Паволонь омбоце сёрмазо Тимофейнень 1 - Од Вейсэньлув 2006

Шумбракстнемат

¹ Павол, Пазонть мелензэ коряс, Иисус Христосонь апостолось, кона кучозь пачтямо алтамонть Христос Иисус марто вейсэндязь эрямодонть,

² кучи шумбракстнемат Тимофейнень, эсь вечкевикс цёранть туртов. Улезэ теть чансть, седеймарямо ды седейоймамо Тетя Пазонть пельде ды минек Христос Иисус Азоронть пельде!

Сюкпрят Пазонтень

³ Мон ёвтан сюкпря Пазонтень, конанень эсень покштятнень-бабатнень ладсо важодян ванькс оймеёжосо ды ледстнян тонь мельс эсень озноматнесэ свал, читькак, ветькак.

⁴ Зярдо мелезэнь ледить тонь сельведтне, мон пек бажан неемс тонь, секс мекс сестэ карман кенярдомо весе оймесэнь.

⁵ Мон ёвтан сюкпря Пазонтень, зярдо монь мельс сы тонь седейшкавань ванькс кемемат, конась васня ульнесь тонь Лоида бабать ды Эвнике авать седейсэ. Мон кеман: нама, сон эри тонь эйсэяк.

Тонавтомань шумбра валтнэ

⁶ Секскак мон ледстнян мелезэть: кода вельмевтить-паловтыть толонть, истя тонгак вельмевть-паловт эсеть эйсэ Пазонь казнень толонть. Те казнесь ульнесь максозь тонеть сестэ, зярдо мон путынь кедень тонь лангс.

⁷ Эдь Пазось казсь миненек оймеялт, кона максы тенек вий, вечкема ды ванькс превть-мельть, аволь пелема.

⁸ Секскак, иля визде ёвтнемеде-яволявтнемеде кулянть минек Иисус Христос Азородонть ды иля визделгале монденьгак, кона пекстазь Сонзэ кисэ. Мекевланк, тонеть максозь Пазонь вийсэнть, пиштть-майсек монь марто Христосто Кенярксов кулянть кисэ.

⁹ Пазось идимизь минек ды тердимизь улемс Сонензэ алтазь ломанекс. Сон тень теизе Эсь мелензэ-арсеманзо ды чанстензэ коряс, аволь минек тевенек коряс. Те чанстесь максозь миненек Христос Иисусонь вельде пингетнень ушодомадо икеле.

¹⁰ Ды ней сон теевсь неявиксэкс минек Идицянть Иисус Христосонь самонзо вельде. Христос ёмавтызе-изнизе куломанть, ды Кенярксов кулянть вельде невтизе-панжизе миненек эрямонть ды акуломанть.

¹¹ Те Кулянть пачтицякс, апостолокс ды тонавтыцякс лия раськетнень туртов Пазось аравтымим монь!

¹² Вана те тувталось, конань кувалт мон кирдян истят майсемат. Ансяк мон а виздян. Эдь мон содан, кинень кемезевинь, ды кеместэ содан: Сонзэ ули виезэ меельце чинть видьс ванстомс сень, мезенть Сон, лангозон кемезь, максызе монень.

¹³ Кадык сеть шумбра валтнэ, конатнень тон марить монь пельде, кармить улеме тонеть тонавтомакс-невтемакс. Ды эряк кемемасо ды вечкемасо, Христос Иисус марто вейсэндязь.

¹⁴ Минек эйсэ эриця Иневанькс Оймеялтонть вельде ванстык весе се паронть, мезесь, лангозот кемезь, тонеть максозь.

¹⁵ Тон содат: Асиясо весе велявтсть-тусть монь эйстэ, сынст ютксо Фигел марто Гермогент.

¹⁶ Кадык Азорось невтьсы Эсь седеймарямонзо Онесифоронь кудораськенстэнь. Онесифор сеедьстэ шождалгавтнесь монь ойменть ды эзь визделгале тюрьмасо монь улемадонть.

¹⁷ Зярдо жо сон сакшнось Римев, сестэ пек вешнесь монь эйсэ ды муимим.

¹⁸ Кадык Азорось макссы тензэ Эсь седеймарямонзо меельце чистэнть. Ды кода ламо сон лездась монень Эфессэ, тень тон содат весемеде парсте!