Паволонь сёрмазо Филиппав 2 - Од Вейсэньлув 2006

Уледе Христосонь кондямокс!

¹ Бути Христос марто вейсэндямось максы тенк вий, бути Сонзэ вечкемась кенярдовты-оймавты тынк, бути тынк ули вейсэньгалема Пазонь Оймеялтонть марто, бути тынь путтадо седеймарямо ды мелявкс вейкенк-вейкенк туртов,

² сестэ монь кенярксом пештинк пряс сеньсэ: улезэ ютксонк вейке мель. Вейкетьстэ вечкеде вейкенк-вейкенк эйсэ, вейсэндядо оймесэнк-седейсэнк, ды бажамонк-арсеманк улест вейкеть.

³ Мезеяк илядо тейне эсь меленк витеманзо кисэ ды прянк невтеманзо кисэ. Мекевланк, апак покшкавтне ловодо лиянть эстеденк вадрякс.

⁴ Кадык эрьвась эйстэнк мелявты аволь ансяк эсь прядонзо, истя жо лиятнедеяк.

⁵ Кадык тынк меленк-арсеманк вейкенк-вейкенк туртов кармить улеме Христос Иисусонь кондят:

⁶ Сонзэ свал ульнесь Пазонь чачозо, ансяк Сон вийсэ эзь кирде Пазонть марто Эсензэ вейкетьксчинть.

⁷ Мекевланк, Сон Эсь мелензэ коряс кадызе весементь, теевсь урень кондямокс ды чачсь ломанекс. Сон весемесэ ульнесь ломань ёнов молицякс.

⁸ Сон вишкиньгавтызе-алкиньгавтызе Эсь прянзо ды ульнесь кунсолыцякс куломазонзо – натой крёст лангсо куломазонзо.

⁹ Тень кисэ Пазось кепедизе Сонзэ весемеде сэрейстэ ды казсь Тензэ лем, конась весе лемтнеде ине.

¹⁰ Секс Иисусонь лементь инексчинзэ икелев весе прыть кумажа лангс менель лангсояк, масторлангсояк ды мода потсояк,

¹¹ ды эрьва келесь ёвты: Иисус Христос – Азоро. Те весе – Тетя Пазонть шнамос.

Уледе весенень сияждыця тештекс!

¹² Истя, монь вечкевиксэнь, тынь свал ульниде монь кунсолыцят, зярдо ульнинь мартонк. А вана ней, зярдо мон мартонк арасян, уледе седеяк кунсолыцякс! Пазонь мельде пелезь ды талнозь тееде весементь эсенк идеманк кисэ,

¹³ секс мекс тынк эйсэ важоди Сонсь Пазось, кона Эсь паро арсеманзо коряс сыргозти тынк мельтнень ды тевтнень.

¹⁴ Весементь тееде эсь юткованк апак пелькста ды апак кавтолдо.

¹⁵ Сестэ тынь ультядо ачумондовицякс ды ваньксэкс, Пазонь асатыкстэме эйкакшокс, конат эрить неень пингень колазь ды пежетев ломантнень ютксо. Сияждодо сынст ютксо истя, кода менель лангсо тештетне!

¹⁶ Истямо ладсо, кандодо эрямонь максыця Кулянть! Ды сестэ, Христосонь само чистэнть, мон шнаса прям тынк эйсэ: аволь стяко мон чиия монень онкстазь кинть, аволь стяко маштыя вием те важодемасонть!

¹⁷ А вана бути монень сави максомс мик эрямомгак, кода топавтома се аноксонтень ды важодемантень, конань Пазонтень теи тынк кемемась, сестэяк мон карман кенярдомо ды карман кенярдомо тынк марто вейсэ!

¹⁸ Кенярдкшнодо тыньгак, кенярдкшнодо монь марто вейсэ!

Тимофейде ды Эпафродиттэ

¹⁹ Монь ули седейнежедьксэм: бути тень мери Иисус Азорось, паряк, курок кучса тенк Тимофеень. Сестэ моньгак ойми-кенярды седеем, зярдо марян, кода молить тынк тевенк.

²⁰ Эдь монь арась лия, Тимофеень кондямо, ве мельсэ арсиця ломанем, кона седейшкава мелявтоволь тынк кисэ.

²¹ Весе лиятне вешнить ансяк эсест туртов, ды аволь сень, кода важодемс Иисус Христоснэнь.

²² Тынь тынсь содатадо, кодамо кемевиксэкс невтизе прянзо те ломанесь: сон Кенярксов кулянть кисэ важодсь мартон, кода цёра тетянзо марто.

²³ Истя, монь ули седейнежедьксэм: кучса сонзэ сеске жо, зярдо ансяк карман содамо, мезе лиси монь тевтнень марто.

²⁴ Истямо ладсо, мон домкасто кеман: бути тень мери Азорось, курок монськак сан тенк.

²⁵ Мон ловия эрявиксэкс кучомс тыненк мекев минек кемиця ялганть Эпафродитэнь. Сон монь марто важодицям ды вейсэнь тевенек кисэ аштиця ялгам, конань тынь кучокшнынк монень лездыцякс, зярдо те монень эрявкшнось.

²⁶ А ней тынь мариде сонзэ сэредемадо. Секс сон пек ризны-тошнакали тынк кисэ, тарка-эзем эстензэ а мукшны.

²⁷ Те виде, сон кармась сэредеме ды цють эзь куло. А вана Пазось путсь тензэ седеймарямо ды аволь ансяк сонензэ, нама, моненьгак. Эдь Сонзэ арасель мелезэ седеяк стакалгавтомс монь ризксэнть-мелявксонть.

²⁸ Секскак мон кучса Эпафродитэнь тыненк мекев ды пек куроксто! Тень кувалт тыненккак карми улеме кеняркс, зярдо таго сонзэ несынк, ды моньгак машты вейке ризксэм.

²⁹ Истя, инеськеть, вастынк сонзэ кенярдозь, кода Азоронтень кемиця. Ловодо истят ломантнень.

³⁰ Сон Христосонь тевенть кисэ ульнесь кулома лангсо. Сон эзь пеле путомс эсь эрямонзо монень лездамонть кисэ, кона тыненк эзь максово монень.