Kolossa 4 - De Bibel

¹ Jie Haren, siet jerajcht un woo sikj daut jehieet to june Kjnajchts. Un denkjt doaraun, jie haben em Himmel uk eenen Harn.

Oppmuntren toom bäden

² Hoolt aun met bäden, siet waka un dankboa.

³ Bät uk fa ons, daut Gott mucht eene Däa opmoaken fa sien Wuat, un daut wie daut Jeheemnis von de Radunk derch Christus prädjen kjennen. Daut es wuawäajen ekj ensett.

⁴ Bät Gott doarom, daut ekj daut mucht soo kloa sajen aus ekj saul.

⁵ Läft weis ver dee, dee noch nich to de Jemeent jehieren. Un doot de Tiet goot brucken.

⁶ Jun räden saul emma leeftolich un intressaunt sennen. Bemieecht junt, eenen jiedren soo to auntwuaten, daut daut goot fa am es.

Jreessen toom Aufscheet

⁷ Woo daut met mie steit, woat Tiechikus, de leewa Brooda un trua Deena un Metkjnajcht em Harn, junt aules vetalen.

⁸ Dän schekj ekj junt han, daut jie weeten kjennen, woo ons daut hia jeit, un om june Hoaten opptomuntren.

⁹ Hee kjemt met onsen leewen un truen Brooda Onesimus toop, dee eena von junt es. Dee woaren junt aules vetalen, woo daut hia steit.

¹⁰ Aristarch, dee hia met mie toop aus Jefangna es, bestalt junt to jreessen, un soo uk Markus, Barnabas sien Fada. Junt es aul jesajcht worden, wan dee no junt kjemt, nämt am frintlich opp.

¹¹ Un Jesus, dän see Justus nanen, bestalt uk aulen to jreessen. Dit sent de eensje Juden, dee met mie toop fa Gott sien Rikj oabeiden, un dee sent fa mie een Troost jewast.

¹² Epafras, eena von junt un een Deena fa Christus Jesus, bestalt junt to jreessen. En siene Jebäda kjamft hee emma wada fa junt, daut jie muchten voljewossen em Gloowen stonen, un en aules jehuarsom to Gott sienen Wellen läwen.

¹³ Ekj saj von am, daut hee om junt un dee en Laodizea un Hierapolis sea besorcht es.

¹⁴ Ons leewa Frint Lukas, de Dokta, un Demas bestalen junt to jreessen.

¹⁵ Jreest de Breeda en Laodizea. Jreest Niemfa un de Jemeent en äa Hus.

¹⁶ Wan junt dis Breef ieescht väajeläst worden es, dan seet doano, daut dee uk enne Jemeent en Laodizea väajeläst woat. Un dan seet doano, daut jie uk dän von Laodizea läsen woaren.

¹⁷ Sajcht däm Archippus: See doano, daut du daut Woakj verechten deist, daut du em Harn jekjräajen hast!

¹⁸ Ekj, Paulus, schriew disen Gruss met miene ieejne Haunt. Denkjt aun mie em Jefenkjnis. Mucht de Jnod met junt sennen!