisane dang kakindaghi-E. I Sie nangonggo si kite kakindaghi-E bo I Kristus Yesus su horo u dunia i'i niriadi.

¹⁰ Dang su orasi i'i, Mawu Ruata nupatode u kakindaghi-E e'e si kite dingang u sasongo ngu Ratu Mananal᷊amati kite I Kristus Yesus. I Yesus namata kawasa ngu papate dang numbawa puwawiahi ko kakal bou Habari Mapia e'e.

¹¹ Guna ngu muhabari Habari Mapia e'e Mawu Ruata nuhengke si sia nariadi rasuli dang meteri.

¹² Watu'u e'e ia mutatahang u kasasusa kaul᷊ie i'i, kateho ia tatapi mangaking; watu'u ia matitong kahingang i sai ko daku pangimaneng. Ia mangaking u apang ko seng nisarakang-E si sia, I Sie l᷊ai makadiaga sarang L᷊ou Kiamati.

¹³ Tuhukete pakapia-pia tintiro ko nuhino ko mbuae daku nionggo si kumu. Dang kenangko we i kau tatapi muhinggo su pangangimang dang kakindaghi ko mariadi koa i kite ual᷊ingu nasimbau dingang I Kristus Yesus.

¹⁴ Dingang u tul᷊umang u bou Roh u Mawu Ruata ko ene su l᷊al᷊ung u wiahi kite, kenang ko i kau mundiaga pakapia-pia apang hal᷊i mal᷊al᷊ighari ko seng nisarakang si kau.

¹⁵ I kau matitong uare kaul᷊i u taumata su wanua ngu Asia seng nanintang u ia su l᷊al᷊unge l᷊ai i Figelus dang i Hermogenes.

¹⁶ Arawe balagheng i Onesiforus seng pakapira nupakal᷊uasi naungku. Mal᷊umbako Mawu mupakal᷊ahe u kakindaghi-E si sire, maneng we ia su l᷊al᷊ung u tutupang; i Onesiforus ta mamea kakaoku e'e.

¹⁷ Kere'e nahumpa su Roma, i sie turusi nutawakal᷊i nundea si sia sarang i sie nusombang dingangku.

¹⁸ Dang i kau matitong himoneu su Efesus i sie masau mutul᷊ung u ia. Mal᷊umbako Mawu mupakal᷊ahe u kakindaghi si sie su l᷊ou ngu Mawu muhukung kaul᷊i u taumata.