DANIEL 1 - Pathian Laisiangthou (BSI)

Daniel Leh A Lawmte Tangthu ( 1.1—6.28 ) Nebukadnezzar Vaihawmna Inpi a Judah Tuailaite

¹ Judah kumpipa Jehoakim vaihawm kum thum kum in Babulon kumpipa Nebukadnezzar hong kuan in Jerusalem a hongum hi.

² Huan Toupa’n Judah kumpipa Jehoakim a khut ah a pia a, Pathian in a tuium-belsuan khenkhat toh; aman Sinar gam ah a pathian inn ah huaite a pita hi: huchi in tuium belsuante a pathian sumkoihna inn ah a lalutta hi.

³ Kumpipa’n a michilgehte heutupa Aspenaz, Israel tate lak a kuate hiam, kumpi chite a kipan leh milian te a kipan honpi ding in a kiang ah thu a gen hi.

⁴ Tuailaite amau a gensiatna omlou, himahleh hoihtak a deihsakna tang leh, pilna tengteng a siamtheihna leh pilna theihsiamna lungpilte, kumpipa Inpi ading thei ding, huchibang mite; huchi a Kaldai laisiamna leh pau amaute a sinsak theihna ding in.

⁵ Huchi in kumpipa’n amau ni teng tantuan ding in kumpipa an leh a dawn uain a kipan in a sehsak a, huchi a kum thum vakthau a a omtheihna ding un; huchi a huai hun bei chiang a kumpipa ma a adin theihna ding un.

⁶ Huchi in hiaite lak ah, Judah tate a kipan, Daniel, Hananiah, Misael leh Azariah a om uhi.

⁷ Michilgehte heutupa’n amaute min ding a phuahsaka; Daniel min ding in Belteshazzar; Hananiah min ding in Sadrak; Misael min ding in Meshak leh Azariah min ding in Abednego a phuak hi.

⁸ Himahleh Daniel in kumpipa an hiam a dawn uain hiam a ki hihnit louh a lungtang in a tum chiltel hi. Huaiziak in michilgeh heutupa kiang ah a ki hihnit louhna ding in a ngenta hi.

⁹ Huchi in Pathian in Daniel michilgehte heutupa mitmuh in deihsakna leh lainatna a musak hi.

¹⁰ Huan michilgehte heutupa’n Daniel kiang ah, “Ka toupa kumpipa na an uleh na dawn uh seppa ka kihta: bangding in na khanvual pih uh tuailaite sang a na mel uh hoihlou zaw a honmu ding ahia oi? Huchi in kumpipa lak ah ka lutang na lauthawngsak dia hia?” a chi hi.

¹¹ Huchi in Daniel in sumkempa, michilgehte heutupa’n Daniel, Hananiah, Misael leh Azariah tung a a sehpa kiang ah:

¹² “Na sikhate ni sawm sung enkhia in, k’on ngen hi; nek ding in anteh louhing leh dawn ding in tui honpia uhen.

¹³ Huaichiang in na ma ah ka mel uleh amau kumpipa annete tuailaite mel et hi hen; na muh bang in, na sikhate tung ah hih in” a chi hi.

¹⁴ Huchi in amau thu a ngaikhia a, ni sawm sung a enkhia hi.

¹⁵ Ni sawm a bei in tuailai kumpipa annete tengteng sang in a mel uh hoihzaw in a kilang a, a sa uh leng a thau zaw hi.

¹⁶ Huchi in sumkempa’n a an uleh a dawn ding uh uain a lamang a, amaute kiang ah anteh louhing a pe zawta hi.

¹⁷ Hiai tuailai lite a hih uleh Pathian in amaute kiang ah laisiamna leh pilna tengteng a theihna leh kivakna a pia a: huchi in Daniel in mengmuhna leh mang tengteng ah theihsiamna a nei hi.

¹⁸ Kumpipa’n amaute hon pilut ding a chih nite a bei in michilgehte heutupa’n amaute Nebukadnezzar ma ah a honpi hi.

¹⁹ Kumpipa’n amau a houlimpih a; amau lak ah Daniel, Hananiah Misael leh Azariah bang kuamah muh in a omta kei hi: huaiziak in kumpipa ma ah a dingta uhi.

²⁰ Huchi in pilna leh theihsiamna thu chiteng, amaute kumpipa’n a dotte ah a gamsung a om mitkhialdawi tawi leh bummi tengteng sang in a mun sawm a hoihzaw in amaute a mu hi.

²¹ Daniel kumpipa Kura kum khat vaihawm tanpha hial in a paisuak tou hi.