Filemón 1 - Porciones Lacandon-Naha

T'ʌn

¹ Ten Pablo, a mʌken yoko naj yok'o tu kin tsikbʌtik a Jesucristo y yete ak bojo' Timoteo kin t'ʌno' ti tech Filemón, a jach otsi in wirkech y mok bexi' in wet meaj.

² Bexi' kin tuchi'tik in t'ʌno' ti' a mok akʌ' ti' u t'ʌn K'uj a ku much'ik u bʌjo' yok'o a watoch y bexi' ti' a bojo' Apia y ti' a Arquipo a to'o a ket meaj.

³ In k'ato' ka' u yakunte'x K'uj y ak Ts'uri Jesucristo tu woro k'in y ka' u tsoy ta wore'x tu kʌje'x.

Pablo ku k'atik ti' K'uj ti' Filemón

⁴ Tuk'in kin t'ʌnik K'uj, woro in wei'k baij tech K'uj tuk'in kin k'askech Filemón,

⁵ Tu kin wui'k u ya'ba tech jach otsi a wirik ak Ts'uri Jesucristo y ka jach ch'eik u t'ʌn y bexi' ti' tu woro a mok akʌ' ti' u t'ʌn K'uj.

⁶ In k'atik ti K'uj ti a jach ki metik u t'ʌn y ti' a jach ki' k'oo'tik, y bex ja' jach ki metik ne ya'p tsoy ba' wa jach otsi a wirik ak Ts'uri Jesucristo.

⁷ Jach ne k'ux tsoy in wor tu tin wu'a u ya'ba a tech jach ne otsi a wirik a bojo', y ta laj nʌsa u yoro' a mok akʌ' ti' u t'ʌn K'uj ti' mu' p'ʌtik.

Pablo ku yʌntik a Onésimo

⁸ Bein, tarak ten u li'smʌ' u t'ʌn ak Ts'uri Cristo, ti' in li'sik u t'ʌni ti' a metik a ba'.

⁹ Chen a ten k'atbi kin metik tech tu in wej otsi a wiken. Tenen a Pablo ya nuxichʌjen, y a beje' mʌken yoko' nʌj yoko tu ki tsikbʌtik u t'ʌn ak Ts'uri Jesucristo.

¹⁰ Ki jach k'atik tech a wʌntken ti' in tia Onésimo, a to'o wayi bix in ti'a, a to'o ten tin yʌ tsikbʌta ti' u t'ʌn K'uj way tu mʌken yoko nʌj.

¹¹ A uchik ka'chik, a Onésimo lʌji' a k'ʌni' tech, chen mix ku k'ʌs ku meaj, a beje' ku meaj y ya tsoy ti' a k'ʌnik tech y ten.

¹² A beje' kin ka' tuchi'tik tech y ki' but'e p'is bix ten ka bin but'en.

¹³ Tak ten poch in wui'k u p'ata wai yete ten, ti' in k'ʌnik a bex tech tin k'ʌnech, a way tu mʌken yok'o nʌj, yok'o tu ki tsikbʌtik u t'ʌn K'uj.

¹⁴ Bein ten mʌnʌ' in yʌ metik ba' wo mo' ket a wor, ti' ma' metik a ba' p'is ts'erbi a pach, toj ket a wor a metik.

¹⁵ Bik a t'ʌn, la'jen tu jʌnch bini ta wiknʌ, ti u ka sut beje' tu yʌnech y ti' mu' yʌn bin ti tech.

¹⁶ Chen a beje' ya mo' bex a bix u uchik ta k'ʌna, bex ka bin a wire p'is a bojo' a wet meaj a ne otsi a wirik. A ten ne k'ux otsi in wirik, chen tech yʌnti' a jach más yakuntik, mo' jari bex a winik ku yakuntik u bojo', yʌnti' a yakuntik bex a bojo' a ket a waksamʌ ta wor ti' K'uj.

¹⁷ Bein, wo jach ka wiken a bojen, jach ki akse, p'is bix ten ka bin a waksen.

¹⁸ Wo yʌn ba' tu meta tech, o yʌn u p'ax tech, ti' a k'atik ten.

¹⁹ A je' a ju'un toj in bʌji' ten a Pablo kin ts'ibtik yete in k'ʌ' y toj ten in ts'ib. Teni' kin bin in bo'te, tak yʌn a p'ax ten, a wue tu woro a ba' a yʌntech y tu woro a kuxta lʌji' yok'o ten.

²⁰ Bex bojo', mete ten a je' a ba' kin k'atik tech, chem ma' metik yok'o ti' ten, mete yok'o ak ts'uri K'uj tu otsi a wirik, tsoykinte u yor in pixʌn wo ket ak Ts'uri Cristo.

²¹ Kin ts'ibtik tech, tu in wue ja' jach uik' in t'ʌn y in wue je'e a jach metik más a ki k'atik tech.

²² In k'atik tech u jer ba', kʌxte tuba in p'ʌta tin wene, ka wirik tʌn in ch'uktik, a tuka t'ʌnke'x K'uj, K'uj jeu cheik in bin wire'x.

U tsok u t'ʌn a Pablo

²³ Bexi' ku tuchi'tik u t'ʌn ti teche'x a Epafras a mok ket mʌken yete yok'o tu kin tsikbʌtiko' u t'ʌn a Cristo Jesús.

²⁴ Bexi' ku tuchi'tik u t'ʌn a Marcos, Aristarco, Demas y Lucas a moko' ku yʌntiken tu kin meaj.

²⁵ Jach in k'at yete tu woro in pixʌn, ka' u ne yakunte'x y kʌnʌnte'x ak Ts'uri Jesucristo. Amén.