Паволонь сёрмазо Филемоннэнь 1 - Од Вейсэньлув 2006

Шумбракстнемат

¹ Мон, Павол, кона ашти пекстазь Иисус Христосонь кисэ, ды Тимофей, кемиця ялгась, кучтано шумбракстнемат минек марто вейсэнь тевсэ важодицянтень, вечкевикс Филемоннэнь,

² ды кемицянь куронтень, кона пурнавкшны тонь кудосо, истя жо Апфиянень, вечкевикс кемиця сазоронтень, ды вейсэнь тевень теиця минек Аркип ялгантень.

³ Улезэ тенк чансть ды седейоймамо Пазонть, минек Тетянть, пельде ды Иисус Христос Азоронть пельде!

Филемононь вечкемазо ды кемемазо

⁴ Мон ёвтан сюкпря эсень Пазонтень свал, зярдо эсь озномасон ледстнян мельс тонь,

⁵ секс мекс мон маринь тонь кемемадот Иисус Азоронтень ды вечкемадот Пазонь весе ломантненень.

⁶ Ды мон ознан: кадык минек вейсэнь кемеманок лезды тонеть седе домкасто содамс-чарькодемс весе се паронть, конась тыненк максозь Христос Иисус марто вейсэндямонть вельде.

⁷ Тонь вечкемась, кемиця ялгам, монь пек кенярдовтымим ды ладсимим-кемекстымим, секс мекс тонь вельде Пазонь ломантнень седеест оймасть-виензасть.

Павол энялды Онесимень кисэ

⁸ Христос марто вейсэндямонть кувалт монь ули вием кармавтомс тонь тееме сень, мезе эряви.

⁹ Ансяк мон ялатеке лован седе парокс пшкадемс теть энялдома марто, секс мекс вечктян тонь. Те мон, Павол, уш сыре ломанян ды ней Иисус Христосонь кисэ пекстазян,

¹⁰ энялдан тонеть Онесимень* кисэ, кона теевсь Пазнэнь кемицякс монь вельде ды истя жо монень цёракс тесэ, пекстамо кудосо.

¹¹ Зярдо-бути сон ульнесь тонеть лезэвтемекс, а вана ней сон кармась улеме лезэвекс* тонетькак ды моненьгак. Мон кучса сонзэ мекев.

¹² Тон жо вастык сонзэ кода монь седейбельксэм.

¹³ Монь ульнесь пек покш мелем кадомс сонзэ эсень марто: тонь таркас сон лездаволь монень тесэ, косо мон пекстазян Кенярксов кулянть пачтямонзо кисэ.

¹⁴ Ансяк монь арасель мелем теемс мезеяк тонь апак кевкстне. Кадык тонь паро тевесь ули теезь эсеть мелеть коряс, аволь вийсэ кармавтомань коряс.

¹⁵ Паряк, Онесим секскак ульнесь явозь тонь эйстэ зярыя шкас: улемс тензэ тонь марто теде мейле пингеде пингес.

¹⁶ Ней сон уш ули аволь кода уре, а уренть коряс ламодо седе питней, кода вечкевикс кемиця ялга. Сон монень пек вечкевикс, кодамо жо сестэ вечкевиксэкс сон карми улеме тонеть, кода ломань ды кода Азоронтень кемиця ялгат!

¹⁷ Истямо ладсо, бути тон ловат монь вейсэнь тевень теиця ялгакс, сестэ вастык Онесимень истя, кода вастовлимик монь.

¹⁸ Ды бути сон тонь икеле тейсь кодамояк чумо эли ули теть кодамояк долкозо, сестэ тень ловик монь лангс.

¹⁹ Вана мон, Павол, сёрмадан эсь кедьсэнь: мон тень пандса тонеть. Мон уш а кортан седе: тонгак монь икеле долксат мик эсь прясот.

²⁰ Истя, кемиця ялгам, ней максык монень те лезксэнть Азоронть кисэ. Кенярдовтык-оймавтык монь седеем кода Азоронтень кемиця ялга!

²¹ Мон сёрмадан теть, секс мекс кеман: тон монь кунсолосамак. Содан, тон теят, натой, седеяк пек ламо монь вешеманть коряс.

²² Теде башка, анокстак монень лоткамо тарка. Мон кеман: Пазось тынк озноманк кисэ макссамам-казьсамам монь тыненк.

Меельце паро мельтне-арсематне

²³ Тонеть кучить шумбракстнемат Эпафрас, ялгам, кона монь марто пекстазь Христос Иисусонь кисэ,

²⁴ истя жо Марк, Аристарк, Демас ды Лука, монь марто вейсэнь тевсэ важодиця ялгатне.

²⁵ Минек Иисус Христос Азоронть чанстесь улезэ мартонк! Аминь.