Kolossa 3 - De Bibel JHF

Trakj de oole Perseenlichkjeit ut un trakj de niee aun

¹ Aulsoo, wan jie met Christus sent oppjewakjt worden, soo sieekjt, waut bowen es, wua Christus es, settent to Rajchte Gottes.

² Tracht no daut, waut bowen es, nich no daut, waut oppe Ieed es;

³ dan jie sent jestorwen, un jun Läwen es vestoaken (vewoat) met Christus en Gott.

⁴ Wan Christus, ons (jun) Läwen, openboat woat, dan woa uk jie met am openboa woaren en Harlichkjeit.

⁵ Aulsoo, hoolt june Jläda aus Doot, de oppe Ieed sent: Huararie, Orreinheit, Liedenschoft, beeset Velangen un Habsucht, de Jetzendeenst sent;

⁶ wäajen de Lausta kjemt de Oaja Gottes äwa de onjehuarsome Säns;

⁷ unja dise uk jie eenst jewaundelt sent (ha), aus jie en dise Dinj (Jläda) läwden.

⁸ Oba nu lajcht uk jie daut aules auf: Oaja, Wutt, Boosheit, Lastren, onaunstendje Räd ut junem Mul.

⁹ Belicht eenaunda nich, doa jie däm oolen Mensch met siene Haundlungen utjetrocken ha,

¹⁰ un dän nieen aunjetrocken ha, dee niejemoakt woat to Erkjantnis no daut Bilt, von däm, dee am jeschaufen haft,

¹¹ wua nich Griech ooda Jud es, Beschniedunk un Onbeschnäden, Barbar, Skiet, Sklow, Frie, sonda Christus aules un en aulem.

¹² Aulsoo, trakjt aun, aus von Gott uterwälde Heilje un Jeleewde; een Erboarmen von Hoaten, Frintlichkjeit, Deemoot, Saunftmoot, Langmoot,

¹³ vedroacht eenaunda un vejäft (vezeit) eenaunda, wan eena ne Kloag haft jäajen däm aundren; aus uk de Har [Christus] junt vejäft haft, soo uk jie.

¹⁴ Oba to aul däm de Leew, dee daut Baunt de Vollkomenheit es.

¹⁵ Un de Fräd Christus rejieet (bestemt) en june Hoaten, to däm jie uk sent beroopen worden en eenen Lief; un siet dankboa.

¹⁶ Lot Christus sien Wuat rikjlich mank junt wonen, en aula Weisheit belieet un ermont junt unjarenaunda met Psalmen, Loffjesank un jeistliche Leeda, sinjt Gott en Jnod (em Jeist de Jnod) en june Hoaten.

¹⁷ Un aules, wautemma jie doonen, en Wuat ooda en Woakj, aules doot em Nomen vom Harn Jesus, dankt Gott, däm Voda, derch am.

Woo een scheenet Famieljenläwen schauft

¹⁸ Jie Frues, unjaordnet junt (june) de Mana, aus et sikj em Harn jeziemt.

¹⁹ Jie Mana, leeft (june) de Frues, un siet nich betta jäajen an.

²⁰ Jie Kjinja, jehorcht june Elren en aules, dan dit jefelt däm Harn.

²¹ Jie Vodasch, oajat june Kjinja nich en, doamet see nich mootloos woaren.

²² Jie Sklowen, jehorcht en aules june Haren nom Fleesch, nich mau wan see äare Uagen opp junt ha, bloos om Menschen to jefaulen, sonda met een eenfeltjet Hoat, däm Harn ferchten.

²³ Waut jie doonen, doot (wirkjt) daut von Hoaten aus fa däm Harn, un nich fa Menschen,

²⁴ dan jie weeten, daut jie vom Harn de Vejeltunk aus Oawgoot kjrieen woaren; däm Harn Jesus deent.

²⁵ Dan wäa orrajcht deit, woat daut Orrajcht kjrieen, waut hee jedonen haft; un doa es kjeen Aunseenen de Persoon.