Hibru 1 - Ono

Kaisale Gipoleŋo Kisi Maep Don Ra Qelaŋane Ŋedanlukwareke

¹ Mokaka Kaisale eŋe propet taleongi, eŋe atakine loutne don tanikinekine mane kine mane, so don numaine kine mane kine mane ŋabokopze edane sarimaŋkoi,

² Ŋo ŋado naso iwa, yemo Gipole talekaki oŋom don ŋedange, Gipole eŋe weku Kaisaleŋo talekaki, oŋo yeye kinekine kepe so qeli kotino ma wakon wareke, eŋe wekuŋo naso qoeki yeye kinekine eya wane welaine okaniyakane Kaisaleŋo kutno more birakake.

³ Eŋe qelaŋanineŋo Kaisale wane ewe zonom eyarop motki qaga gaemaike, eŋe Kaisale eŋine rokop eŋine kait toqaine so kait kewatokine yaleka tokso giridiŋ, so eŋine don zonomine togole eyaŋo kepe so qeli korop eya kito qesiŋ maki pa okanmaike. Eŋe ŋei borikinane zonom sauke mataliki siukwareke, so kepe ŋei ŋerep sot midaine gekenane bira ŋonge, so eya wane ŋadino weti qeliwo wake, Kaisale Zonom Ware Ware Welaine wonino metmaike.

Kaisale Gipoleŋo Suwaine Ŋo Aŋelo Edo Nigatne Ketkele Okanmami

⁴ Kaisale wane Gipole eŋe aŋelo eŋane suwaine birakake, eya yemo eŋetine suwaine Kaisaleŋo mange, aŋelo eŋane eŋet eyamo nigatne ketkele eya wane kop.

⁵ Kaisaleŋo aŋelokoune eŋano ŋine mane iwa yale mi olatke, so Kaisale wane ekapko iwa yale mo qeqine, “Ge naŋane Giponne, ukude na geŋane Magaŋone okanmaile.” Me Kaisaleŋo aŋelo mane iwa yale mi olatke, “Na baŋ eŋane Magaine okanikale, eso oŋo baŋ naŋane Giponne okaniyake.”

⁶ So mane yemo Kaisale eŋe alakan Gipole kepeo birakaki kesiyakane okaneso, iwa yale rake, “Kaisale wane aŋelo korop eŋe wa wetene qe ewine kito meŋenka more mawakaikei.”

⁷ Kaisale eŋe aŋelo eŋane wetke more iwa yale rake, “Kaisaleŋo aŋelokoune momo so gerep bolamine yale biraongi, eŋane urata maikei wane ket okanmami.”

⁸ Ŋo Gipolane yemo Kaisale eŋe ora olale rake, “O Kaisale, geŋane ŋei waom met metŋone, yemo baŋ naso baŋem naso baŋem mere ariyake! Ŋei ŋerep eŋe korop geŋane banŋonoka pa waremami, eya koboboineka ware onikene.

⁹ Ge masi mainane simin ganiyake, so borikinane bauŋone wayake, kine eya wane Kaisale eŋe geŋane Kaisale, oŋo ge mawakongane more, kelok leweŋono qak gange, eyaŋo oi bakom kakapa zok manerop ewe kiti kitinerop, so aŋelo magu eŋano yaline kaki mane mi okanonge.”

¹⁰ Eŋe koso ora rake, “Ge Waom, mokaka qei kino lopeŋ seleleine more, kepe iwa ma wakongone, eŋe togogole pamaike, so ge geŋone meteŋoneŋo qeli ma wakongone, so kutno kinekine weneŋ.

¹¹ Kepe so qeli eŋe korop baŋ siukwarekei, ŋo ge yemo baŋ ge ari gekene, kepe so qeli ere takot so laplap sogine toi toine yale leleki yeine kito qokkene.

¹² Ge baŋ takot suwaine mane rutupkemami yale, qeli so kepe ere rutupke more leduŋ osikene, pakimo ere baŋ qeinge takot musele yale okanikeik ŋo ge yemo naso baŋem gemaine yaleka gekene, so ge baŋ suwa sele mi lelekene, so nasoŋone mane mi qoeyake.”

¹³ Kaisale eŋe aŋelokoune eŋano ŋine mane iwa yale mane mi olatke, “Iwa naŋane zonom wazano wonnoken metnom, na geŋane ŋabakopŋone biraonbe, eŋe kiye geso gesok yale kiyeŋonane bano metpi gesok onikene, so aŋelokoune eŋe don eya mane edange me? Midakaka!”

¹⁴ Pakimo aŋelo eŋe onokaka? Eŋe korop asu, eŋe Kaisale qelitine qe ge okanmami, so edo ŋei mena menaŋ magekei so gege togon wane raraine, eŋe mapit ongei wane biraonge.