markus 1 - ŋuɽun ŋun ŋiya ŋun ŋikaiilo elo 1966

asa 1 yuwana mamadan na ŋuɽun ŋuŋun

¹ ŋuɽun ŋun ŋiro uro gwerre ŋeḏi ŋuɽun ŋiŋir ŋeḏi yecu kɩrisṯo, gwun gwiro ŋaɽe ŋeḏi elo,

² ŋiro gi gwune ŋulinu kɩḏam ŋun ŋarɩŋe isaia gwun gwiro nebi, eʼe, nyi gwo gwuwəjo ḏuwəjo ḏinyi ḏaḏara ḏila lugwuŋa, ḏaŋagelijo ṯaṯ ḏuŋa kɩɽelo muma;

³ ŋwal ŋweḏi gwiji gwete gwun gwaṯəmɩde galo uro kiḏɩwer, nuarno, ṯuḏɩnil ṯaṯ galo ḏeḏi gwele gwun gwiro elo, nyaṯudɩni daṯ duŋun muma.

⁴ yuwana gwiro gwun gwaṯɩbabṯaijiḏi kiḏɩwer, naṯuuməḏɩjo liji ḏibabṯaijɩno ḏe alwɩrla ga nal elo əbɩri ŋuɽun ganu ŋagin ŋun ŋɩki.

⁵ na liji wei leḏi jɩmɩrɩgen jun jan yauḏia na urucəlim naltuḏa nalwila lugwun, nalteije ŋuɽuna galo ŋagin ŋun ŋɩki, nal yuwana babṯaije luŋa wei gi ḏɩrawe ḏun ḏan urdun.

⁶ na yuwana gwaṯɩkani giria ŋun ŋiro jola jeḏi gamɩla, na gwaṯɩkani ŋɩma gi lɩbuɽi, na gwaṯeʼe jama na laiya leḏi geḏo.

⁷ nuuməḏɩjo liji nuleicɩno, gwete gwaje gwila gwun gwəṯəno ŋɩma lugwi; nyi gwate gwɩdeleḏo gwiculɩjo galo gwikədə ŋɩma geḏi giwɩḏe guŋun no.

⁸ gwerkwe nyi gwajibabṯaije ŋau ŋe, namɩni ŋu gwajibabṯaije gwuɽɩwə gwe gwun gwɩpiḏo pɽul.

ḏibabṯaijɩno ḏeḏi yecu

⁹ ŋwamon ŋwono na yecu walane nasɩra kamɩrɩgen yeḏi jalil, nuwele ḏi yuwana na yuwana babṯaije gi ḏɩrawe ḏun ḏan urdun.

¹⁰ gwune nudiɽeḏelo ŋau ganu nuaŋu kanyinŋ miḏini na gwuɽɩwə gwun gwɩpiḏo pɽul gwulə lugwun gwiro gi gɩɽiḏir.

¹¹ na ŋwal gwulə kanyin nalarno, ŋa gwiro ŋaɽe ŋinyi ŋun ŋaṯiəmɩnyi, ŋa gwaṯɩnyiŋiri ḏugwore.

ḏɩḏeijo ḏeḏi yecu

¹² na kaja kono na gwuɽɩwə gwun gwɩpiḏo pɽul nugwuloḏa kiḏɩwer;

¹³ na gwune ju ŋɩne kiḏɩwer ŋwamon ḏuɽi kwoɽo naṯi seiṯan iḏeije, naṯilije lɩḏe le geḏo, na liji leḏi kanyin əpijo ŋɩru.

yecu madiɽo ŋɩru ŋuŋun

¹⁴ gwune na liji ŋele yuwanaŋ kɩrkon, na yecu wila jalil naṯuuməḏɩjo liji ŋuɽuna ŋiŋir ŋeḏi elo.

¹⁵ nuleicɩno, gaja ŋɩmaro wei na ŋele ŋeḏi elo ŋo gɩṯo. wɩrlal galo ŋuɽun ŋalo ŋun ŋɩki nyəmɩnyi ŋuɽuna ŋiŋir ŋeḏi elo.

calɩmis jun jeḏi gwerre jəmɩḏɩnu

¹⁶ gwune nuwele kɩməmu geḏi ḏɩrawe ḏun ḏan jalil, nuaŋu simianŋ na megin gwun gwan anḏarawus ligelo car jeḏi ŋwumi ŋau ganu, na ŋɩru ŋagin ŋiro ŋe ḏuma ŋwumi.

¹⁷ nal yecu uməḏɩjo nuleicɩno, wilal nyilgwujane, namɩni nyi gwajiduji liji lun laṯumə liji.

¹⁸ nalwalane gi car jagin nalgwujane.

¹⁹ gwune nudɩka mɩce, nuaŋu yagubŋ gwun gwiro ŋaɽe ŋeḏi jebəḏi na megin gwun gwan yuwana lun lijo kwu murkab ganu dino lukɩɽo car jagin jeḏi ŋwumi.

²⁰ nuləmɩḏe; nalwalane ḏi baba gwagin gwun gwan jebəḏi kwu murkab ganu jaḏam je, nalgwujane.

yecu gwudi ḏiŋeroma kwiji ganu kabranaum

²¹ nalwele kabranaum, na gi lamon le sabiṯ nuəḏi kwu ḏunu gweḏi elo nualɩmi liji.

²² na liji obaga ṯuṯ gi ḏalɩmia ḏuŋun nulalɩmi gwiro gi gwune gwiji gwun gwəṯi ŋelɩnya, gwate gwiro gi jalgaṯɩm no.

²³ na gwiji gwete je kwu dunu gweḏi elo gwagin gwun gwəṯi ḏiŋeroma, nuərəjo gwula,

²⁴ nueicɩno, ŋa gwar anada yecu gweḏi nasɩra? ŋa gwuwiḏi ŋa gwijiɽinye a? nyi gwilɩŋiḏaŋa, ŋa gwiro gwun gwɩpiḏo pɽul gweḏi elo.

²⁵ na yecu lo, nueicɩno, ji nyɩkwom, ŋətu lugwun.

²⁶ na ḏiŋerom məṯo gwiji ki nuəri gwula gwubuḏo, nutu.

²⁷ na luŋa wei nalobaga ṯuṯ, naluməḏəṯə laginŋu nalarno, gwudaro gwuwei? ŋuɽun ŋiya ŋɩrṯa ŋiro ŋeno? gi gwune uməḏɩju ḏiŋeroma ŋele ŋe naləṯeijo nani.

²⁸ na ŋuɽun wɩreḏelo coucou ŋan ŋu kalo wei gun guɽeico jalilŋ galo.

yecu gwugelo gwunən gweḏi buṯrus gwun gwiro gwa muma na liji lutu

²⁹ nalwalane kwu dunu gweḏi elo naləḏi yagubŋa yuwanaŋa kwu dunu gweḏi simianŋa anḏarawus gwe.

³⁰ namɩni gwunən gweḏi simian gwun gwiro gwa gweḏeḏo nanu aŋɩnu yuŋun yɩbuḏu nanu, na luŋa naluməḏɩjo yecuŋ.

³¹ nuwele lugwun numəṯo gi ḏi, nudiɽi. na ŋɩɽainy ete cou, nuləpijo ŋɩru.

³² gwune na anyin gwuli, na galo ro nyinyabir, nal liji gwuluḏɩjo wei lun leḏeḏo nanu na lun ləṯi ḏiŋeroma,

³³ na liji wei leḏi amɩrɩgen nalaɽuwaḏe ldu kouwɩr.

³⁴ nulgele muma lutu lun liṯɩlo ŋɩɽainy ŋiro kajakaja, nuti ḏiŋeroma dutu; naṯuouwɩrico ḏiŋeroma dumə no, gi gwune gwilɩŋiḏɩlo.

yecu gwuwiḏi gi ḏuməḏɩjo eloŋu, nuouwɩrico kabranaum

³⁵ na giləganu nudiɽi nudu mimmi gilio gwerre galo gaṯe gimuɽe no, nuwele kiḏɩwer gwetɩdo nuuməḏɩjo eloŋu.

³⁶ na simian na liji lun laṯɩligwuḏiḏe, nalgwujane,

³⁷ na gwune nalbuje naluməḏɩjo naleicɩno, liji wei lo lɩbunyaŋa.

³⁸ nuluməḏɩjo nuleicɩno, ilwele gi jɩmɩrɩgen jun jijo gɩṯogɩṯo nyiuməḏɩjo liji ŋɩnəwei dino; nyi gwuweləḏi ŋuɽun ŋeno.

³⁹ nuwele gi lɩdunu wei lagin leḏi elo jalil nuuməḏɩjo liji nuti ḏiŋeroma.

ḏiŋiriḏa nanu ḏeḏi gwiji gwnn gwiṯi ŋilo

⁴⁰ na gwiji wila lugwun gwun gwiṯi ŋilo nuɽoṯədɩjo gworki nuculɩjo galo ŋwurko ŋwe nueicɩno, ḏa ŋa məmɩnyi ŋa məṯi ŋɩma ŋiiŋiri nanu.

⁴¹ na yecu ino nukuwa ḏi nuḏɩmumi nanu nuuməḏɩjo nueicɩno, nyi gwəmɩnyu; iŋiriḏi nanu.

⁴² gwune na yecu uma dino na ŋilo abɩre lugwun nuiŋir nanu.

⁴³ na yecu uməḏɩjo ŋuɽuna ŋɩbɩɽe nukuwa cou,

⁴⁴ nueicɩno, aṯaŋuməḏɩjo gwiji gwetɩdo no; ŋamɩni wele ŋaŋijo gɩsisŋ aŋɩna yuŋa, ŋəḏəḏə eloŋu ŋɩdio ŋun ŋaŋijaŋalo musa ani liji aŋu.

⁴⁵ numɩni tu, naṯuuməḏɩjo liji luṯu nuureiji ŋuɽuna elo ŋeno kalo wei, na yecu gwate gwəṯi ŋɩma gwele kamɩrɩgen gwanaŋino no, nuje kaja kiḏɩwer, na liji wila lugwun kalo wei.