Filippa 1 - De Bibel

Gruss toom Aunfank

¹ Paulus un Timotäus, Christus Jesus siene Deena, schriewen no aule heilje en Christus Jesus en Filippi, un uk no de Jemeentenleida un Diakonen:

² Mucht Gott ons Voda un Jesus Christus ons Har junt Jnod un Fräd schenkjen!

Paulus, em Jefenkjnis wäajen daut Evangelium, bät fa de Jemeent

³ Ekj dank mienen Gott wan ekj aun junt denkj.

⁴ Un wan ekj fa junt aula bäd, bäd ekj fa junt met Freid,

⁵ wiels jie aum Evangelium deelnämen vom ieeschten Dach aun bat vondoag.

⁶ Ekj hab doarenn goode Hopninj, daut dee, dee daut goode Woakj en junt aunjefongen haft, dee woat daut uk foadich moaken bat aun Jesus Christus sienen Dach.

⁷ Wiels ekj junt em Hoat hab, es daut gaunz rajcht von mie, soo von junt to denkjen. Auf ekj en Kjäden sie ooda sestwua fa daut Evangelium stried un ensto, jie haben Aundeel aun de Jnod, dee mie jeschonken es.

⁸ Gott weet, woo sea ekj mie derch Christus Jesus von gaunzem Hoat no junt aula bangen doo.

⁹ Mien Jebäd es, daut june Leew toonämen kunn, en waut jie weeten un vestonen lieren.

¹⁰ Doaderch sell jie fauststalen lieren, waut daut aulabaste es, daut jie aun Jesus Christus sienen Dach rein un schultfrie sent.

¹¹ Jun Läwen woat voll sennen met rajchtet un goodet doonen daut derch Jesus Christus kjemt, un doaderch woat Gott jeieet un jeloft.

Derch Paulus siene Jefangenschoft woat de Goode Norecht noch mea vebreet

¹² Breeda, dit sell jie weeten, waut ekj derchjemoakt hab, haft metjeholpen, daut Evangelium to vebreeden.

¹³ Doaderch es aulen em Rejierungs Paulaust un uk aundre daut kloa jeworden, daut ekj wäajen Christus en dise Kjäden sie.

¹⁴ Un derch miene Jefangenschoft haben de mieeschte Breeda em Harn mea Moot jekjräajen, Gott sien Wuat noch driesta un forchtloosa to prädjen.

¹⁵ Wan daut uk soo es, daut eenje Christus ut Aufgonst un Striedsucht prädjen, soo doonen aundre daut doch ut goode Meeninj.

¹⁶ See doonen daut en Leew, wiels see weeten daut ekj hia sie, fa daut Evangelium entostonen.

¹⁷ Jane, dee Christus mea ut Aufgonst aus ut reinen Drief prädjen, meenen see woaren mie de Jefangenschoft noch schwanda moaken.

De Tookunft jehieet Christus

¹⁸ Oba waut es doaraun? Auf daut nu ut eenen opprechtjen ooda onopprechtjen Grunt kjemt, daut wichtichste es, daut Christus unja aule Omstend jeprädicht woat. Un doatoo frei ekj mie, un woa mie uk wieda freien.

¹⁹ Ekj weet, daut daut waut mie passieet es, derch june Jebäda un derch de Help von Jesus Christus sien Jeist, mie togooden deenen woat.

²⁰ Ekj hop un räakjen opp iernst doamet, daut ekj opp kjeenen Wajch woa toschaund woaren. Gaunz kloa un open un to aule Tiet saul Christus en mienem Kjarpa veharlicht woaren, gaunz jlikj auf derch läwen bliewen ooda stoawen.

²¹ Daut es soo wiels Christus mien läwen es, un stoawen es fa mie jewennen.

²² Wan ekj hia noch aum läwen bliew, meent daut fa mie noch mea fruchtboare Oabeit. Doawäajen weet ekj nich, waut ekj wälen saul.

²³ Mie trakjt daut sea no beid Sieden: Ekj hab Lost Aufscheet to nämen un bie Christus to sennen, waut doa wiet bäta wudd sennen.

²⁴ Oba wäajen junt es daut noch needja, daut ekj noch aum läwen bliew.

²⁵ Un wiels ekj doavon äwazeicht sie, weet ekj, daut ekj bie junt bliewen woa. Ekj woa methalpen, june Freid em Gloowen waussen to loten.

²⁶ Soo woa jie Christus Jesus noch jrata lowen wan ekj wada no junt kom.

Fa Christus kjamfen un lieden

²⁷ Seet bloos doano, daut jun Waundel met Christus sien Evangelium stemt. Auf ekj dan han kom ooda wajch bliew, ekj well von junt hieren, daut jie em Jeist jlikj jesonnen sent, un daut jie met ons toop fa dän Gloowen vom Evangelium kjamfen doonen.

²⁸ Un lot junt opp kjeenen Wajch von dee enjsten, dee jäajen junt sent. Fa dee bediet daut Vedaumnis, fa junt oba bediet daut Seelichkjeit, un daut es von Gott.

²⁹ Junt es daut om Christus sient haulwen jeschonken, nich mau aun am to jleewen, oba uk fa am to lieden.

³⁰ De Kaumf, dän jie haben, es deeselwja waut jie aun mie jeseenen haben un uk nu von mie hieren.