Марк 3 - Од Вейсэньлув 2006

Иисус оймсема чистэ шумбралгавты коське кедь ломань

¹ Иисус таго сась синагогав. Тосо ульнесь цёра, конань кедезэ коськезель.

² Фарисейтне тосо пек вансть Иисус мельга, шумбралгавтсы-арась цёранть оймсема чистэ. Сынь вешнесть Сонзэ чумондомань тувтал.

³ Сон мерсь коське кедь ломанентень: «Стяк ды арак икелев».

⁴ Мейле кевкстинзе: «Мезе теема оймсема чине, паро эли берянь? Идемс эрямонть эли ёмавтомс?» Сынь чатьмонсть.

⁵ Сестэ Сон кежевстэ варштась лангозост, пек ризнэзевсь калгодо седеест кувалт ды мерсь се ломанентень: «Венстик кедеть». Сон венстизе, ды кедезэ теевсь таго шумбракс, омбоценть кондямокс.

⁶ Тосто лисемадо мейле, фарисейтне вейсэ Иродонь ломантнень марто сеске пурнасть промкс, кармасть арсеме, кода маштомс Иисусонь.

Иисусто кулясь келейстэ срали

⁷ Иисус тусь эсь тонавтницянзо марто эрьке чирес. Мельганзо мольсть ламо ломанть Галилеясто, Иудеясто,

⁸ Ерусалимстэ, Идумеясто ды Иордан леень тона пельдеяк, натой Тир марто Сидононь ёнкстнэстэяк. Кулясь сонзэ тевтнеде срадсь эрьва кува, ламо ломантне пертьпельде ютасть тензэ.

^9-10 Сон ламотнень се чистэнть шумбракс теинзе, секс сэредицятне ансяк сонзэ эйс токадевемань кисэ пек эцесть ёнонзо. Сон мерсь тонавтницянстэнь кирдемс аноксто тензэ венченть сень кисэ, иляст карма ломантне ваксозонзо пек эцеме.

¹¹ Аванькс оймеялтнэяк, сонзэ неезь, пракшность икелензэ ды пижнесть: «Тон Пазонть Цёразо!»

¹² Иисус эйсэст кежевстэ кардась, иляст ёвтне, кие сон.

Иисус кочки кемгавтово апостолт

¹³ Мейле Иисус кузсь пандо пряс, тердинзе Эстензэ кочказь кемгавтовотнень. Сынь тусть мартонзо.

¹⁴ Сон путынзе неть кемгавтовотнень улемс свал мартонзо, кучнемс сынст Кенярксов кулянть ёвтнеме

¹⁵ ды максомс тенст азорксчи шумбралгавтнемс ормадо ды пансемс идемевстнень.

¹⁶ Вана неть кемгавтовотнень лемест: Симон, конанень Иисус путсь лем Петра,

¹⁷ Зеведеень Яков ды Иоанн ялаксозо, – сыненст Сон путсь лем Боанергес, лиякс: Пурьгинень зэрть цёрат, –

¹⁸ Андрей, Филип, Бартоломей, Матвей, Фома, Алфеень цёразо Яков, Таддей, Симон Кананит*

¹⁹ ды Искариотонь Иуда, кона мейле миизе Иисусонь.

Иисусонь чумондыть Сатанань виень тевс нолдамосо

²⁰ Зярдо Иисус ды тонавтницятне састь кудов, тозо таго промсть ламо ломанть, секс Сонензэ тонавтницянзо марто натой ярсамскак а зярдоль.

²¹ Кода теде марясть малавикс инеськензэ, састь тов Иисусонь саеме. Сынь кортасть, Сон, нать, превстэ лиссь.

²² Вана Ерусалимстэ сазь Койс тонавтыцятне кортасть: «Сонзэ эйсэ Вельзевул, Сон идемевстнень прявтост вийсэ панси идемевсть».

²³ Сестэ Иисус сынст тердинзе Эстензэ ды кортась тенст валвелявкссо: «Кода истя Сатанантень паневи эсь прязо?

²⁴ Вана мастороськак а ванстови, явовиндеряй пельксэнь пелькс ды тюрьгадындеряй эсь юткованзо.

²⁵ Кудораськеськак, конасонть свал шкань пелькстамот, а ванстови.

²⁶ Истя Сатанаськак стиндеряй эсензэ каршо ды виезэ явовиндеряй кавтов, кодаяк сестэ сон а кирдеви, сонензэ сась пе.

²⁷ Кияк виев ломанень кудоскак а эцеви ды киненьгак сонзэ ули-парозо а нельгеви, бути васняяк виевенть а сюлмсесы. Мейле ансяк сон саласы весе ули-паронзо.

²⁸ Видестэ кортан тенк: эрьва кодамо пежетть ды Пазонь сялдомат-покордамот, кода ансяк авольть сялдо-покорда, нолдавить ломантненень.

²⁹ Бути вана кияк ёвты сялдома-покордамо вал Пазонь Оймеялтонть лангс, сень пежетесь зярдояк а нолдави. Се ломаненть лангс кадови пингеде пингень чумондома».

³⁰ Сон истя мерсь тенст секс, мекс сынь кортасть, келя Сонзэ потсо аванькс оймеялт.

Иисусонь авазо ды братонзо

³¹ Тов састь Иисусонь авазо, братонзо. Кудонтень эзть соваво, кучсть Сонзэ тердеме.

³² Сонзэ перька озадо аштесть ломанть, сынь ёвтасть Тензэ: «Вана Тонь ават, братот ды сазорот ушосо вешнить Эйсэть».

³³ Сон мерсь каршост: «Кие Монень ава, кить Монень братт?»

³⁴ Сестэ варштась перьканзо озадо аштицятнень лангс, мерсь: «Вана Монь авам ды братон!

³⁵ Кие топавты Пазонть мелензэ, се Монь братом, сазором ды авам».