ROMTE 1 - Pathian Laisiangthou (BSI)

Chibaibukna

¹ Paul, Jesu Khrist sikha, sawltak hi ding a sap, Pathian Tanchinhoih lam a khenkhiak,

² Pathian in tuma lam a Laisiangthou a a zawlneite a a chiamsa,

³ A tapa, salam a David suan a piang tungtang thu,

⁴ Amah Pathian Tapa hihna bel misi lak a kipan thilhihtheihna toh a thohnawnna ziak a siangthouna Kha in Jesu Khrist, Toupa chi a a phuankhiak ahi.

⁵ A min ziak a ginna namchih lak a mi gingtasak ding in, amah ziak in hehpihna leh sawltak hihna i tangta hi;

⁶ huai lak ah nou leng Jesu Khrist sapte na hi uhi:

⁷ Rome khua Pathian deihtak, misiangthou a om ding a sapte tengteng kiang ah: Pathian i Pa leh Toupa Jesu Khrist kiang a kipan hehpihna leh lemna na kiang uah om hen.

Paul In Romete Veh A Tupna

⁸ Amasa in khovel tengteng ah na ginna uh a than ziak in na vek ua tung a ka kipahthu Jesu Khrist ziak in ka Pathian kiang ah ka gen hi.

⁹ Ka thumnate ah tawplou in na min uh ka lou nilouh ahi chih kei hon theihpihpa Pathian ahi a, amah ahi a Tapa Tanchinhoih gen a ka kha a a na ka sep gige pa pen;

¹⁰ Tu bek a na kiang ua ka hong theihna ding in Pathian thuthu a zinhun lemtang ka muh teitei theihna ding ka ngen hi.

¹¹ Na kipna ding ua khalam thilpiak banghiam nou ka honpiak theihna ding in nou honmuh ka ut thei mahmah ngal hi;

¹² Huai na ginna uh leh ka ginna a i kikhamuan tuah theihna ding ka chihna ahi.

¹³ Unaute aw, Jentel dangte kiang a ka sepgim gah ka muhtak bangmah in, noumau lak ah leng gahte ka muh theihna ding in na kiang uah tamveipi hong ka tumta chih na theihlouh uh ka deihkei hi; himahleh tuma teng in dal in ka om hi.

¹⁴ Grik mite leh melmak mite kiang ah bat ka nei a; mi pil leh mi pilloute kiang ah leng.

¹⁵ Huchi in nou Rome khua a omte kiang ah leng Tanchinhoih gen ka ut mahmah hi.

Gospel Thilhihtheihna

¹⁶ Tanchinhoih tuh ka zahpih kei a; kuapeuh a gingta phot ading in hotdamna ding a Pathian thilhihtheihna ahi ngal a; a tung in Judami adin ahi a, huan Grik mi ading in leng a hong hinawn hi.

¹⁷ Huai ah tuh gin semsemna ding in ginna in Pathian diktatna latsak in a om hi; “Midiktat tuh ginna in a hing ding,” chi a gelh bang in.

Khelhna Tung a Pathian Thangpaihna

¹⁸ Thutak dikloutak a dalte leh Pathian limsaklouhna leh diktatlouhna tengteng tung ah van a kipan in Pathian thangpaihna a hong kilangta hi;

¹⁹ Pathian in a theihsak tak ziak in Pathian tanchin theihtheih ding tuh a lungsim uah chiangtak a theihsak in a om ngalta hi.

²⁰ Khovel siamtung a kipan a pianken muhtheihlouh, a tangtawn thilhihtheihna leh a Pathianna, thilsiamte ah chiantak a muhtheih ahi; huaiziak in paulam ding a neikei uhi;

²¹ Pathian thei ngal in Pathian bang in a pahtawi kei ua. A kipahthu leng a gensam kei uhi; thil thulimlou a ngaihtuah zawta ua, a lungtang hai uh a hong mialta hi.

²² Pil kisa khem in mihai a hongsuak ua,

²³ setheilou Pathian thupina a sethei mihingte leh vasate, gamsate leh bokvak ganhingte lim a suaksak uhi.

Jentelte Khelhna

²⁴ Huaiziak in a sa uh zumhuaipi a kibawltuah ding in a lungtang uh duhgawlna bang a thilnin hihphal in Pathian in a lehngatsan hi.

²⁵ Pathian thutak tuh zuau tangsak in, a bawlpa biak sang in a bawl bia in a na a sem uhi. A bawlpa tuh tangtawn a phat tuak ahi, Amen.

²⁶ Huaiziak in Pathian in zumhuaipi a huk phal in lehlam a ngatsanta hi; a numeite nangawn un leng a omdan pianpih uh danlou bang a om ding in a kibawl lamdang uhi;

²⁷ pasalte’n leng numei zatdan ngeina tawpsan in, huk in a kienlah ua, pasal leh pasal zummawh thilhih in a om ua, a gitlouh man muh ding uh tuh a satung uah a mu uhi.

²⁸ Huan Pathian theih a utlouh ziak un, thil kilawmloute hih ding a a deihlouh lam lungsim neih phal in Pathian in a lehngatsanta hi;

²⁹ Huchi in diktatlouhna, gitlouhna, huaihamna, huatna in a dim ua; hazatna, tualthahna, kiselna, khemna, nundan hoihlou in a dim uhi;

³⁰ gensiatnate, migennate, Pathian huatlamte, kisaktheihnate, kisatheimite, thil gilou bawlkhete,

³¹ nu leh pa thu mangloute, theihna beite, thuchiam susete, itna pianpih neiloute, hehpihna neiloute ahi uhi.

³² Huchibang hihte tuh sitak ahi uh chih Pathian dan tuh theigige in, amau kia a hih leng hilou in, midang hih zelte tung ah leng a kipak uhi.