Efeesa 1 - De Bibel

Gruss

¹ Paulus, dän Gott sikj jewält haud Christus Jesus sien Apostel to sennen, no de heilje en Efesus, dee onsen Christus Jesus tru sent:

² Jnod met junt un Fräd von Gott, onsen Voda, un onsen Harn Jesus Christus!

Gott wiest en Christus woo väl hee ons räakjent

³ Ons Har Jesus Christus sien Gott un Voda sull doafäa jeloft woaren, daut hee ons, aus Himmelsbirja, aul de jeistliche Säajnungen jeschonken haft.

⁴ Wiels ea hee de Welt dän Grunt läd, haud hee ons bestemt en Christus, siene heilje oschuldje Kjinja to sennen.

⁵ Wäajen Gott siene Leew fa ons, haud hee daut soo enjerecht, daut hee ons derch Jesus Christus aunnämen wull aus siene ieejne Kjinja.

⁶ Nu kjenn wie nich aundasch aus siene groote Jnod lowen, dee hee ons haft tookomen loten derch sienen leewen Sän, Jesus Christus.

⁷ Derch Jesus, dee sien Bloot fa ons jejäft haft, sent wie loosjekoft,

⁸ un ons sent de Sinden vejäft derch de groote Jnod, dee en ons Läwen nenn kjeem, un ons de Uagen fa de Woarheit opmuak.

⁹ Gott haft ons sien Jeheemnis weeten loten, daut hee sikj haud väajenomen derch Jesus Christus verendach to brinjen,

¹⁰ wan siene bestemde Tiet ieescht wudd hia sennen. Dan woat hee aules, waut em Himmel un oppe Ieed es, unja een Haupt brinjen, un daut es Christus.

¹¹ En Christus haud hee ons em verut bestemt, siene Oawen to sennen, soo aus hee daut jeplont haud, un hee fieet aules soo ut aus hee daut well,

¹² soo daut wie, dee wie opp Christus hopten, de ieeschte wieren, dee siene Harlichkjeit lowen.

¹³ Un soo wia daut uk met junt, dee jie de Woarheit jehieet haben, wuaderch jie jerat worden un aun am jleewden. Dan tieekjend Gott junt met däm Heiljen Jeist.

¹⁴ De Heilja Jeist bircht doafäa, daut wie daut kjrieen, waut Gott ons vesproaken haft. Doawäajen well wie nu aula siene Harlichkjeit lowen!

Dank un Jebäd om jeistliche Weisheit

¹⁵ Von don aus ekj von junen Gloowen aun däm Harn Jesus hieed, un von woo jie aule heilje goot sent,

¹⁶ hia ekj nich opp, fa junt to danken un fa junt to bäden,

¹⁷ daut de Gott von onsen Harn Jesus Christus, de harlicha Voda, junt mucht dän Jeist von Weisheit un Ensecht schenkjen, am bäta kjanen to lieren.

¹⁸ Mucht hee junt de Ensecht jäwen em Hoat to venämen, woo groot de Hopninj es, dee hee fa junt reed haft, un woo groot un harlich daut Oafgoot es, daut aule heilje en Christus jekjräajen haben,

¹⁹ un daut jie bejriepen kjennen, waut fa eene riesje Krauft Gott en ons wirkjen lat, dee wie aun am jleewen.

²⁰ Daut es deeselwje jeistliche Krauft, dee hee bewees, aus hee dän Heilant vom Doot oppwuak un bie sikj to rajchte Haunt dän hechsten Ierenplauz em Himmel jeef,

²¹ huach äwa aule Macht un Jewault un aule Krauft un Harschoften, dee doa jenant woaren kunnen en dise Welt, ooda en dee, dee doa noch kjemt.

²² Gott haft dän Harn Jesus aules unja de Feet jelajcht un am aus väaschta äwa siene Jemeent jesat.

²³ De Jemeent es sien Kjarpa, en däm hee selfst läft, doaderch, daut see derch am un von am aules jekjräajen haft.