Паволонь омбоце сёрмазо Коринфев 1 - Од Вейсэньлув 2006

Шумбракстнемат

¹ Павол, кона Пазонть мелензэ коряс аравтозь Иисус Христосонь апостолокс, ды Тимофей кемиця ялгась кучить шумбракстнемат Пазонь кемикуронтень Коринф ошсо, истя жо Пазонь весе ломантненень, конат эрить Акайянть келес.

² Чансть ды седейоймамо тенк Пазонть, минек Тетянть, пельде ды Иисус Христос Азоронть пельде.

Пазось лездыця ды оймавтыця

³ Улезэ шназь-чанстязь минек Иисус Христос Азоронть Тетязо ды Пазозо! Сон – седеймариця Тетя ды свал минек оймавтыця-кемекстыця Паз.

⁴ Сон минек оймавты-кемексты эрьва кодамо стакачисэнек. Сестэ минеккак саты виенек оймавтомс-кемекстамс эрьва кодамо стакачитнес понгозтнень секе оймавтоманть эйсэ, конаньсэ Сон кемексты минек.

⁵ Кода Христосонь кисэ стака пиштематне-майсематне певтеме прыть минек лангс, истя жо Христос вельде Пазось певтеме оймавты-кемексты минек.

⁶ Зярдо минь кирдтяно стакачить, те улияк тынк оймавтоманк ды идеманк кисэ. Те лезды тенк цидярдозь кирдемс сеть майсематнень, конатнень кирдтяно миньгак.

⁷ Минь кемтяно: тынь весементь цидярдсынк. Ды зярдо Пазось оймавты-кемексты минек, сестэ те оймавтомась ули миненек тынк оймавтоманк ды идеманк кисэ. Минь содатано: кода тыненккак максови эсенк таликанк минек пиштеманть эйстэ, истя жо Пазось макссы тыненк оймавтомань-кемекстамонь таликанккак.

⁸ Минек меленек, кемиця ялгат, ёвтнемс тенк сеть стакачитнеде, конат пракшность минек лангс Асия ёнкссо. Те ульнесть истят стакат, истят акирдевикс пиштемат, конатнень кувалт минь эзинек кемеяк кадовомс эрицякс.

⁹ Миненек марявсь: минь уш судязтяно куломас. Истя лиссь сень кисэ: а кадомс миненек кодамояк кемема-нежедема эсь лангозонок, кадык жо минек нежедемась ули ансяк Пазонть лангс, кона мик кулозьстэяк вельмевти.

¹⁰ Те Сон менстимизь минек истя малав сазь куломадонть! Ды икелепелевгак Сон менстьсамизь. Минь Сонзэ лангс кемтяно: нама, таго менстьсамизь,

¹¹ бути тыньгак тенень карматадо лездамо эсь озномасонк. Сестэ кепети Пазонтень сюкпря, конань ёвтасызь ламот ине чанстензэ кисэ, конань Сон кази миненек ламо озноманк каршо!

Паволонь Коринфев самозо кувать кирдевсь

¹² Минь шнатано прянок вана мейсэ: свал эрьва косо ды седе пек тынк ютксо минь эринек оймень ды седеень панжозь, кода тукшны Пазонть мельс. Теде корты минек ванькс оймеёжоськак. Прянь ветямосонок минь нежединек Пазонь чанстенть лангс, аволь ломанень превейчинть лангс.

¹³ Минь сёрмадтанояк тыненк эсь сёрмасонок ансяк сень, мезесь тенк ловнови ды чарькодеви. Мон кеман: тынь педе пес чарькодьсамизь минек,

¹⁴ кода уш аламодо нейгак чарькодимизь. Сестэ минек Иисус Азоронть само чистэнть тынь карматадо прянк шнамо минек эйсэ, кода миньгак шнатано прянок тынк эйсэ.

¹⁵ Тенень кемезь, мон сайнинь мель содавтомс тынк васенцекс ды кандомс тенк кавксть чансть.

¹⁶ Мон арсинь тынк содавтомс Македонияв молемстэ, а вана мейле Македониясто велявтомсто таго совамс тенк, ды сестэ тынь пурнавлимизь-сэрнявлимизь Иудеяв.

¹⁷ Зярдо мон сынь истямо мельс, арази теньсэ мон невтия эсь валом лангсо аволь свал аштемам? Арази мон ветян эсь прям кода те масторлангонь ломань? Арази ули обуцям-коем теке жо шкастонть меремс «эно, эно» ды «арась, арась»?

¹⁸ Сонсь кемевикс Пазось неи: монь валоськак истя жо кемевикс, ды зярдояк мон эзинь ёвтне «энояк» ды «араськак».

¹⁹ Эдь Пазонь Цёраськак, Иисус Христос, зярдояк а ёвтни «энояк» ды «араськак». Сонзэ эйсэ ансяк «эно»! Сондензэ тыненк пачтинек минь: Силуан, Тимофей ды мон.

²⁰ Кадык Пазонь алтамотнеде ламо, Христос эрьванть эйстэст кемекстызе «эно» валсонть! Вана мекс миньгак Сонзэ кувалт Пазонь шнамга ёвтатано: «Виде, истя ули!»

²¹ Те Сонсь Пазось кемексты минек ды тынк Христос Вадевтенть* марто вейсэндямосонть. Те Сон минеккак вадимизь-кочкимизь.

²² Сон тешкстымизь минек Эсь тешкссэнзэ, лиякс, кучизе минек седейтнес Эсь Оймеялтонзо, кода кемекстамо.

²³ Пазось Сонсь неи-соды, ды пежетькстан-божан эсь эрямосонгак: мон те шкас эзинь велявто Коринфев ансяк тынк ванстоманк кисэ.

²⁴ Нама, минек арась меленек саемс тынк кемеманть эсь кеденек алов. Минь содатано: тынь а кавтолдтадо кемеманть коряс. Минь ансяк лездатано тенк муемс эстенк кеняркс.