Psalm 2 - Pennsylvania Dutch Bible

Da 2. Psalm. Gott Sei Groofanah Kaynich

¹ Favass sinn di heida in en ufruah, un di leit am shkeema fa nix?

² Di kaynicha funn di eaht setza sich uf, un di roolahs fasamla sich zammah geyyich da Hah, un geyyich sei Ksalbdah.

³ “Vella iahra kedda fareisa,” sawwa si, “un iahra shtrikk abshmeisa funn uns.”

⁴ Avvah Deah vo im himmel voond lacht; da Hah shpott ivvah si.

⁵ No shvetzt eah zu eena in seim zann, un eah fagelshtaht si in sei haysi gleet, un sawkt,

⁶ “Ich habb mei Kaynich eiksetzt uf mei heilichah hivvel funn Zion.”

⁷ Nau sawk ich vass da Hah auskshprocha hott: Eah hott ksawt zu miah, “Du bisht mei Sohn; heit havvich dich gezeikt.

⁸ Frohk mich, un ich gebb di heida fa dei eahbshaft, un di ends funn di eaht fa dei sei.

⁹ Du solsht si shlauwa mitt en eisichi root, un si in shtikkah fabrecha vi eahdich ksha.”

¹⁰ So fashtaynd dess, diah kaynicha, seind gvand, diah roolahs uf di eaht.

¹¹ Deenet da Hah mitt furcht, un froiyet eich mitt ziddahra.

¹² Kisset da Sohn, fafiah eah vatt bays, un diah kummet um unnah-vayks, fa sei zann vatt kshvind ufkshtatt. Ksaykend sinn awl selli es eem drauwa fa hilf.