Паволонь васенце сёрмазо Фессалоникав 5 - Од Вейсэньлув 2006

Уледе анокт Азоронть самонтень!

¹ Кемиця ялгат, шкатнень ды аравтозь читнень эйстэ а эряви тыненк сёрмадомскак.

² Эдь тынь тынсь пек парсте содатадо: Азоронть чись сы апак учо, салыця ладсо веть.

³ Зярдо ломантне кармить кортамо: «Эрьва косо сэтьмечи ды лув-лад», сестэ сынст апак учо стардсынзе ёмамось, кода пешксесэ аванть ушодовкшныть чачтомань майсематне, ды сынь кодаяк уш а оргодевить.

⁴ А тынь, кемиця ялгат, аволь чоподачисэ, ды се чись а стардтадызь тынк апак учо, салыця ладсо.

⁵ Эдь весе тынь валдонь ды чинь эйкакшт. Минь а ультяно вень ды чоподань эйкакшокс.

⁶ Секскак, эрде, а карматано удомо, кода лиятне! Ультяно анокт ды валдо превсэть!

⁷ Эдь удыцятне удыть веть, ды винань вечкицятнеяк симить-лекить веть.

⁸ Минь, чивалдонь эйкакштнэ, мекевланк, ультяно валдо превсэ, оршасынек кшнинь панарокс кемеманть ды вечкеманть, путсынек прязонок шлёмокс седейнежедьксэнть идеманть лангс!

⁹ Эдь Пазось аравтсь миненек идема, кона максови тенек Иисус Христос Азоронок вельде, аволь чумонь пандома.

¹⁰ Христос кулось минек кисэ ды секс минь карматано эрямо Сонзэ марто вейсэ, сень лангс апак вано: эрицятано минь эли кулозтяно.

¹¹ Секскак кемекстадо ды кастодо-кепедеде вейкенк-вейкенк эйсэ, кода тынь тейтядояк.

Меельце превспутомат ды сюкпрят

¹² Кемиця ялгат, энялдтано тенк: ловодо сетнень, кить пек ламо важодить тынк ютксо, кить Азоронть марто эрямосонк аштить тынк прявтокс ды путыть эйсэнк превс.

¹³ Улезэ сыненст тынк ёндо покш мелень путома ды вечкема се тевенть кисэ, конань сынь теить. Эрядо вейкенк-вейкенк марто ладязь.

¹⁴ Кемиця ялгат, минь энялдтано тенк: путодо превс нузялдыцятнень, кемекстадо аволь кеме ойметнень, уледе нежекс лавшотненень, весе марто уледе коронь кирдицякс.

¹⁵ Ванодо: кияк киненьгак кеж илязо пандо кежсэ. Мекевланк, свал бажадо теемс паро вейкенк-вейкенк туртов ды весе лиятнень туртовгак.

¹⁶ Свал кенярдодо.

¹⁷ Апак лотксе ознодо.

¹⁸ Весементь кисэ ёвтадо сюкпря. Те Пазонть мелезэ тыненк, Христос Иисуснэнь кемицятненень.

¹⁹ Илядо мадсте Пазонь Оймеялтонь толонть,

²⁰ илядо лово стякокс пазмарицянь валтнэнь.

²¹ Ялатеке весементь ванкшнодо эрьва ёндо, саеде сень, мезесь паро.

²² Кирдеведе ве ёно эрьва кодамо зыяндонть.

²³ Кадык Сонсь Пазось, седейоймамонь лисьмапрясь, тейтядызь тынк педе пес Эстензэ алтазекс. Ды кадык весе тынк эйсэ: оймеялтонккак, ойменккак ды рунгонккак – ванстови ачумондовиксэкс минек Иисус Христос Азоронть самочис.

²⁴ Тынк Тердицясь кемевикс, ды Сон тейсы тень.

²⁵ Кемиця ялгат, ознодо минек кисэяк.

²⁶ Шумбракстнеде весе кемиця ялгатнень марто Пазонь ломанень паламосо.

²⁷ Азоронть лемсэ вешан пельденк: ловнынк те сёрманть весе иневанькс кемиця ялгатненень.

²⁸ Минек Иисус Христос Азоронть чанстесь улезэ тынк марто! Аминь.