ST. JOHN 1 - Ottawa New Testament Penteteuch and Psalms 1874

¹ Wahyashkud keähyah owh Ekedoowin, kuhya dush owh Ekedoowin oogeweejewaun enewh Kesha‐Muhnedoon, kuhya dush owh Ekedoowin ke‐Kesha‐Muhnedoowe.

² Me suh goo owh wuhyashkud kahweejewaud enewh Kesha‐Muhnedoon.

³ Ween oonje kuhkenuh gagoo keöozhechegahdanoon; ween dush ahnookeesig kah dush kuhnuhga gagoo keöozhechegahdasenoon kahoozhechegahdagin.

⁴ Ween suh kebemahdezewinewe; ewh dush bemahdezewin oogewahsashkahgoonahwah egewh enenewug.

⁵ Ewh wahsayahzewin kekesegahtamahgud magwah puhsuhgishkaug; kuhya ewh puhsuhgish‐tebik kahween kenesittootahgamahgussenoon.

⁶ Keähyah pazhik enene kahpeëzhenahzhahoogood Kesha‐Muhnedoon, John kahezhenekahzood.

⁷ Chedebahdoodung ewh Wahsayahzewin kepeöonje-ëzhaud mahbuh, kuhkenuh ween owh cheöonjedabwayanduhmenid.

⁸ Kahween ween keähwese ewh Wahsayahzewin, chedebahdoodung atuh ewh Wahsayahzewin kepeöonjeëzhenahzhahwah.

⁹ Quuhyuk Wahsayahzewin keähwe owh pahezhaud oomah uhkeeng kuhya wuhyahsashkahwaud kuhkenuh enenewun.

¹⁰ Oomah uhkeeng keähyah, ween oonje keöozhegahda uhkee, kah dush oogekekanenemegooseen enewh akeewenejin.

¹¹ Oogepeëzhahnun enewh tabandungin, kah dush oogeöodahpenegooseen enewh tabanemahjin.

¹² Menik dush ween goo kahoodahpenegood oogemeenaun ewh kushkeäwezewin cheooyoosemahnid Kesha‐Muhnedoon, kuhkenuh duhyabwayanduhmenejin oodezhenekahzoowin:

¹³ Kahween mesqueeng keöonjenegesewug oogoo, kah kuhya weyahse‐enanduhmoowining, kah kuhya enene enahduhmoowining, Kesha‐Muhnedoong atuh.

¹⁴ Owh dush Ekedoowin keweyahseweäh, kuhya kegeweejekuhbashemegoonaun, kegewahbundahmin dush ween oopeshegandahgoozewin, tebishkoo azhepeshegandahgoozenid enewh puhyazhegoonejin oogwissun owh Wayoosemind, mooshkenashkahgood ewh shahwanjegawin kuhya ewh tabwawin.

¹⁵ John dush oogedebahjemaun, kepepahgid, oo‐oo keëkedood, Mesuh wah‐owh oo‐oo keënahjemugebun, Owh pahnoopenuhzhid ahwahshema ahpetandahgooze neen dush ween, chepwah muh ahyahyaun, ahyahbun.

¹⁶ Azhemooshkenashkahgood dush ewh shahwandahgoozewin kegeöondenegamin anduhcheyung, kuhya shahwandahgoozewin mashquaud shahwandahgoozewin.

¹⁷ Moses mahween keoonjemeegewam ewh tebahkoonegawin, ewh dush shahwanjegawin kuhya ewh tabwawin owh Jesus Christ keöonjetuhgwishenoomahgudoon.

¹⁸ Kah wekah ahweyah oogewahbuhmahseen enewh Kesha‐Muhnedoon; owh atuh puhyazhegood Wagwisssemind, ayaud emuh oopeendoomooning owh Wayoosemind, mesuh owh kahdebahjemaud enewh.

¹⁹ Mesuh oo‐oo kahenahjemood owh John, uhpe egewh Jewyug emuh Jerusaleming keöonjeähnoonahwaud enewh sahsahgewejega‐wenenewun kuhya Leviteün chekuhgwajemahnid, Ahwanan keen?

²⁰ Oogeweendaun, kah dush keähgoonwatunse, oo‐oo keëkedood, Kahween neen nindahwese owh Christ.

²¹ Oogeguhgwajemahwaun, Ahwanan nungwuhnah? Elias nuh kedow? Ween dush ekedoo, Kahween nindahwese. Owh ahnungwahnah aunwahjega‐wenene kedow? Ween dush kenuhquatuhmoo, Kah.

²² Oo‐oo dush oogeënahwaun, Ahwanan keen? cheöonjeweenduhmoowungidwah egewh kahahnoozheyummingejig. Ahneen uhyenahjindezooyun?

²³ Ween dush keëkedoo, Nindow suh ewh oodinwawin owh papahgid emuh buhgwuduhkummig, Quuhyukwuh-mootahwik kapeëzhaud owh Tabaningad, debishkoo kahekedood owh aunwahjega‐wenene Isaias.

²⁴ Ke‐Phariseewewug dush egewh kahpeähnoonindjig.

²⁵ Oogeguhgwajemahwaun dush, oo‐oo keënahwaud, Ahneeshwin dush egoo baptizooëwayun kishpin ahyahwesewunan owh Christ, kuhya owh Elias, kah kuhya owh aunwahjega‐wenene?

²⁶ John dush oogenuhquatuhwaun, oo‐oo keëkedood, Neebe suh neen nindahyoon ewh baptizooweëwayaun; nahwuhyeëe ahyahyag nebahwe pazhik, kakanemahsewag;

²⁷ Me owh pahnoopenuhzhid ahwahshema apetandahgoozid neen dush ween, oomuhkesine‐tuhkoobejegunun kahween nintaähpetandahgoozese cheähbahahmahwug.

²⁸ Emuh suh Bethabaraïng ahgahming Jordan oonoo keduhzhe‐ezhechegam, emuh John kahduhzhe‐baptizooëwad.

²⁹ Wuhyahbunenig dush John oowahbuhmaun enewh Jesusun petahsuhmoosanid, oo‐oo dush ekedoo, Wahbuhmik owh Kesha‐Muhnedoo oomahnishtahnisheensemun, owh akoonuhmahwaud oomujjeëzhewabezewinene enewh akewenejin.

³⁰ Mesuh wah‐owh kahtebahjemugebun, oo‐oo keëkedooyaun, Nepenoopenuhnik pazhik enene ahwahshema apetandahgoozid neen dush ween: chepwah muh ahyahyaun ahyahbun.

³¹ Kah dush ningekekanemahse: cheöonjewahbuhmegood dush ween Israelun, mesuh pahoonjeëzhahyaun baptizooëwayaun nebee ahyooyaun.

³² Kedebahjemoo dush ween John, oo‐oo keëkedood, Ningewahbuhmah owh Keche‐Oojechaug kezhegoong peöonjenahzhid debishkoo keche‐oomemeeng, kepoonid dush emuh ooweyowing.

³³ Kah dush ningekekanemahse: owh atuh kahahnoozhid chebaptizooëwayaun nebee ahyooyaun, me suh owh oo‐oo keëzhid, Ahwagwan kawahbuhmahwudan chepenese-nahmahgood enewh Keche‐Oojechaugwun, kuhya peähyahnid emuh ooweyowing, Me suh owh kabaptizooëwad enewh Keche‐Oochechaugwun.

³⁴ Ningewahbundaun dush, kuhya nedebahjim, mahbuh ahyahwid Oogwissun owh Kesha‐Muhnedoo.

³⁵ Menuhwah kahuhnewahbung John kenebahwe, kuhya neezh ookekenooähmahgunun;

³⁶ Wuhyahbuhmaud dush Jesusun bemoosanid, oo‐oo ekedoo, Benuh, Kesha‐Muhnedoo Oomahnishtahnisheensemun!

³⁷ Kuhya dush egewh neezh kekenooähmahgunug oogenoondahwahwaun kekedoonid, oogenoopenuhnahwaun dush Jesusun.

³⁸ Me dush kequakekahbahwid owh Jesus, kewahbuhmaud dush penoopenuhnegood, oo‐oo dush enaud, Wagoonash nanduhwanduhmag? Oo‐oo dush oogeënahwaun, Rabbi, (me suh ahnekenootuhming, Kakenooähmahgayun) ahneende andahyun?

³⁹ Oo‐oo oodenaun, Pewahbunduhmook. Kepeëzhahwug kewahbunduhmoowaud emuh andaud, kuhpa‐kezhik dush oogeweejahyahwahwaun: metauswe tebahegun keähpeech‐kezhegudoobun.

⁴⁰ Keähwe owh Andrew wejekewaün owh Simon Peter, pazhik egewh kahnoondahwahjig Johnun, kuhya kahnoopenuhnahjig Jesusun.

⁴¹ Ween netum oomekahwaun tebenuhwa wejekewaün Simonun, oo‐oo dush enaud, Ningemekahwahnaun owh Messias, mesuh ahnekenootuhming, owh Christ.

⁴² Oogeëzhewenaun dush emuh ahyahnid enewh Jesusun. Jesus dush oogeguhnuhwahbuhmaun, oo‐oo keënaud, Keen kedow owh Simon oogwissun owh Jona: Cephas kegahezhenekauz, mesuh ahnekenootuhming, Ahsin.

⁴³ Kahuhnewahbung keënandum owh Jesus cheëzhaud ewede Galileeng; oomekahwaun dush enewh Philipun, oo‐oo dush oodenaun, Noopenuhzheshin.

⁴⁴ Bethsaidaïng keöonjebahgoobun owh Philip, oodoodanuhwewah owh Andrew kuhya owh Peter.

⁴⁵ Philip dush oomekahwaun enewh Nathanaëlun, oo‐oo dush oodenaun, Ningemekahwahnaun suh owh, enewh kahdebahjemahjin owh Moses emuh tebahkoonegawining, kuhya egewh aunwahjega‐wenenewug, mesuh owh Jesus, oogwissun owh Joseph. Nazareth duhzhe‐wenene.

⁴⁶ Nathanaël dush oo‐oo oogeënaun, Tahoonjeemahgud nuh gagoo wanisheshing emuh Nazarething? Philip dush enaud, Pemahjaun kuhya pewahbundun.

⁴⁷ Jesus oogewahbuhmaun Nathanaëlun penaunzekahgood, oo‐oo dush ekedoo duhzhemaud, Benuh kagate Israel‐wenene, kuhnuhga kuhkuhyanezewin ayaunsig!

⁴⁸ Nathanaël dush oo‐oo oodenaun, Ahneen wanje-kekanemeyun? Jesus dush oogenuhquatuhwaun oo‐oo keenaud, Chepwah suh nundoomik owh Philip, keähyahyun emuh ahnaume‐figoomenahgahwunzh, kegewahbuhmin.

⁴⁹ Nathanaël dush oogenuhquatuhwaun oo‐oo enaud, Rabbi, keen suh kedoogwissemik owh Kesha‐Muhnedoo; keen suh kekeche‐oogemahkundahwah owh Israel.

⁵⁰ Jesus dush oogenuhquatuhwaun, oo‐oo keënaud, Keënenaun, emuh ahnaume‐figoomenahgahwunzh kegewahbuhmin, me nuh wanjedabwayanduhmun? kegahwahbundaunun nahwuj kache‐ahpetandahgwukin uhyeëen dush ween oonoo.

⁵¹ Oo‐oo dush oodenaun, Kagate, kagate, kedenenim, Bahnemah kegahwahbundahnahwah ewh kezhik chenesahkoosing, kuhya enewh oodangenemun owh Kesha‐Muhnedoo oombishkahwashkahgood kuhya nesaundahwashkahgood Enene Oogwissun.