Matäus 1 - De Bibel JHF

De Staumboom von Jesus

¹ Daut Buak von de Aufstaumunk Jesus Christus, David sien Sän, Abraham sien Sän.

² Abraham wia Isaak sien Voda, Isaak wia Jakob sien Voda, un Jakob wia Juda un siene Breeda äa Voda,

³ un Juda wia Perez un Sera von de Tamar äa Voda, un Perez wia Hezron sien Voda, un Hezron wia Ram sien Voda,

⁴ un Ram wia Aminadab sien Voda, un Aminadab wia Nachschon sien Voda, un Nachschon wia Salman sien Voda,

⁵ un Salman wia Boas sien Voda, von de Rahab, un Boas wia Obed sien Voda von Rut, un Obed wia Jese (Isai) sien Voda,

⁶ un Jese wia dän Kjennich David sien Voda. Un David wia Salomo sien Voda, von Uria sienejewäsne Fru:

⁷ Un Salomo wia Roboam (Rehabeam) sien Voda, un Roboam wia Abija sien Voda, un Abija wia Asa sien Voda,

⁸ un Asa wia Joschafat sien Voda, un Joschafat wia Joram sien Voda, un Joram wia Usija (Usija) sien Voda,

⁹ un Usija wia Jotam sien Voda, un Jotam wia Ahas sien Voda, un Ahas wia Esekia (Hiskia) sien Voda,

¹⁰ un Esekia wia Manasse sien Voda, un Manasse wia Amon sien Voda, un Amon wia Josia sien Voda,

¹¹ un Josia wia Jekonja sien Voda, un siene Breeda to de Tiet aus see no Babel wajch jefieet worden.

¹² No däm daut see no Babel wajch jefieet wieren, Jekonja wia Schealtiel sien Voda, un Schealtiel wia Serubabel sien Voda,

¹³ un Serubabel wia Abijud sien Voda, un Abijud wia Eljakim sien Voda, un Eljakim wia Asor sien Voda,

¹⁴ un Asor wia Sadok sien Voda, un Sadok wia Achim sien Voda, un Achim wia Eliud sien Voda,

¹⁵ un Eliud wia Eleasar sien Voda, un Eleasar wia Matan sien Voda, un Matan wia Jakob sien Voda,

¹⁶ un Jakob wia Josef sien Voda, Maria äa Maun, von äa es Jesus jebuaren, dee doa Christus heet.

¹⁷ De Jeschlajchta von Abraham bot David sent 14, un von David bot see no Babel vebaunt (wajch jefieet) worden, sent 14 Jeschlajchta, un von donn aus see vebaunt worden no Babel bot Christus, sent wada 14 Jeschlajchta.

De Jeburt von Jesus

¹⁸ De Jeburt Jesus Christus wia soo: Aus siene Mutta, Maria, däm Josef aunvetrut wia, ea see toop kjeemen, wia see schwanga vom Heiljen Jeist.

¹⁹ Oba Josef, äa Maun, wia jerajcht un wull äa kjeene Schaund (vere Menschen) moaken, un neem sikj väa, äa heemlich to veloten.

²⁰ Aus hee daut heemlich plont, kjeem een Enjel vom Har em Droom no am, un säd: «Josef, David sien Sän, ha kjeene Angst, Maria to nämen aus diene Fru, dan daut Kjint en äa es vom Heiljen Jeist.

²¹ Un see woat eenen Sän jebäaren, un du saust am Jesus nanen, dan hee woat sien Volkj von äare Sinden raden».

²² Dit aules passieed oba, om daut erfelt wudd, waut von däm Harn derch dän Profeet jesajcht es, de doa säd:

²³ «Kjikj! De Junkfru woat schwanga (een Kjint to Welt brinjen) sennen, un woat eenen Sän jebäaren, un see woaren am dän Nomen Immanuel jäwen», {Jes.7,14} äwasat heet daut: Gott met ons.

²⁴ Aus Josef vom Schlop oppwuak, deed hee, soo aus däm Har sien Enjel am befoolen haud, un neem siene Fru no sikj;

²⁵ oba hee erkjand äa nich, bot see äaren Ieeschtjebuarnen Sän to Welt jebrocht haud; un hee jeef am dän Nomen Jesus.