Паволонь сёрмазо Колоссав 1 - Од Вейсэньлув 2006

Шумбракстнемат

¹ Павол, Пазонь мелень коряс Иисус Христосонь апостолось, ды Тимофей, кемиця ялганок, кучить шумбракстнемат

² Пазонь ломантненень, Христос Иисус марто вейсэндязь кемевикс ялгатненень, конат эрить Колосса ошсо.

Павол ёвты сюкпря Пазонтень

³ Улезэ тенк чансть ды седейоймамо Пазонть, минек Тетянть, пельде, ды Иисус Христос Азоронть пельде! Тынк кисэ эсь озномасонок минь свал ёвтатано сюкпря минек Иисус Христос Азоронть Пазонстэнь ды Тетянстэнь.

⁴ Эдь минь маринек Христос Иисуснэнь тынк кемемадонк ды Пазонь весе ломантнень туртов вечкемадонк.

⁵ Те кемеманть ды вечкеманть чачты се седейнежедьксэсь, конань топавтомазо учи тынк менель лангсо. Те седейнежедьксэнть эйстэ тынь мариде уш сестэ, зярдо тыненк васенцеде пачкодсь видечинь валось – Кенярксов кулясь.

⁶ Те кулясь чачты-канды паро раштавкс ды срали весе масторлангонть келес. Тынк ютксояк сон срали се чистэнть саезь, зярдо тынь маринк сонзэ ды кармиде содамо Пазонь чанстенть истямокс, кодамокс сон алкукс улияк.

⁷ Тынь те кулянть маринк Эпафрасонь пельде. Сон – мартонок вейсэнь тевень теиця ды вечкевикс ялганок, кона кемевиксстэ важоди Христоснэнь, тыненк паронь кандомга.

⁸ Сон ёвтнесь тенек вечкемадонть, конань тыненк казизе Оймеялтось.

Кемикуронть кисэ Паволонь озномазо

⁹ Вана мекс минь апак лотксе ознотано кисэнк се чистэнть саезь, зярдо маринек тынк эйстэ. Минь Пазонть пельде вештяно: максоволь Сон тенк Эсь Оймеялтсонзо сюпавсто-важовсто покш превейчи ды чарькодема, ды тень вельде кармавлиде домкасто содамо Пазонть мелензэ-арсеманзо.

¹⁰ Сестэ тынь эсь эрямосонк кармавлиде инелгавтомо Пазонть, весемесэ кандовлиде Сонензэ мельспаро, тейневлиде эрьва кодат паро тевть ды яла касовлиде Пазонть содамочисэнк.

¹¹ Сонзэ инексчинь аонкставиця альмесь кадык кемекстатадызь тынк ды максы тенк вий печтямс стакачитнень ды цидярдомс. Кенярдозь

¹² ёвтадо сюкпря Пазонтень ды Тетянтень, кона тердимизь минек саемс алтазь казненть: улезэ тарканок-таликанок Сонзэ ломантнень ютксо Валдонть Инязорксчисэнть.

¹³ Сон менстимизь минек чоподанть азорксчинзэ алдо ды ветимизь-совавтымизь Эсь вечкевикс Цёранзо Инязорксчинтень.

¹⁴ Христосонь кувалт миненек максозь идема-менстема Сонзэ верензэ вельде, лиякс меремс, пежетень нолдамо.

Христосонь чачозо ды важодемазо

¹⁵ Христос – анеявикс Пазонть неявикс чачозо. Сон – Васень Цёра, кона весе теевксэнть лангсо сехте покш.

¹⁶ Эдь Сонзэ вийсэ Пазось теизе весементь менель лангсояк, мода лангсояк, неявиксэнтькак ды анеявиксэнтькак: вийтнень ды ветицятнень, прявтнэнь ды азорксчитнень. Весемесь теезель Сонзэ вельде ды Сонзэ туртов.

¹⁷ Сон ульнесь уш весемеденть икеле. Сон весементь кирди вейсэндязь-сюлмазь ды лувсо-ладсо.

¹⁸ Те Сон – Кемикуронть, лиякс, Эсензэ рунгонть, Прязо. Сон ушодкс, Васень Цёра, кона васенцекс вельмевтезь кулозьстэ, весемесэ васенцекс улемга.

¹⁹ Эдь Тетянть ульнесь мелезэ: эряволь-аштевель Цёранзо эйсэ Сонзэ обуцянь весе пешксечись.

²⁰ Истя жо Тетянть ульнесь мелезэ Христос вельде ладямс Эсензэ марто весементь, ды Сонзэ крёст лангсо валозь веренть вельде Сон кемекстызе ладямонть весементь марто мода лангсояк ды менель лангсояк.

²¹ Тыньгак икелень шкасто эсь зыянов тевенк-арсеманк кувалт ульниде Пазонть эйстэ васоло ды молиде каршонзо.

²² Ней, мекевланк, Сон ладидизь тынк Эсензэ марто Христосонь мода лангонь рунгонзо куломанть вельде вана мекс: аравтомс тынк Эсь чачонзо икелев иневаньксэкс, асатыкстэмекс ды чумовтомокс.

²³ Ансяк тыненк, нама, эряви седе товгак кеместэ ды апак кавтолдо аштемс кемемань юронть лангсо. Илядо чиреме-пурда седеень се нежедемастонть, конань казизе тенк Кенярксов кулясь, зярдо тынь сонзэ маринк. Те кулясь пачтязь масторлангонь весе ломантненень, ды мон, Павол, карминь важодеме сонзэ кандыцякс.

Кемикуросо Паволонь важодемазо

²⁴ Ней мон кенярдкшнан тынк кисэ эсень майсематнесэ. Эсь рунгосон мон поладан-пештян педе пес сень, мезесь зярс а сатны Христосонь пиштематнесэ. Мон пиштян-майсян Сонзэ рунгонть, лиякс, Кемикуронть, кисэ.

²⁵ Мон теевинь Кемикуронь важодицякс Пазонть се меленть-арсеманть коряс, конань топавтомась максозь монень. Сон кармавтсь монень пачтямс тыненк педе пес Пазонь валонть.

²⁶ Пазонь те салавачись ламо пингень перть кекшезель весе ломантнеде. Ней жо Пазось сонзэ яволявтызе-панжизе Эсензэ кочкавтнэнень.

²⁷ Пазось сайсь мель панжомс сыненст, кодамо ине ды сюпав весе раськетнень туртов анокстазь салавачись. Те салавачись вана мейсэ: Христос эри тынк эйсэ ды секс тынк учи менель лангонь инексчи.

²⁸ Те Сондензэ минь пачтятано, эрьва ломаненть превс путтано ды тонавттано, весе эсь превейчинек тевс нолдазь, ды бажатано аравтомс эрьванть Пазонть икелев вийс совазекс, Христос Иисус марто вейсэндязекс.

²⁹ Те бажамонть кисэ мон важодянгак прянь апак вансто ды ветян тюрема Христосонь пельде максовт покш вийсэнть, кона пек важоди монь эйсэ.