Esra 1 - De Bibel JHF

Daut Trigjkomen de Juden no Jerusalem unja Serubabel un Jeschua

¹ Un aum ieeschten Joa Kierus, vom Kjennich von Persien, doamet daut Wuat Gottes ut däm Mul Jeremia erfelt wort, erwakjt Gott däm Jeist von Kierus, däm Kjennich von Persien; un hee leet een Roop utgonen derch sien gaunzet Kjennichrikj, un zwoa uk schreftlich, endäm hee säd:

² Soo sajcht Kierus, de Kjennich von Persien: Aule Kjennichrikjs de Ieed haft de Har, de Gott vom Himmel, mie jejäft; un hee haft mie befoolen, am een Hus en Jerusalem too buen, daut en Juda es.

³ Wäa emma unja junt ut sienem Volkj es, met däm es sien Gott, un hee go nopp no Jerusalem, daut en Juda es, un bu daut Hus Gottes, däm Gott Israels, hee es de Gott, dee en Jerusalem wont.

⁴ Un jiedra, dee äwajebläwen aun irjent eenem Uat, wua hee sikj opphelt, däm sellen de Lied von däm Uat unjastäten met Selwa un met Golt un met Hab un Goot un met Vee, buta de friewelje Gowen fa daut Hus Gottes en Jerusalem.

⁵ Un daut muaken sikj de Heipta de Vodahiesa von Juda un Benjamin, un de Priesta un de Leviten, een jiedra, däm sien Jeist Gott erwakjt, nopptogonen, om daut Hus Gottes en Jerusalem too buen.

⁶ Un aula, dee om an häa wieren, unjastäten an met selwanem un goldnem Jereetschoft, met Hab un Goot un met Vee un met Kostboakjeite, buta aulem, waut friewellich jejäft wort.

⁷ Un de Kjennich Kierus leet daut Jereetschoft vom Hus Gottes rutbrinjen, daut Nebukadnezar ut Jerusalem wajchjefieet un em Hus von sienem Gott jelajcht haud.

⁸ Un Kierus, de Kjennich von Persien, leet dee rutbrinjen unja de Oppsecht Mithredat, däm Schauzmeista; un disa tald dee däm Sesbazar, däm Ferscht von Juda, auf.

⁹ Un dit es äare Zol: 30 goldne Kommen, 1 000 selwane Kommen, 29 Massasch,

¹⁰ 30 goldne Kuffels, 410 selwane Kuffels met dobbelden Wieet, 1 000 aundret Jereetschoft.

¹¹ Aulet Jereetschoft von Golt un Selwa wieren 5 400. Daut aules brocht Sesbazar nopp, aus de Wajchjefieede ut Babel no Jerusalem noppjefieet worden.