Daniel 1 - De Bibel JHF

Daniel un siene Frind em Kjennichshoff en Babel

¹ Aum dredden Joa de Rejierunk von Jojakim, däm Kjennich von Juda, kaum Nebukadnezar, de Kjennich von Babel, no Jerusalem un beloagad dee.

² Un de Har jeef Jojakim, däm Kjennich von Juda, en siene Haunt, un eenen Deel däm Jereetschoft vom Hus Gottes; un hee brocht dee en daut Launt Sinear, en daut Hus von sienem Gott: Daut Jereetschoft brocht hee en daut Schauzhus von sienem Gott.

³ Un de Kjennich befool däm Aspenas, däm Bowaschten von siene Hoffbeaumte, daut hee von de Kjinja Israel, soo aus von däm Kjennichs Somen aus uk von dän Väanämen, Jinjlinje brinjt,

⁴ aun dän kjeen Fäla wia, un scheen vom utseenen un belieet en aule Weisheit un Erkjantnis rikj un met Ensecht begoft, un dee tichtich wieren, em Paulaust von Kjennich too stonen; un daut maun an de Schreften un de Sproak de Chaldäa lieet.

⁵ Un de Kjennich veordend an een Doagesäten von de Kjennichstofelkost un von däm Wien, dän hee drunk, un daut maun an dree Joa lank ertrakjt (belieet); un aum Enj dee selje sullen see ver däm Kjennich stonen.

⁶ Un daut wieren unja an, von de Kjinja Juda: Daniel, Hananja, Misael un Asarja.

⁷ Un de Bowaschta de Hoffbeaumte jeef an Nomes; un hee nand Daniel Beltschazar, un Hananja Sadrach, un Misael Mesach, un Asarja Abednego.

⁸ Un Daniel neem sikj en sienem Hoat väa, sikj nich met de Tofelkost vom Kjennich un met däm Wien, dän hee drunk, too veonreinjen; un hee bedd fa sikj däm Bowaschten de Hoffbeaumte, daut hee sikj nich veonreinjen must.

⁹ Un Gott jeef Daniel Jnod un Boarmhoatichkjeit ver däm Bowaschten de Hoffbeaumte.

¹⁰ Un de Bowaschta de Hoffbeaumte säd to Daniel: Ekj fercht mienem Harn, däm Kjennich, dee jun Äten un jun Jedrenkj veordnet haft; dan wuarom sull hee seenen, daut june Aunjesechta aufjemoagada wieren aus dee vonne Jinjlinje en junem Ella, soo daut jie mienen Kopp biem Kjennich schuldich moaken?

¹¹ Un Daniel säd toom Oppsechta, däm de Bowaschta de Hoffbeaumte äwa Daniel, Hananja, Misael un Asarja bestemt haud.

¹² Vesieekj daut doch met diene Kjnajchts 10 Doag, un maun jeef ons Jemies to äten un Wota to drinkjen;

¹³ un dan kaun ons Utseenen un Aunseenen de Jinjlinje, dee de Tofelkost vom Kjennich äten, ver die jeprooft woaren; un doo met diene Kjnajchts nodäm, waut du seenen woascht.

¹⁴ Un hee hieed opp an en dise Sach un vesocht daut 10 Doag met an.

¹⁵ Un aum Enj de 10 Doag wees sikj äa utseenen bäta un scheena aum Fleesch aus dautjanje aule Jinjlinje, dee de Tofelkost vom Kjennich auten.

¹⁶ Doa deed de Oppsechta äare Tofelkost un däm Wien, däm see drinkjen sullen, wajch un jeef an Jemiese.

¹⁷ Un dise 4 Jinjlinje, an jeef Gott Kjantnis un Ensecht en aule Schreft un Weisheit; un Daniel haud Vestentnis fa aule Jesechta un Dreem.

¹⁸ Un aum Enj de Doag, no dee de Kjennich an to brinjen befoolen haud, brocht an de Bowaschta de Hoffbeaumte ver Nebukadnezar.

¹⁹ Un de Kjennich räd met an; un unja an aula wudd kjeena jefungen aus Daniel, Hananja, Misael un Asarja; un see stunden ver däm Kjennich.

²⁰ Un en aule Sachen ennsechtsvollen Weisheit, von dee de Kjennich an fruach, funk hee an 10 mol kjlieekja, aus aule Schreftjelieede un Beschwäara, dee en sienem gaunzen Kjennichrikj wieren.

²¹ Un Daniel bleef bat toom ieeschten Joa det Kjennich Kierus.