Паволонь сёрмазо Галатияв 1 - Од Вейсэньлув 2006

Шумбракстнемат

¹ Мон, Павол, кона кармась улеме апостолокс аволь ломантнень пельде эли кодамояк ломанень вельде, а вана Иисус Христосонь ды Тетя Пазонть пельде, кона вельмевтизе Иисусонь кулозьстэ, –

² кучан шумбракстнемат Галатиянь кемикуротненень, – мон ды весе кемиця ялгатне, конат тесэ мартон.

³ Арсян тенк чансть ды седейоймамо минек Тетя Пазонть пельде ды Иисус Христос Азоронть пельде.

⁴ Сон максызе Эсь прянзо минек пежетнень кисэ: истя идемс минек те неень зыянов шканть эйстэ. Теньсэ Сон топавтызе минек Тетя Пазонть мелензэ.

⁵ Улезэ шназь Пазось пингеде пингес! Аминь.

Лия Евангелия арась

⁶ Мон дивсян сенень, кода курок тынь велявтыде Пазонть эйстэ, кона тердидизь тынк Христосонь седеймарямосонть, ды кармиде молеме допрок лия смустень кулянть мельга.

⁷ Арась кодамояк лия кенярксов куля! Ансяк улить истят ломанть, конат тынк чаракавтыть-тапить ды снартыть коламс Христосто Кенярксов кулянть смустензэ.

⁸ Бути кияк карми пачтямо тыненк аволь се Кенярксов кулянть, конань минь икеле пачтинек тенк, – улиндерян натой те монсь эли менельстэ ангел – улезэ сон сюдозь!

⁹ Кода икеле кортынек, нейгак таго кортан тыненк: бути кияк карми тенк пачтямо аволь се Кенярксов кулянть, конань тынь уш саинк эсь седеезэнк, улезэ сон сюдозь!

¹⁰ Кинь пельде мон ней вешнян паро мельть: ломантнень эли Пазонть пельде? Паряк, тынь арсетядо: мон бажан савтомс ломантненень? Бути мон нейгак бажавлинь савтомс ломантненень, сестэ аволинь уле Христосонь важокс.

Паволонь апостолокс теевемась

¹¹ Яволявтан тенк, кемиця ялгат: Кенярксов кулясь, конань мон пачтян, аволь ломанень пельде.

¹² Моненьгак сон ульнесь максозь аволь ломантнень пельде, ды кияк сонензэ монь эзимим тонавто. Те Кулянть максызе монень Сонсь Иисус Христос, зярдо невтизе тень Эсь прянзо чартьсэ-неявкссо.

¹³ Тынь, нама, марсиде монь эрямодон-аштемадон, зярдо мон ульнинь евреень кемемасо. Сестэ мон пек кежейстэ пансинь Пазонь Кемикуронть ды снартнинь допрок калавтомс-яжамс сонзэ.

¹⁴ Евреень кемемасонть мон ульнинь монь иень ялгатнень коряс раськень ломантнень ютксо сехте икеле. Истямо ладсо вельть эрязкалезь ванстынь-топавтынь койтнень, конатнень миненек кадызь покштятне.

¹⁵ Ансяк Пазось, кона кочкимим монь чачомадон икеле ды тердимим Эсь чанстензэ коряс Тензэ важодеме, сайсь мель

¹⁶ панжомс монень ды монь вельде* Эсь Цёранзо сень кисэ: пачтявлия мон Сонзэ эйстэ Кенярксов кулянть лия раськетненень. Сестэ мон эзинь карма кевкстнеме превть ве ломанень пельдеяк.

¹⁷ Ды мон эзинь моле Ерусалимев вастовомо сетнень марто, конат теевсть апостолокс мондень икеле. Мекевланк, сеске туинь Аравияв*, косто мейле мекев велявтынь Дамаск ошов.

¹⁸ Мейле, колмо иень ютазь, якинь Ерусалимев вастовомо Петра марто ды ульнинь кедьсэнзэ ансяк кеветеешка чи.

¹⁹ Лия апостолтнэде киньгак эзинь нее, минек Азоронть Яков браттонзо башка.

²⁰ Пежетькстан-божан Пазонть икеле: мезде тыненк сёрмадан, те виде, аволь кенгелямо.

²¹ Теде мейле мон туинь Сирия ды Киликия ёнксов.

²² Христосонь кемикуротне, конат Иудеясо, монь а содылимизь.

²³ Сынь мондень ансяк марсесть: «Се, кона икеле пансесь эйсэнек, ней пачти се кемеманть, конань сон икеле калавтсь-яжась!»

²⁴ Ды сынь шнасть Пазонть монь кисэ.