Liera 1 - De Bibel JHF

Nutzloos es aul daut Irdische

¹ Wieed vom Liera, däm David sienem Sän, däm Kjennich en Jerusalem.

² Eitelkjeit (een ladjet Ekj) de Eitelkjeite! Sajcht de Liera; Eitelkjeit de Eitelkjeite! Aules es Eitelkjeit.

³ Wautverrem Jewenst haft de Mensch bie aul siene Mieej, met waut hee sikj bemieecht unja de Sonn?

⁴ Een Jeschlajcht jeit, un een Jeschlajcht kjemt; oba de Ieed besteit eewich.

⁵ Un de Sonn jeit opp un de Sonn jeit unja; un see spood sikj no äarem Uat, woa see oppjeit.

⁶ De Wint jeit nom Sieden, un dreit sikj nom Nuaden; sikj dreit un dreiend jeit hee, un no sienem Kjreisen kjemt de Wint trigj.

⁷ Aule Flusse gonen en daut Mäa, un daut Mäa woat nich voll; aun däm Uat, wuahan de Flusse gonen, doahan gonen see emma wada.

⁸ Aule Dinj mieejen sikj auf: Kjeena kaun daut utsaje; daut Uag woat vom seenen nich saut, un daut Ua nich voll vom Hieren.

⁹ Daut, waut jewast, es daut, waut sennen woat; un daut, waut passieet, es daut, waut passieren woat. Un daut es goa nuscht Nieet unja de Sonn.

¹⁰ Jeft daut een Dinkj, von däm maun sajcht: See, daut es nie, lenjst es daut jewast enne oole Tieden, dee ver ons jewast sent.

¹¹ Doa es kjeen Aundenkjen aun dee eenst wieren; un fa de Nokomende, dee sennen woaren, fa an woat daut uk kjeen Aundenkjen bie dän jäwen, dee nohäa sennen woaren.

¹² Ekj, de Liera, wia Kjennich äwa Israel, en Jerusalem.

¹³ Un ekj recht mien Hoat doaropp, aules met Weisheit too erforsche un to erkjanen, waut unja däm Himmel passieet: Een ieblet Jeschaft, daut Gott de Menschenkjinja jejäft haft, sikj doamet auftoploage.

¹⁴ Ekj ha aul de Doten jeseenen, dee unjre Sonn passieren; un kjikj, aules es Eitelkjeit un een utholen nom Wint.

¹⁵ Daut Kromme kaun nich jlikj woaren, un daut Fälende kaun nich jetalt woaren.

¹⁶ Ekj räd en mienem Hoat un säd: See, ekj ha Weisheit vejratat un vemieet äwa aule, dee ver mie äwa Jerusalem wieren, un mien Hoat haft de Menj von Weisheit un Erkjantnis jeseenen;

¹⁷ un ekj ha mien Hoat doaropp jerecht, Weisheit too erkjanen, un Onsenn un Noaheit too erkjanen: Ekj ha erkjant, daut uk daut een utholen no Wint es.

¹⁸ Dan bie väl Weisheit es väl Oaja: Un wäa Erkjantnis vemieet, vemieet Weedoag.