Лука 1 - Од Вейсэньлув 2006

Ушодкс

¹ Ламот уш кармасть сёрмалеме ёвтнемат сеть тевтнеде, конат топавтовсть минек ютксо.

² Неть тевтнеде минь карминек содамо сеть ломантнень пельде, конат ушодовомстост ульнесть сынст неицякс ды теде мейле теевсть Пазонь валонь пачтицякс.

³ Секс моненьгак сась мель весе тень, ушодкссто саезь, домкасто вешнезь ды чарькодезь, сёрмадомс мельга мельцек тонеть, вечкевикс Теофил.

⁴ Те седеяк пек кемекстасы эйсэть се тонавтомань видечинть, конанень тонавтозят.

Икелев ёвтамось Нававтыця-Лемдиця Иоаннонь чачомадо

⁵ Сеть шкатнестэ, зярдо Иудеянь инязорокс ульнесь Ирод, тосо эрясь Захария попось. Сон ульнесь Авиянь* чиполасто. Захария ды сонзэ низэ Елизавета лиссть Арононь буестэ-раськестэ.

⁶ Сынь кавонест эрясть Пазонть икеле видечинь коряс ды топавтсть седейшкава Азоронть весе кармавтовкстнэнь ды меревкстнэнь.

⁷ Сынст арасельть эйкакшост: Елизавета ульнесь а чачтниця, ды иесткак ламольть.

⁸ Ды вана весть, зярдо сась Захариянсетнень чиполаст, Захария, кода поп, важодсь Пазонть икеле.

⁹ Поптнэнь юткова важодемань тевтнень явомсто Захариянень сатотсь совамс Азоронь кудонтень ды теемс ладансо сувтамо алтарь лангсо.

¹⁰ Те сувтамо шкастонть ламо ломанть озность ушосо, Пазонь кудонь пирявксонть потсо.

¹¹ Апак учо Захариянь икелев лиссь Азоронть ангелэзэ, кона аштесь вить ёно сувтамо алтаренть эйстэ.

¹² Зярдо Захария неизе ангелэнть, сон абунгадсь ды пек тандадсь.

¹³ Ангелэсь мерсь тензэ: «Иля пеле, Захария, тонь озномат марязь: Елизавета, тонь нись, чачты теть цёра, ды тон путт тензэ Иоанн лем.

¹⁴ Сон тонь туртов карми улеме кенярксокс ды уцяскакс, ды ламот кармить кецямо сонзэ чачомантень.

¹⁵ Эдь сон карми улеме ине ломанькс Азоронть икеле, зярдояк а карми симеме винадо ды лия кеме симемапельде. Сон уш аванзо пекесэ пештяви Иневанькс Оймеялтсо.

¹⁶ Иоанн велявтсынзе ламо Израилень ломантнень Азоронтень, сынст Пазонтень.

¹⁷ Сон сы Азородонть икеле, пештязь истямо жо оймеялтонь вийсэ, кода Илия. Иоанн велявтсынзе тетятнень седеест эйкакштнэнь ёнов, ды ломантне, конат те шкас эзть кунсоло Пазонть, уставить арсеме, кода видечинь коряс эрицят. Истя сон анокстасы раськенть Азоронь самонтень».

¹⁸ Захария кевкстизе ангелэнть: «Косто монень содамс: те видечи эли аволь? Мон сырян, ды нинтькак ламо иензэ».

¹⁹ Ангелэсь ёвтась каршонзо: «Мон – Гавриил, Пазонть икеле аштицятнестэ вейкесь. Мон кучозян тонь марто кортамо ды тонеть те кенярксов кулянть пачтямо.

²⁰ Нейке тонь кундаты келеть ды кармат улеме акортыцякс се шкас, зярс весе ёвтазесь а топавтови. Истя лиси тонь марто монь валтнэс акемемат кисэ. Монь валтнэ топавтовить эсь шкастост».

²¹ Те шкастонть ломантне учость Захариянь ды дивсесть, мекс сон истя кувать а лиси Пазонь кудостонть.

²² Зярдо Захария лиссь, сонзэ кундатозель келезэ, ды ломантне чарькодсть: сон несь тосо неявкс. Захария пачтизе эсь меленть ломантненень кедьсэ невтнезь ды кадовсь акортыцякс.

²³ Пазонть икеле Захариянь важодема читне прядовсть, ды сон сась кудов.

²⁴ Куроксто Елизавета низэ пекиясь ды вете ковт эзь лисне ломань юткс.

²⁵ Сон кортась: «Тень теизе монь туртов Азорось! Монь лангс варштазь, Сон саизе монь лангсто покордамонть, конань кирдинь ломантнень пельде».

Иисусонь чачомадо икелев ёвтамось

²⁶ Елизаветань пекиямодонть мейле котоце ковонть ютамсто Пазось кучизе Гавриил ангелэнть Галилеянь Назарет ошов,

²⁷ Мария тейтерентень. Мария ульнесь чиявтозь Давидэнь буень Иосифнень.

²⁸ Ангелэсь сась Мариянень ды мерсь: «Шумбрачи теть, Пазонь чанстявт-баслававт ава! Азорось мартот, тон весемеде пек чанстязят-баславазят аватнень ютксто!»

²⁹ Ангелэнть неемстэ ды сонзэ валтнэде Мария таймаскадсь ды мейле арсизе те шумбракстнеманть смустензэ.

³⁰ Ангелэсь поладсь седе тов: «Иля пеле, Мария, Пазось макссь теть ине чансть!

³¹ Вана тон пекият, чачтат Цёра ды путат Тензэ лем – Иисус.

³² Сон карми улеме инекс-покшокс, ды Сонензэ кармить мереме Верепазонь Цёра. Ды Паз Азорось макссы Сонензэ Давид покштянть инязоронь тарканть.

³³ Сон карми улеме пингеде пингес инязорокс весе Яковонь буенть, Израилень раськенть, лангсо, ды Сонзэ Инязорксчинтень зярдояк а ули пе».

³⁴ Мария кевкстизе ангелэнть: «Кода те топавтови, бути мон аволь мирде экшсан?»

³⁵ Ангелэсь тень каршо кортась: «Иневанькс Оймеялтось валги тонь вельксэс, ды Верепазонь виесь копачатанзат тонь. Секскак Эйкакшонтень, конань чачтсак, кармить мереме Иневанькс ды Пазонь Цёра.

³⁶ Содак: тонь патят, Елизавета, кадык сыреяк, ялатеке пекиясь цёрасо. Весе ловсть сонзэ ачачтницякс, ней сон уш котоце ков пешксесэ.

³⁷ Эдь Пазонть туртов арась мезеяк атеевикс».

³⁸ «Мон Азоронть урезэ», – мерсь Мария, – «кадык весе лиси монь марто истя, кода тон мерить». Те марто ангелэсь тусь Мариянь эйстэ.

Мария моли Елизаветань варштамо

³⁹ Зярыя чинь ютазь, Мария пурнась ды капшазь сыргась ошов, кона аштесь пандов таркань Иудея масторсо.

⁴⁰ Сон совась Захариянь кудос ды шумбракстнесь Елизавета марто.

⁴¹ Зярдо Елизавета маризе Мариянь шумбракстнеманть, сонзэ потсо эйдесь либоргадсь, ды Елизавета пештявсь Иневанькс Оймеялтсо.

⁴² Елизавета серьгедевсь: «Тон весемеде пек чанстязят-баславазят аватнень ютксто! Чанстязь тонь Эйдеськак, конань кандтнят потсот!

⁴³ Монень сась монь Азоронть авазо! Мезень кисэ монень прась истямо уцяска?!

⁴⁴ Теке шкастонть, зярдо тонь шумбракстнемань вайгелесь пачкодсь монь пилес, эйдесь монь потсо кенярдомадонть либоргадсь.

⁴⁵ Тонеть алтазесь топавтови! Секскак уцяскават тон, Азоронь валтнэс кемицясь!»

⁴⁶ Мария тень каршо мерсь: «Монь седеем шны ды инелгавты Азоронть,

⁴⁷ ды оймем кенярды Паздонть, монь Идицядонть!

⁴⁸ Пазось велявтызе вановтонзо монь лангс, асодавикс ды анеявикс урензэ лангс. Те чистэ саезь весе пингень ломантне кармить монь ловомо уцяскавкс:

⁴⁹ весемеде Виевесь тейсь монь туртов истят ине тевть! Сонзэ лемезэ иневанькс весементь велькссэ!

⁵⁰ Сон макссы эсь седеймарямонзо мелензэ ваныцятненень пингеде пингес.

⁵¹ Пазонь виев кедесь теи ине тевть: Сон сравтни сетнень, кинь оймест пештязь каштанчинь мельсэ ды превсэ.

⁵² Сон правтни прявтнэнь азорксчинь таркастост, ды верев кепеди асодавикстнэнь ды анеявикстнэнь.

⁵³ Сон пешти арасьчисэ эрицятнень парочисэ; сюпавтнэнь пани чавонь кедть.

⁵⁴ Пазось лезды Израилень раськентень, эсензэ важонтень, мельсэ кирди ды топавты седеймарямонть

⁵⁵ Авраамнень ды сонзэ эйкакштнэнень пингеде пингес, кода Сон алтакшнось минек покштятненень».

⁵⁶ Мария эрясь Елизаветань кедьсэ колмошка ковт ды велявтсь эсензэ кудов.

Нававтыця-Лемдиця Иоаннонь чачомазо

⁵⁷ Елизаветань сась чачтомань шказо, ды сон чачтсь цёра.

⁵⁸ Шабранзо ды раськензэ марясть седе, кодамо ине седеймарямо путсь Азорось Елизаветанень, ды кенярдсть вейсэ сонзэ марто.

⁵⁹ Кавксоце чистэнть сынь пуромсть эйкакшонтень тееме цёрынень киськепень керявтома ды арсесть путомс тензэ Захария тетянзо лементь.

⁶⁰ Елизавета, эйкакшонть авазо, тень каршо мерсь: «Арась, истя а ули, путтано сонензэ лем – Иоанн».

⁶¹ Пурнавозтне кортасть Елизаветанень: «Тонь раськеть ютксо арась Иоанн лем марто ломань!»

⁶² Ды кедьсэ невтнезь, кевкстнесть эйдень тетянть, кодамо лем путоволь сон.

⁶³ Захария вешсь лазнэ ды сёрмадсь лангозонзо: «Эйкакшонть лемезэ – Иоанн». Ды весе талакадсть.

⁶⁴ Ды сеске теде мейле Захариянь панжовсть турванзо ды кортазевсь келезэ; сон кармась кортамо ды Пазонть шнамо-чанстямо.

⁶⁵ Весе перькаст эрицятнень копачинзе тандадома ды пелема. Те кулясь срадсь весе пандо лангонь Иудеяванть.

⁶⁶ Весе, кие теде марясь, эсь пачкаст арсесть ды кортнесть: «Кикс карми улеме те эйдесь?» Эдь Азоронть виесь ульнесь мартонзо.

Захария шны Пазонть

⁶⁷ Захария, Иоаннонь тетясь, пештявсь Иневанькс Оймеялтсо ды кортазевсь пазмарицякс:

⁶⁸ «Улезэ шназь-чанстязь Азорось, Израилень Пазось, конась сы ды олякстомтсы Эсензэ раськенть.

⁶⁹ Сон кучи миненек виевдеяк виев Идиця, кона лиси Давид важонзо буестэ.

⁷⁰ Теде Сон алтакшнось Эсензэ пазмарицятнень вельде, конат эрясть ламо иеть теде икеле.

⁷¹ Идицясь олякстомтсамизь эсенек яттнэде ды минек лангс кежень кирдицятнень кедест алдо.

⁷² Сон топавты Эсь седеймарямонзо, кона алтазель минек покштятненень. Сон мельсэ кирди Эсь алтавксонзо, иневанькс вейсэньлувонть

⁷³ ды кеме валонть, конань Пазось максызе минек Авраам покштянтень:

⁷⁴ Пазось олякстомтсамизь вардонок лепштямонть эйстэ.

⁷⁵ Ней минь карматано апак пеле Сонзэ мелензэ топавтомо, прянек-седейнек Пазонтень максозь ды Сонзэ сельме икеле видечинь коряс эрязь, весе эсенек эрямонть перть.

⁷⁶ Ды тон, эйдине, кармат кандтлеме Верепазонь пазмарицянь лем. Тон кармат молеме Азоронть икеле ды анокстамо Сонензэ вадря ки.

⁷⁷ Сонзэ ломантненень тон максат чарькодема идемадо, конась ашти пежетест нолдамосо.

⁷⁸ Минек Пазось, пештязь вечкемасо ды седеймарямосо, кучсь миненек менельстэ Чилисема,

⁷⁹ кона максы валдо чоподасо ды куломань сулейсэ эрицятненень, аравтсамизь минек седейоймамонь ки лангс».

⁸⁰ Эйдесь кассь-кепететсь, ды виевгалесь сонзэ оймезэ. Сон эрясь чаво мода лангсо семс, зярс эзь са шказо лисемс Израилень раськенть икелев.