Паволонь васенце сёрмазо Тимофейнень 1 - Од Вейсэньлув 2006

Шумбракстнемат

¹ Павол, Иисус Христосонь апостолось, конань аравтызе Пазось, минек Идицясь, ды Христос Иисус Азорось, минек седейнежедьксэсь,

² кучи шумбракстнемат Тимофейнень, кемемань коряс сонзэ алкуксонь цёрантень. Улезэ теть чансть, седеймарямо ды седейоймамо минек Тетя Пазонть пельде ды минек Христос Иисус Азоронть пельде!

Кармавтомат лия тонавтоматнень коряс

³ Македонияв туемстэ мон энялдынь теть кадовомс Эфессэ вана мекс: тонеть эрявсь кармавтомс кой-конатненень, иляст пачтне лия тонавтомат,

⁴ ды иляст яво мель ёвкстнэнень ды кезэрень шкань покштятнень лемень певтеме кортавтоматненень. Сынь ветить аэрявикс пелькстамотнес-спорямотнес ды а кандыть кодамояк лезэ Пазонтень кемемань кастомантень.

⁵ Те кармавтоманть бажамозо – кирвазтемс вечкема, кона лиси ванькс седейстэ, паро-виде оймеёжосто ды алкуксонь кемемасто.

⁶ Кой-конат потасть-мурдасть весе тень эйстэ ды ваясть стяконь келень-валонь таргсемас.

⁷ Сынст мелест улемс Койс тонавтыцякс, ансяк сынь а чарькодить сень, мезде кортыть, ды сеньгак, мезенть виевстэ кемекстыть валсост.

⁸ Минь содатано: Коесь паро сестэ, бути сонзэ кода эряви нолдасак тевс.

⁹ Ды чарькодьсак: Коесь аравтозь-путозь аволь видечисэтненень, мекевланк, Коень колсицятненень, акунсолыцятненень, пазтомотненень ды пежетевтненень. Сон истя жо путозь визькстэметненень ды нарьгицятненень, ломанень ды мик тетянь-авань маштницятненень.

¹⁰ Коесь сёрмадозь ускурицятненень, цёра цёра марто удсицятненень, ломанень салыцятненень, кенгелицятненень ды авидестэ божицятненень-пежетькстыцятненень ды весе сетненень, кить молить шумбра тонавтоманть каршо.

¹¹ Те тонавтомась кирдеви шназь-чанстязь ды ине Пазонть Кенярксов кулясонть. Те кулянть пачтямонзо Пазось максызе монень.

Сюкпря Пазонтень седеймарямонзо кисэ

¹² Ёвтан сюкпря минек Христос Иисус Азоронтень, кона макссь монень вий. Ёвтан Сонензэ сюкпря секс, мекс Сон ловимим монь кемевиксэкс ды аравтымим Эстензэ важодеме,

¹³ монь, кона икеле ульнесь Сонзэ сюдыцякс, пансицякс ды нарьгицякс-покордыцякс. Пазось жо путызе монень седеймарямонзо секс, мекс мон эсень акемемам коряс а содылинь, мезе тейнинь.

¹⁴ Минек Азорось сюпавсто валызе монь лангс Эсь чанстензэ, истя жо макссь монень кемема ды вечкема Христос Иисус вельде.

¹⁵ Неть валтнэ видеть ды эрявить путомс седейс: Христос Иисус сась масторлангс идеме пежетевтнень, конатнень ютксо мон сехте пежетевесь.

¹⁶ Ансяк Пазось путызе монень седеймарямонзо вана мекс: Иисус Христос невтевлизе васенцекс монь лангсо Эсензэ куватень цидярдоманзо. Монь лангс ванозь, лиятнеяк теде мейле кармавольть кемеме Тензэ ды совавольть пингеде пингень эрямос.

¹⁷ Пингеде пингень Инязоронтень, акулыця, анеявиця, вейкине превейдеяк превей Пазонтень шнамо ды инексчи пингеде пингес! Аминь.

¹⁸ Цёрынем, Тимофей, те кармавтоманть мон максан тонеть пазмарицянь валтнэнь коряс, конат икеле ульнесть ёвтазь тондеть: ветяк неть валтнэнь лангс нежедезь паро тюрема,

¹⁹ ванстык кемемат ды ванькс оймеёжот. Конат-конат сонзэ ёмавтызь, ды кемемасткак ваясь, кода венч иневедьс.

²⁰ Истятнэ Гименей Александр марто, конатнень мон максынь Сатананень. Кадык тонадыть ды а кармить Пазонть нарьгакшномо-покордакшномо!