Psalm 141 - Pennsylvania Dutch Bible

Da 141. Psalm. En Gebayt Fa Frei Kalda Sei Funn Evil

En Psalm fumm Dawfit.

¹ Oh Hah, ich roof zu diah, kumm kshvind zu miah, heah mei shtimm vann ich dich roof.

² Loss mei gebayt gnumma sei es vi insens, un mei ufkohvani hend es vi en ohvet-opfah.

³ Setz en heedah ivvah mei maul, oh Hah, vatsh ivvah di deah funn mei leftz.

⁴ Hald mei hatz funn gedrayt sei zu evil, so es ich kenn dayl habb in gottlohsi sacha mitt mennah es evil shaffa. Loss mich nett essa vass si gleicha essa.

⁵ Loss en gerechtah mann mich freindlich shlauwa, un mich recht setza veil eah's goot maynd. Loss een mich zanka; es is vi ayl uf mei kobb leahra, un mei kobb soll sich nett veahra digeyya. Doch ich bayt di gans zeit geyyich di ungerechta iahra verka.

⁶ Vann di ungerechta iahra roolahs moll runnah kshmissa vadda funn di felsa-vanda, no lanna leit vi recht es mei vadda voahra.

⁷ Vi ebbah blookt un di eaht uf brecht, so vatt's grawb uf gmacht un iahra gnocha vadda fashtroit datt.

⁸ Avvah mei awwa sinn uf diah, Awlmechtichah Hah, ich du mei drauwa in dich; dray mei sayl nett ivvah zumm doht.

⁹ Hald mich aus di fall es si ksetzt henn fa mich, funn di fang-shtrikk funn evil-shaffah.

¹⁰ Loss di gottlohsa in iahra aykni nets falla, diveil es ich haus kalda binn.