Hosea 1 - De Bibel JHF

De Ehe un de Kjinja von Hosea wia aus een Sennbilt fa daut ontrue Israel – De Jnod enne Enjtiet

¹ Daut Wuat von Gott, daut aun Hosea, däm Sän von Beeri, wia en de Doag Usija, Jotam, Ahas un Hiskia, de Kjennichs von Juda, un aun de Doag Jerobeam, däm Sän Joasch, däm Kjennich von Israel.

² Aus de Har aunfunk met Hosea to räden, doa säd de Har to Hosea: Go han, nemm die eene Huarenfru un Huarenkjinja; dan daut Launt drift bestendich Huararie, vom Harn wajch.

³ Un hee jinkj han un naum Gomer, de Dochta von Diblajim; un see wort schwanga un jebua am eenen Sän.

⁴ Un de Har säd to am: Jeff am däm Nomen Jesreel; dan noch om een Kjlienet, soo woa ekj de Blootschult von Jesreel aun däm Hus Jehu strofen (Rach eewen) un däm Kjennichtum vom Hus Israel een Enj moaken.

⁵ Un daut woat passieren aun janem Dach, doa woa ekj däm Boagen Israel vebräakjen em Tol Jesreel.

⁶ Un see wia wada schwanga un jebua eene Dochta. Un hee säd to am: Jeff ar däm Nomen Lo-Ruhama (nich bejnodichte); dan ekj woa mie wiedahan däm Hus Israel nich mea erboarmen, daut ekj an irjentwoo vezei.

⁷ Oba däm Hus Juda woa ekj mie erboarmen un an raden derch däm Harn, äarem Gott; un ekj woa an nich raden derch Boagen un derch Schwieet un derch Kjrich, derch Pieed un derch Rittasch.

⁸ Un see wand de Lo-Ruhama auf. Un see wort schwanga un jebua eenen Sän.

⁹ Un hee säd: Jeff am däm Nomen Lo-Ami (nich mien Volkj); dan jie sent nich mien Volkj, un ekj, ekj well nich juna sennen.