Don Sane 1 - Ono

Ra Wesak Ra Wesak Don

¹ Ekap iwa yemo Kaisaleŋo kinekine baŋ ŋado mi azongi tanikine daleo wakoniyake, eya wane done Yesu Kristo ra wakone mange. Ra wakone mangi, Yesu Kristoŋo aŋeloine mane tale kaki oŋo Yohane wano ra wakone more olale sikanka okange.

² Pakimo Yohaneŋo yeye kinekine wakongi kake so detke, eya korop detluke more, eya wane kopka koboine ra wakonge. Eso iwa yemo Kaisale wano ŋine don so Yesu Kristoŋo don wele didiwo ma wakonge, eya ra wakonge.

³ Ekap iwa daposiyake, ŋei yewa eŋe wet pesek desiyake, so ŋei don iwa ketene more desikei, don kisi sane so ekap iwa wane kotino daleo qekole, eya dapore ka more, eŋe wet pesek desikei! Kinekine iwa korop baŋ wakoniyake, eya wane naso mo bomilemaike.

Doku Tautau Magu Sewen Eŋane Oi Bakom Don So Mosop Don

⁴ Yohane na doku tautau magu sewen Asiya provins kotino gemami, ŋinane kibi iwa qemaile. Dangunut so peyam eya Kaisale wano ŋine ŋinano pawareyake, eŋe naso iwa gemaike, eŋe mokaka geke, so eŋe sariyake, so asu sewen eŋine metmetinane kaitko gemami, eŋano ŋine weneŋ.

⁵ So Yesu Kristo wano ŋine, eŋe raki togole togole rako rakok magemaike, eŋe lewine wako wakon Gipole eŋe seuseuwo ŋine ma wirikkaki wisikae wiyeke, eŋe yaleka kepeo ŋei waom ge arimami, eŋane ware ware suwaine gemaike. Eŋe wet maep okanŋonmaike, so eŋine gegeine qikkaki paki, qeu seukki so seuseuineŋo ŋene borikinezo ŋine siwotŋonge,

⁶ so ŋebu makok ŋongi ululuŋ qekone, yemo ŋene eŋane ware wareinane kotino priskoune okane gekenane me, eŋine Kaisale so Magainane qelitine qe gekenane ra togole ŋedange. Ŋo Yesu Kristo wano yemo qeli ewe zonom eyaŋo papa togon naso baŋem naso baŋem pa ariyake! Weleka.

⁷ Kau, eŋe mo kezoŋ gorop sarimaike! Ŋei korop eŋe baŋ kaikei, so pilaŋ kiroine soiŋ soiŋine ŋetne teineŋo qelotkakoi, ŋei yewa eŋe weneŋ baŋ kakei. So kepe baŋem ŋei korop eŋe baŋ eŋane kutko aroke qom borik manerop, kakapa suwaine okangei, don iwa yemo welekatne! So wele teine.

⁸ Waom Kaisale zonom togole manerop pamanmaike, eya wane welaine so kine, oŋo iwa yale ramaike, “Na gege togon so numa alakan okorakole, so ŋado kito kito.” Eŋe iwa gemaike, so mo geke, so baŋ sariyake.

Yohane Eŋe Patmos Siyao Wetine Maingeke

⁹ Na Yohane, na ŋinane kimaŋine, so Yesurop weneŋ qeturage more, na ŋinerop wikile, so eŋane gege togon wane numa ŋenzarek weneŋ togole more, umat eya tewekmaine. Na neu more, siya mane, eŋetne Patmos, eya bira nangoi, onoka wane mida, na Kaisale wane don rawe suwa arike, so don wele Yesuŋo didiwo ra wakonge, eya ra edangole, eyawane.

¹⁰ Waom wane kaiwe naso yewao Asuŋo na warenange, paki na don suwaine mane ukatne romon yale arokki detkole, eŋe naŋane ŋadeno don rake.

¹¹ Eŋe iwa yale nolale rake, “Kine kine kamaine, eya korop ekapko qenom, paki ekap yewa motnom, doku tautau magu sewen yewa eŋano ari wareyake, Epeso matko, Smerna matko, Pergamum matko, Taiyataira matko, Sardis matko, Piladelpiya matko, so Laodikeya matko.”

Yohaneŋo Yesu Wane Kait Toqaine Kake

¹² Na pirik zinge, ŋei maŋo don nolatmaike, eŋe kakalane potkole, yewa pore onbe, lam 7 sewen golŋo mamaine metkoi.

¹³ Eŋane keueno ŋei yale mane kawe okorake, takot kiroine mane biraki ket qei kino qe okorake, so gol let mane moiyakino ramuki pake.

¹⁴ Eŋine lewetine zoune wakoine libeka lama zoune yale, me ais yale, so eŋine deine etke gerep bolamine yale lawekoik.

¹⁵ Eŋane kiyeretkine yemo bras gerepko ze more yan yalemaike, paki sauke ratokeu, qilaune kilitikmaike yale, so eŋane doninane ukatne yemo doku sin suwaine qeki arokmaike, yale ukat make.

¹⁶ Eŋe serekin sewen metine woneŋo malipke okorake, so pilaŋ mane ŋadine qomine, ŋetne teine aŋainoka saket okorake. Eŋine kaitine yemo kepe oŋa bango okangi, kaiwe ŋeleleŋka okoramaike, eya wane qelaŋane yale.

Yesuŋo Yohane Kito Pese Qe Pese Okankake

¹⁷ Na eŋe kawe paki, eŋane kino ket rasu more, ŋei seuseune yale pakole, eŋe metine wone eya naŋane kutno motki paki nolale rake, “Kaet mi okannom! Na gege togon wane numa alakan okorakole so ŋado kito kito welaine

¹⁸ Na wisika gege weku! Na mo seukkole, ŋo kanom, na wisikae wiyekoleŋo naso baŋem gege togon ge arikale. Na seuseu so sora gerep eya wane ki, noŋo magemaile.

¹⁹ Eya wane ge kinekine kamaine, eya iwa wakonmaike, so ŋado baŋ eya wane ŋadino wakoniyake, eya weneŋ qenom, so baŋ korop qe warekene.

²⁰ Iwa yemo serekin sewen naŋane metene wonno kene, so gol lam sewen mo kene, eya yemo don sane eya wane kine yemo iwa yale, serekin sewen eya yemo doku tautau magu sewen eŋane aŋelo, so gol lam sewen, eya yemo doku tautau magu sewen.”