୧ ଯୋହନ 1 - New Testament in Pengo Parja Languageଜିବୁନ୍ ହିଦ୍ନି କାତା 1 ଆଗେତାଙ୍ଗ୍ ଇନେର୍ ମାଚାନ୍, ତା ବିଷୟରେ ଆପେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାପା। ହେୱାନିଙ୍ଗ୍ ଆପେଙ୍ଗ୍ ହୁଡ଼୍ତାପ୍ନା, ଆରେ ତା କାତା ୱେଚାପ୍ନା। ଆପେଙ୍ଗ୍ ତାଙ୍ଗେଙ୍ଗ୍ ଜାର୍ କାଣ୍କୁତାଙ୍ଗ୍ ହୁଡ଼୍ତାପ୍ନା ଆରେ ଜାର୍ କେଇଦାଙ୍ଗ୍ ଆସ୍ପାତାପ୍ନା, ହେୱାନ୍ ଯୀଶୁ ଖ୍ରୀଷ୍ଟ ଆରେ ଜିବୁନ୍ ହିଦ୍ନି କାତା। 2 ହେୱାନ୍ ଜିବୁନ୍ ହିଦ୍ନି ମାନାୟ୍ ପୁର୍ତିତାକେ ୱାତାନ୍। ଆପେଙ୍ଗ୍ ହେୱାନିଙ୍ଗ୍ ହୁଡ଼୍ତାପ୍ନା, ଆରେ ତା ବିଷୟରେ ଆପେଙ୍ଗ୍ ସାକି ହିଦ୍ନାପା। ଆପେଙ୍ଗ୍ ତା ବିଷୟରେ ୱେଚ୍ଚାନାପା ଯେ, ହେୱାନ୍ନେ ୱିଜ୍ୱି ଜିବୁନ୍। ହେୱାନ୍ ଆବା ଈଶ୍ୱର ହୁଦାଙ୍ଗ୍ ଆଗେତାଙ୍ଗ୍ ମାଚାନ୍, ଆରେ ହେୱାନ୍ ପୁର୍ତିତାକେ ୱାତାନ୍। 3 ଆପେଙ୍ଗ୍ ଇମ୍ଣାକା ହୁଡ଼୍ତାପ୍ନା ଆରେ ୱେଚାପ୍ନା ହେଦାଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାପା, ଲାଗିଙ୍ଗ୍ ଏପେଙ୍ଗ୍ ମା ହୁଦାଙ୍ଗ୍ ମାହାଆଦ୍ନାଦେର୍। ଆରେ ଆପେଙ୍ଗ୍ ଆବା ଈଶ୍ୱର ଆରେ ତା ମେହି ଯୀଶୁ ଖ୍ରୀଷ୍ଟ ହୁଦାଙ୍ଗ୍ ମାହାଆତାପ୍ନା। 4 ଆପେଙ୍ଗ୍ ଇ ବିଷୟରେ ଲେକିକିନାପା ଯେ, ଏପେଙ୍ଗ୍ ମା ହୁଦାଙ୍ଗ୍ ପୁରା ୱାରି କିୟାଟ୍। ଈଶ୍ୱର ହୁଦାଙ୍ଗ୍ ହାର୍ ସମ୍ପର୍କ ଇଟ୍ନି ବିଷୟନି କାତା 5 ଆପେଙ୍ଗ୍ ଯୀଶୁ ଖ୍ରୀଷ୍ଟତାଙ୍ଗ୍ ଇମ୍ଣି କାତା ୱେଚାପ୍ନା। ହେଦାଙ୍ଗ୍ ଆପେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାପା। ଅଜଡ଼୍ଲେକେ ଆବା ଈଶ୍ୱର ହାର୍ ଆରେ କିଲେର୍। ଲାଗିଙ୍ଗ୍ ତାବେ ମାଜ୍ଗାଲେକେ ଇନା କରାପ୍ ଜିନିଷ୍ ହିଲେତ୍। 6 ଯଦି ଆସେଙ୍ଗ୍ ଯୀଶୁ ହୁଦାଙ୍ଗ୍ ମାହାଆଜି ମାନାସ୍ ଇଞ୍ଜି ୱେଚ୍ନାସ୍, ଆରେ ମାଜ୍ଗାତାକେ ମାନିଲେକେ କରାପ୍ କାମାୟ୍ କିଜି ମାନାସ୍। ଲାଗିଙ୍ଗ୍ ଆସେଙ୍ଗ୍ ମିଚ୍ୱାକାସ୍, ଆରେ ଆସେଙ୍ଗ୍ ସତ୍ ହିକ୍ଷା ଅନୁସାରେ ଜିବୁନ୍ କାଟି କିଉସା। 7 ମାତର୍ ଈଶ୍ୱର ଇନେସ୍ ଅଜଡ଼୍ତାକେ ମାନାନା, ହେଲେକେ ଯଦି ଆପେଙ୍ଗ୍ ଅଜଡ଼୍ତାକେ ମାନାପ୍। ଲାଗିଙ୍ଗ୍ ଆପେଙ୍ଗ୍ ମାହାଆଜି ମାନାପ୍, ଆରେ ତା ମେହି ଯୀଶୁ ଖ୍ରୀଷ୍ଟ ତା ନେତେର୍ତାଙ୍ଗ୍ ମା ୱିଜୁ ପାପ୍ତିଙ୍ଗ୍ ନୁସ୍ତାନ୍ନା। 8 ଆସେଙ୍ଗ୍ ଯଦି ଇନାସ୍ ଆସେଙ୍ଗ୍ ଇନା ପାପ୍ କିୱାତାପ୍ନା, ଲାଗିଙ୍ଗ୍ ଆସେଙ୍ଗ୍ ନିଜେ ଟକାୟ୍ କିନାସା, ଆରେ ଆସେଙ୍ଗ୍ ସତ୍ ଯିବୁନ୍ତାଙ୍ଗ୍ କାଟି କିଉସା। 9 ମାତର୍ ଯଦି ଆସେଙ୍ଗ୍ ଜାର୍-ଜାର୍ ପାପ୍ତିଙ୍ଗ୍ ଈଶ୍ୱରତିଙ୍ଗ୍ ୱେଚ୍ନାସ୍। ଲାଗିଙ୍ଗ୍ ହେୱାନ୍ ମା ପାପ୍ କେମା କିଦ୍ନାନ୍ ଆରେ ୱିଜୁ ଅଦରମ୍ ନୁସ୍ତାନ୍ନା। ଇନେସ୍କି ହେୱାନ୍ ସତ୍ ନ୍ୟାୟ୍ ବିଚାର୍ କିନାକାନ୍। 10 ଆସେଙ୍ଗ୍ ଯଦି ପାପ୍ କାମାୟ୍ କିୱାତାପ୍ନା ଇଞ୍ଜି ୱେଚ୍ନାସ୍, ଲାଗିଙ୍ଗ୍ ଈଶ୍ୱରତିଙ୍ଗ୍ ଆପେଙ୍ଗ୍ ମିଚ୍ୱା ଇଞ୍ଜି ୱେଚ୍ନାପା, ଆରେ ତା ସତ୍ ବାକ୍ଯ ମା ଲାଗାୟ୍ ହିଲେତ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation