Паволонь васенце сёрмазо Фессалоникав 1 - Од Вейсэньлув 2006Шумбракстнемат 1 Павол, Силуан ды Тимофей кучить шумбракстнемат Фессалоника ошонь кемикуронтень, кона эри вейсэндязь Тетя Пазонть марто ды Иисус Христос Азоронть марто. Улезэ тенк чансть ды седейоймамо Пазонть, минек Тетянть, пельде ды Иисус Христос Азоронть пельде! Фессалоникань кемикуронть кемемазо ды эрямозо 2 Минь свал ёвтатано сюкпря Пазонтень весе тынк кисэ ды ледстнетяно эйсэнк минсенек озномасонок. 3 Пазонть ды минек Тетянть икеле минь апак лотксе кирдтяно мельсэнек, кода тынк кемеманк чачты тевень теема, кода вечкеманк чачты виевстэ важодема ды кода цидярдозь тынь нежедтядо минек Иисус Христос Азоронть лангс. 4 Пазонтень вечкевикс кемиця ялгат, минь содатано: Пазось кочкидизь тынк. 5 Эдь минь пачтинек тыненк Кенярксов кулянть аволь ансяк валсо, истя жо вийсэяк ды Иневанькс Оймеялтсояк ды домкасто кемезь сонзэ алкуксчинтень. Тынь жо содатадо, кода минь эринек тынк кедьсэ, тыненк паронь теемга. 6 Ды тынь теевиде минек ды Азоронть мельга молицякс, зярдо тынь саинк седеезэнк Кулянть стака лепштямотнень ютксо кеняркс марто, конань максызе Иневанькс Оймеялтось. 7 Истя тынь кармиде улеме невтемакс весе кемицятненень Македониясояк ды Акайясояк. 8 Тынк пельде Азоронть валось сравтневсь-кандтневсь аволь ансяк Македониява ды Акайява. Истя жо Пазонтень тынк кемемадонк кармасть содамо эрьва косо, секс миненек мезеяк уш а эряви кортамс теде. 9 Эдь сынь сынсь ёвтнить, кода тынь минек вастымизь, кода тынь велявтыде Пазонтень аволь алкуксонь пазтнэнь эйстэ ды кармиде важодеме эриця ды алкуксонь Пазонтень, 10 ды кода кармиде учомо менельстэ Сонзэ Цёранть, конань Сон вельмевтизе кулозьстэ – Иисусонь, кона менстьсамизь минек сыця кеженть эйстэ. |