EKSODAS 1 - Pathian Laisiangthou (BSI)

Israelte Aigupta Ah Hihgentheih In A Om Uh

¹ Huan, hiaite Aigupta gam a honglut, Israel suante min ahi: Michih leh a inkawte Jakob toh hongtonte.

² Reuben, Simeon, Levi leh Judah.

³ Issakar, Zebulun leh Benjamin.

⁴ Dan leh Naphtali, Gad leh Asher.

⁵ Jakob tai apan hong pawtkhia mi tengteng sawmsagih ahi uhi Joseph bel Aigupta gam ah a na om khinta hi.

⁶ Joseph leh a unau tengteng leh a suan tengteng leng a sita uhi.

⁷ Israel suante’n gah a suang ua, tampi in a khang ua, a kibehlap ua, hat petmah in a hong hatkhia ua; a gam a hong dimta uhi.

⁸ Joseph theilou, Aigupta gam ah kumpipa thak a hong omta hi.

⁹ Aman a mite kiang ah, “En un, Israel suan mipite ei sang in a tam zaw ua, a hatzaw uhi.

¹⁰ Kisa un, piltak in amau i bawl ding uhi. Huchilou in zaw a hong kibehlap lap ding ua, hichi a honghi dia, kidouna a hongom chiang in, i melmate lam ah a pang ding ua, ei a hondou kha ding uhi, huchi in gam apan a pawtsan kha ding uhi” a chi hi.

¹¹ Huaiziak in puakgikte a amau hihgim ding in a tung uah nasem heutu a koihta uhi. Huchi in, Pharo ading in khopite, Pithom leh Rameses a lamta uhi.

¹² Himahleh amau a hihgim semsem uleh, a kibehlap semsem ua, a khang semsem uhi. Huchi in Aiguptate’n Israel suante a lau mahmah uhi.

¹³ Huaiziak in Aiguptate’n Israel suante gimtakin nna a semsak uhi.

¹⁴ nasep haksa in a hinna uh nuamloutakin a bawlsak ua, buan mante leh teklei bawl in gamlak a nna chiteng sem in, nakpitak in nna a semsak uhi.

¹⁵ Aigupta kumpipa’n Hebru naudommite kiang ah thu a gen a, huaite lak a khat min Siprah ahi a, a dang khat min Puah ahi.

¹⁶ “Hebru numeite lak a nau na dom chiang un, tutphah tung ah en unla, tapa ahihleh na that ding ua, tanu ahihleh na hawi ding uhi” a chi hi.

¹⁷ Himahleh naudommite’n Pathian a lau ua, Aigupta kumpipa’n thu a piak bang a hihlou in, pasal naupangte a hinghawi uhi.

¹⁸ Aigupta kumpipa’n naudommite a samsaka, a kiang uah, “Bangdia hiai thilhih a pasal naupangte hinghawi na hi ua?” a chi hi.

¹⁹ Naudommite’n Pharo kiang ah, “Hebru numeite Aigupta numeite bang ahihlouh ziak un, a tei ngal ua, naudommite a kiang uh a tun ma un a neikhin zel uhi” a chi uhi.

²⁰ Huaiziak in Pathian in naudommite a kem hoih a, huchi in mite a hong kibehlap ua, a hat mahmah uhi.

²¹ Huchi in naudommite’n Pathian a lauh ziak un inkuante a bawlsakta hi.

²² Pharo in a sikha tengteng thupia in, “Tapa hongpiang peuhmah lui ah na pai ding ua, tanu hong piang peuhmah na hinghawi ding uh,” a chi hi.